John 19

1Na afei Pilate faa Jesus na ɔkaa no mpire. 2Na nsordaafo no bɔɔ nsoɛ abɔtsir na wɔdze hyɛɛ ne tsir, na wɔdze tam memen bi furaa no, 3na wopimpiin ne nkyɛn bɛsee no dɛ, Jewfo Hen no aba oo! Na wɔbobɔɔ no asotɔr. 4Na Pilate puei bio, na ɔsee hɔn dɛ, Hwɛ, medze no pue brɛ hom, ama hom eehu dɛ munnhu afɔdzi biara wɔ no mu. 5Na Jesus puei bae, nna ɔhyɛ nsoɛ abɔtsir nye atar memen no, na Pilate see hɔn dɛ, Hwɛ, nyimpa no nye yi! 6Na asɔfompanyin no nye asomfo no hun no no, wɔtseatseaa mu dɛ, Bɔ no mbeamudua mu, bɔ no mbeamudua mu! Pilate see hɔn dɛ, Homankasa hom mfa no nkɔbɔ no mbeamudua mu, na emi dze, munnhu afɔdzi biara wɔ no mu. 7Jewfo no buaa no dɛ, Yɛwɔ mbra, na hɛn mbra ntsi otwar dɛ owu, osiandɛ ɔyɛɛ noho Nyankopɔn ne Ba.

8Na Pilate tsee asɛm yi no, osuroo dodoodow, 9na ɔkɔr aban no mu bio, na ɔsee Jesus dɛ, Ifi hen? Na Jesus emmbua no. 10Na Pilate see no dɛ, Ennkasa mo ho? Innyim dɛ mowɔ tum dɛ mobɔ wo mbeamudua mu, na mowɔ tum dɛ migyaa wo anaa? 11Jesus see no dɛ, Sɛ woemmfi sor ammfa amma wo a, nkyɛ innyi mo do tum biara. Dɛm ntsi, nyia oyii me maa wo no, ɔayɛ bɔn kɛse no ara. 12Na ofitsi hɔ no, Pilate hwehwɛɛ dɛ nkyɛ ogyaa no, naaso Jewfo no tseaa mu dɛ, Sɛ igyaa oyi a, na ennyɛ Kaesar no dɔfo: obiara a ɔyɛ noho ɔhen no ɔnye Kaesar dzi esi.

13Na Pilate tsee nsɛm yi no, ɔdze Jesus puei, na ɔbɛtsenaa atsɛmbu egua no do, wɔ beebi mbrɛ wɔfrɛ no Abonsɛwee no, na Hebriw kasa mu dze, wɔfrɛ no Gabata. 14Nna ɔyɛ apaho ne nsiesie da, na ɔbɛyɛ ewiaber duebien: na ɔsee Jewfo no dɛ, Hwɛ, hom Hen nye yi! 15Na wɔtseaa mu dɛ, Fa no kɔ, fa no kɔ, bɔ no mbeamudua mu! Pilate see hɔn dɛ, Mombɔ hom Hen mbeamudua mu? Asɔfompanyin no buaa no dɛ, Yennyi ɔhen biara dɛ Kaesar. 16Na afei oyii no maa hɔn dɛ wɔnkɔbɔ no mbeamudua mu.

Wɔbɔ Jesus Mbeamudua mu

(Matthew 27.32-44; Mark 15.21-32; Luke 23.26-43)

Na wɔfaa Jesus dze no kɔree. 17Na ɔso ne mbeamudua puei bodur beebi a wɔfrɛ hɔ Nyitsirbea a Hebriw mu wɔfrɛ no Golgota. 18Hɔ na wɔbɔɔ no mbeamudua mu, na beenu kaa no ho, afa ha kor, afa ha kor, na Jesus wɔ finimfin. 19Na Pilate kyerɛɛw ho asɛm so, na ɔdze faam mbeamudua no etsifi, na kyerɛw no nye dɛ, JESUS NAZARƐTNYI, JEWFO HEN NO. 20Na kyerɛw yi Jewfo pii kenkanee, osiandɛ mbrɛ wɔbɔɔ Jesus mbeamudua mu no ɔbɛn kurow no, na wɔkyerɛwee wɔ Hebriw nye Griik nye Romefo kasaa mu. 21Na Jewfo asɔfompanyin no see Pilate dɛ, Mma nnkyerɛw dɛ Jewfo Hen, na dɛ ɔno kaa dɛ, Emi nye Jewfo Hen. 22Pilate buaa dɛ, Dza makyerɛw no, makyerɛw.

23Na nsordaafo no bɔɔ Jesus mbeamudua mu no, wɔfaa ne ntar no na wɔkyɛɛ mu anan, ma sordaanyi baako nyaa kor, ɔnye n’atar nhyɛase so. Na n’atar nhyɛase no, onnyi mpamee, na wɔawen fi sor pem ase. 24Na wɔsesee hɔnho dɛ, Mma hom mma yennsunsuan mu, na hom mma yɛntwe ho tonto nhwɛ nyia ɔbɛyɛ nedze; ama kyerɛw no a ɔka dɛ,

Wɔkyɛɛ me tam mu maa hɔnho,

Na m’atar so wɔtwee ho tonto no, aaba mu.

Na nsordaafo no yɛɛ iyinom. 25Na Jesus ne na, ɔnye ne na no nua Mary a ɔyɛ Klopas yer, ɔnye Mary Magdalene gyina Jesus ne mbeamudua ho. 26Na Jesus hun ne na nye osuanyi a ɔdɔ no no dɛ ogyina hɔ no, ɔsee ne na dɛ, Ɔbaa, hwɛ, wo ba nye yi. 27Na ɔsee osuanyi no dɛ, Hwɛ, wo na nye yi. Na ofitsi dɔn no ara mu na osuanyi no faa no kɔr nankasa ne fie.

Jesus No Wu

(Matthew 27.45-56; Mark 15.33-41; Luke 23.44-49)

28 # Dwom 69.21; 22.15 Iyi ekyir no Jesus nyim dɛ woenya ewie ndzɛmba nyina (mbrɛ ɔbɛyɛ ma kyerɛw no aaba mu) ntsi, ɔsee dɛ, Nsukɔm dze me. 29Nna wenyin yerɛyerɛw ehina ma si hɔ, na wɔdze wenyin yerɛyerɛw no bi hyɛɛ sapɔw ma, na wɔdze tuaa odwon dua ano dze kaa n’ano. 30Na Jesus gyee wenyin yerɛyerɛw no, ɔsee dɛ, Mewie!#19.30 MEWIE: Griik no ka no dɛ Oewie! Afei ɔbɔɔ ne tsir adze, na ogyaa no sunsum mu.

Wɔwɔ Jesus ne Mfe mu Nkambaa

31Ɔnam dɛ nna ɔyɛ Ahosiesieda ma Jewfo no, na mbrɛ ɔbɛyɛ ma efun no nnkɛka mbeamudua no do ahomgyeda no (na eso ahomgyeda no yɛ dapɔn) ntsi, wɔkɛserɛɛ Pilate dɛ wonkobubu hɔn anan mu na wonnyi hɔn mfi hɔ. 32Na nsordaafo no bae bobubuu nyia odzi kan no n’anan mu, ɔnye nyia no so wɔbɔɔ no mbeamudua mu no nedze. 33Na wodur Jesus do na wohun dɛ oewu dada no, woemmbubu n’anan mu; 34na nsordaafo no baako dze peaa wɔɔ ne mfemu, na ntsɛmara na bɔgya nye nsu fii mu bae. 35Na nyia oehu no oedzi dase, na ne dasee yɛ nokwar, na ɔno so nyim dɛ ɔka nokwar, na hom so aagye edzi. 36#Eks 12.46; Nka 9.12; Dwom 34.20 Na wɔyɛɛ iyinom ma kyerɛw no aaba mu dɛ, Wonnkobu ne biew bi. 37#Zek 12.10; Nyi 1.7 Na bio kyerɛw fofor so se, Wɔbɔhwɛ nyia wɔwɔɔ no (peaa) no.

Wosie Jesus

(Matthew 27.57-61; Mark 15.42-47; Luke 23.50-56)

38Na iyi ekyir no na Josef a ofi Arimatea a ɔyɛ Jesus no suanyi, na Jewfo ho hu ntsi ɔyɛɛ no nsumaa mu no, bɛserɛɛ Pilate dɛ ɔmma onyi Jesus no fun no, na Pilate maa no ho kwan; na ɔbae bɛfaa Jesus no fun no. 39#Joh 3.1, 2 Na Nikodemɔs so a nkan no ɔbaa Jesus hɔ anadwe no, dze eduhuam a wɔfrɛ no mɛɛr nye alɔe mforaforae bɛyɛ nkeriibo pɔɔn ɔha bae. 40Na wɔfaa Jesus no fun na wɔdze nduhuam no kaa no ho kyekyeer ndwera mu, dɛ mbrɛ Jewfo efunsie tse. 41Na eso mbrɛ wɔbɔɔ no mbeamudua mu no, ture wɔ hɔ, na ture no mu ɔboda bi wɔ hɔ a wɔmmfaa obiara nntoo mu da. 42Na hɔ na Jewfo Ahosiesieda ntsi, na osiandɛ nda no bɛn so ntsi, wɔdze Jesus toe.

Currently Selected:

John 19: MFANBRPC

Highlight

Copy