Luke 2
2
Jesus N’awoo
(Matthew 1.18-25)
1Na ɔbaa dɛ nda no mu no, mbra bi fii Kaesar Augustus hɔ baa dɛ wɔnkan wiadze nyina nkyerɛw hɔn edzin. 2Iyi nye ɔkankyerɛw asɔpɔn no a wɔyɛɛ no ber a Kerinius dzi Siria ambrado no. 3Na nyimpa nyina kɔr hɔnara hɔn nkurow mu dɛ wɔnkyerɛw hɔn dzin. 4Na Josef so fii Galilii, wɔ Nazarɛt kurow no mu, kɔr Judea, David kurow a wɔfrɛ no Bɛtlɛhɛm no mu, osiandɛ ofi David fie nye n’ebusua mu ntsi, 5ama wɔaakan ɔno nye n’esiyer Mary a ne yafun no enyin no. 6Na ɔbaa dɛ, wɔwɔ hɔ no, ne nda a ɔsɛ dɛ ɔdze wo durii. 7Na ɔwoo n’abakan banyimba, na ɔdze adasoe kyekyeer no ho, na ɔdze no too mbowa edzidzidaka mu, osiandɛ ɔkwan nnyi ahɔhodan no mu ma hɔn.
Nguanhwɛfo no nye Abɔfo no
8Nna nguanhwɛfo bi wɔ ɔman no ara mu, da haban mu roweɔn hɔn nguankuw anadwe. 9Na Ewuradze bɔfoe begyinaa hɔn nkyɛn, na Ewuradze n’enyimnyam hyerɛnee bɔɔ hɔn ho aprɔw, na hu kaa hɔn kɛse. 10Na ɔbɔfo no see hɔn dɛ, Mma hom nnsuro; na hwɛ, mebrɛ hom nsɛmpa a ɔyɛ dɛw kɛse a ɔbɛyɛ aman nyina dze, 11na ndɛ wɔawo Agyenkwa ama hom wɔ David kurow mu, ɔno nye Kraest Ewuradze. 12Na iyi nye hom asɛnkyerɛdze: hom bohu abofra bi dɛ ɔkyekyer adasoe mu da mbowa edzidzidaka mu. 13Na awerɛfir mu ara ɔsor dɔm pii bɛkaa ɔbɔfo no ho yii Nyankopɔn ayɛw see dɛ,
14Enyimnyam nka Nyankopɔn wɔ sorsor,
Na asomdwee nka nyimpa a wɔsɔ n’enyi wɔ asaase do.
15Na ɔbaa dɛ abɔfo no fii hɔn nkyɛn kɔr sor no, nguanhwɛfo no sesee hɔnho dɛ, Hom mma yɛnkɔ Bɛtlɛhɛm nkɔhwɛ dza ɔaba a Ewuradze eyi akyerɛ hɛn yi. 16Na wɔbaa ntsɛntsɛm, na wobohun Mary nye Josef nye abofra no dɛ ɔda mbowa edzidzidaka mu. 17Na wobohun no no, wɔkaa asɛm a wɔkaa kyerɛɛ hɔn wɔ abofra no ho no ma ɔtahyee. 18Na hɔn a wɔtsee nyina, dza nguanhwɛfo no kaa kyerɛɛ hɔn no yɛɛ hɔn nwanwa. 19Na Mary dze, ɔdze nsɛm yi nyina siei, na ɔdween ho wɔ n’akoma mu. 20Na nguanhwɛfo no sanee kɔree kɛhyɛɛ Nyankopɔn enyimnyam na woyii no ayɛw wɔ dza wɔtsee na wokohunii dɛ mbrɛ wɔkaa kyerɛɛ hɔn nyina tse no.
21 #
Lev 12.3; Luk 1.31 Na ndaawɔtwe durii a worubotwa no twatsia no, wɔtoo no dzin JESUS, dɛ mbrɛ bɔfo no dze too no ana woribenyinsen no yafun mu no.
Wɔdze Jesus Kɔ Asɔrfi mu wɔ Jerusalɛm
22 #
Lev 12.6-8
Na hɔn ahoguar da no durii dɛ mbrɛ Moses mbra se no, wɔdze no kɔr Jerusalɛm dɛ wɔdze no rekɛkyɛ Ewuradze, 23#Eks 13.2, 12 dɛ mbrɛ wɔakyerɛw no Ewuradze ne mbra mu dɛ, Banyimba biara a obobue awotoa ano no, wɔbɛfrɛ no krɔnkrɔn ama Ewuradze, 24na wɔakɔbɔ afɔr dɛ mbrɛ wɔkaa no Ewuradze mbra no mu no, Ntamram ebien, anaadɛ mbuburmba ebien.
25Na hwɛ, ɔbarimba bi wɔ Jerusalɛm a ne dzin dze Simeon; na ɔyɛ nyimpa nyamesuronyi a ɔtsen, ɔrotweɔn Israel awerɛkyekyer, na Sunsum Krɔnkrɔn wɔ no do. 26Na Sunsum Krɔnkrɔn yii kyerɛɛ no dɛ onnkohu wu gyedɛ oehu Ewuradze ne Kraest no ana. 27Na Sunsum no dze no baa asɔrdan no mu: ber a abofra Jesus n’awofo dze no baa dɛ wɔrebɛyɛ mbrɛ mbra no n’atɔrmuadze tse ama no no. 28Nna Simeon faa no too n’abaw mu, yii Nyankopɔn ayɛw na afei ɔkaa dɛ,
29Ewuradze, nkyii gya w’akowaa kwan asomdwee mu,
dɛ mbrɛ w’asɛm se;
30Osiandɛ m’enyiwa ehu wo nkwagye a
31Esiesie wɔ amanaman nyina enyim;
32Ɔkandzea a ɔbɛma amanamamfo do atsew,
Na wo man Israel enyimnyam.
33Na ɔyɛɛ abofra no n’egya nye ne na nwanwa wɔ dza wɔkaa no wɔ no ho no ho; 34na Simeon hyiraa hɔn, na ɔsee ne na Mary dɛ, Hwɛ, oyi na wɔdze no esi hɔ ama Israel mu dodowara hɔn asehwe nye hɔn soɛr, ɔnye asɛnkyerɛdze a wɔbɛkasa etsia no; 35ama akoma dodowara mu adwen aada edzi, na ɔwoara so nkrantsee bohwira w’akoma mu. 36Nna Anna, ɔbaa nkɔnhyɛnyi bi a ɔyɛ Fanuel babaa a ofir Aser ebusuakuw mu wɔ hɔ: oenyin, na ɔwaar ne nkataasiaber mu nye no kun tsenaa mfe esuon, 37na ɔayɛ okunafo bɛyɛ mfe eduowɔtwe anan, na ɔammpa asɔrdan mu da, na ɔdze akɔnkyen nye mpaabɔ som Nyankopɔn adzekyee nye adzesaa. 38Na dɔn no ara mu, no so bae beyii Nyankopɔn ayɛw, na ɔkaa no ho asɛm kyerɛɛ hɔn a wɔrotweɔn dɛ wɔbɔpon Jerusalɛm no nyina.
Wɔsan Kɔ Nazarɛt
39 #
Mat 2.23
Na wowiee dza Ewuradze mbra se nyina yɛ no, wɔsanee kɔr hɔnankasa hɔn kurow Nazarɛt a ɔwɔ Galilii mu.
40Na abofra no nyinii, na ɔyɛɛ ndam, na nyansa hyɛɛ no ma, na Nyankopɔn adom wɔ no do.
Abofra Jesus wɔ Asɔrfi no Mu
41 #
Eks 12.1-27; Deut 16.1-8 Na n’awofo no kɔr Jerusalɛm afe nyina wɔ apaho afahyɛ no mu. 42Na odzii mfe duebien no, wɔkɔr Jerusalɛm dɛ mbrɛ afahyɛ n’atɔrmuadze tse, 43na wodzii nda no wiei na wɔresan akɔ no, abofra Jesus no kaa ekyir wɔ Jerusalɛm a nna n’egya nye ne na dze, wonnyim; 44na wosusuu dɛ ɔafora dɔm no mu ntsi, wɔnantseew dakor kwansin na wɔkɔhwehwɛɛ no wɔ hɔn ebusuafo nye hɔn amanyimfo mu; 45na woennhu no no, wɔsanee kɔr Jerusalɛm kɔhwehwɛɛ no. 46Na ɔbaa dɛ ne ndaansa durii no, wokohun no wɔ asɔrfi no mu dɛ ɔtse akyerɛkyerɛfo no finimfin, oritsie hɔn na oribisabisa hɔn nsɛm; 47na hɔn a wotsiee no nyina, ne ntseasee nye ne mbuae yɛɛ hɔn nwanwa. 48Na wohun no no, hɔn ho boow hɔn, na ne na see no dɛ, Ɔba, na ɔyɛ dɛn na enye hɛn edzi no dɛm yi? Hwɛ, w’egya nye emi dze yaw na ahwehwɛ wo. 49Na ɔsee hɔn dɛ, Hom hwehwɛɛ me ayɛ dɛn? Ana hom nnyim dɛ otwar dɛ metsena m’Egya fie? #2.49: Anaadɛ meyɛ m’Egya n’edwuma. 50Na hɔn dze, wɔanntse asɛm a ɔkaa kyerɛɛ hɔn no ase. 51Na ɔnye hɔn sii mu kɔr Nazarɛt, na ɔbrɛɛ noho adze maa hɔn; na ne na dze, ɔdze nsɛm yi nyina siei wɔ n’akoma mu.
52 #
1 Sam 2.26; Mbɛ 3.4 Na Jesus nyinii wɔ nyansa nye honandua mu, na onyaa enyimpa wɔ Nyankopɔn nye nyimpa enyim.
Currently Selected:
Luke 2: MFANBRPC
Highlight
Share
Copy
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.
