John 18

Wɔkyer Jesus

(Matthew 26.47-56; Mark 14.43-50; Luke 22.47-53)

1Jesus kaa iyinom no, ɔnye n’esuafo no puei kotwaa ɔwora Kidron, mbrɛ ture bi wɔ, na ɔnye n’esuafo no kɔr mu. 2Na Judas so a oriyi no ama no so nyim hɔ, osiandɛ Jesus nye n’esuafo no tɔɔ dɛ wokehyia hɔ. 3Na Judas faa asafo no nye asomfo a wofi asɔfompanyin nye Farisiifo no nkyɛn no, ɔbaa hɔ, wokitsakitsa nkandzea nye atsɛn nye akodze. 4Na Jesus nyim dza ɔreba no do nyina no, opuei kebisaa hɔn dɛ, Hom rohwehwɛ woana? 5Wobuaa no dɛ, Jesus Nazarɛtnyi no a. Jesus buaa hɔn dɛ, Emi nye no. Nna Judas a oriyi no ama no so nye hɔn gyina hɔ. 6Na ɔsee hɔn dɛ, Emi nye no no, wɔdze hɔn ekyir hɔn ekyir kɔhwee daadze. 7Na obisaa hɔn bio dɛ, Hom rohwehwɛ woana? Na wɔsee dɛ, Jesus Nazarɛtnyi no a. 8Jesus buaa dɛ, Mekaa kyerɛɛ hom dɛ emi nye no; dɛm ntsi sɛ emi na hom rohwehwɛ me a, hom mma iyinom nkɔ; 9ama asɛm no a ɔkaa dɛ, Hɔn a edze hɔn ama me no mannyew mu biara no, aaba mu. 10Na Simon Peter a nna ɔdze afona no twee, na ɔdze bɔɔ ɔsɔfopanyin no n’akowaa, na otwaa n’asowa nyimfa; na akowaa no ne dzin dze Malkus. 11#Mat 26.39; Mar 14.36; Luk 22.42 Na Jesus see Peter dɛ, Fa nkrantsee no hyɛ bɔha no mu: kɔɔpow a m’Egya dze ama me no, mma monnom anaa?

Wɔdze Jesus Kɔ Annas Nkyɛn

12Na asafo no nye safohen no ɔnye Jewfo asomfo no faa Jesus na wɔkyekyeer no, 13na wɔdze no dzii kan kɔr Annas nkyɛn, osiandɛ Kaiafas a odzi afe no mu sɔfopanyin no n’asew nye no. 14#Joh 11.49, 50 Na Kaiafas nye nyia ɔmaa Jewfo no apam dɛ oye dɛ nyimpa baako bowu ama ɔman no no.

Peter Pa Jesus

(Matthew 26.69, 70; Mark 14.66-68; Luke 22.55-57)

15Na Simon Peter nye osuanyi baako dzii Jesus ekyir, na ɔsɔfopanyin no nyim osuanyi no, na ɔnye Jesus kɛhɛɛn ɔsɔfopanyin aban mu hɔ. 16Na Peter dze, ogyinaa abow no ano guado. Na osuanyi no a ɔsɔfopanyin no nyim no no puei bɛkasaa kyerɛɛ abowanohwɛfo no na ɔdze Peter baa dan mu. 17Na abaawa abowanohwɛfo no see Peter dɛ, Ana wo so immfi nyimpa yi n’esuafo no mu? Peter see dɛ, Mimmfi mu. 18Na nkowaa no nye asomfo no gyinagyina hɔ a wɔdze biriw abɔ gya, osiandɛ awɔw aba, na wɔroto gya; nna Peter so gyina hɔ roto gya.

Ɔsɔfopanyin no Bisabisa Jesus Nsɛm

(Matthew 26.59-66; Mark 14.55-64; Luke 22.66-71)

19Na ɔsɔfopanyin no bisaa Jesus n’esuafo nye ne nkyerɛkyerɛ ho asɛm. 20Jesus buaa no dɛ, Makasa petee akyerɛ wiadze; daa mekyerɛkyerɛ wɔ nhyiamudan nye asɔrfi mu, mbrɛ Jewfo nyina hyia, na mannka hwee nsumaa mu. 21Emi dze, ɔyɛ dɛn na ibisa me? Bisa hɔn a wɔtsee asɛm kor a mekaa kyerɛɛ hɔn: hwɛ, hɔn na wonyim dza mekae. 22Na ɔkasaa dɛm no, asomfo a wogyina hɔ no mu baako bɔɔ Jesus sotɔr see no dɛ, Mbrɛ ibua ɔsɔfopanyin nye yi? 23Jesus buaa no dɛ, Sɛ maka bɔn a, gye bɔn no ho dase, na sɛ oye a, ɔyɛ dɛn na ebɔ me? 24Dɛm ntsi Annas somaa no nkyehoma mu kɔr Kaiafas ɔsɔfopanyin no hɔ.

Peter Pa Jesus Bio

(Matthew 26.71-75; Mark 14.69-72; Luke 22.58-62)

25Nna Simon Peter gyina hɔ roto gya. Na wɔsee no dɛ, Ana ɔwo so immfi n’esuafo no mu? Ɔsanee na ɔsee dɛ, Mimmfi mu. 26Ɔsɔfopanyin no no nkowaa mu baako a ɔyɛ nyia Peter twaa n’asowa no no busuanyi no see no dɛ, Ana mennhu wo wɔ ne nkyɛn wɔ ture no mu? 27Na Peter saan bio; na ntsɛmara akokɔ bɔnee.

Jesus Wɔ Pilate Enyim

(Matthew 27.1, 2, 11-14; Mark 15.1-5; Luke 23.1-5)

28Na wɔdze Jesus fii Kaiafas nkyɛn kɔr ambrado aban mu; nna ahanamakye a, na hɔnara dze wɔannhɛn ambrado aban mu hɔ, amma hɔn ho eenngu fi na woeedzi apaho (edziban) no. 29Dɛm ntsi Pilate puei baa hɔn nkyɛn na obisaa dɛ, Ebɛn sombo na hom dze bɔ dɛm nyimpa yi? 30Wobuaa no dɛ, Sɛ oyi nnyɛ ɔdzebɔnyɛnyi a, nkyɛ yɛammfa no ammbrɛ wo. 31Na Pilate see hɔn dɛ, Homara hom mfa no, na hom nkobu no atsɛn dɛ mbrɛ hom mbra tse. Jewfo no see no dɛ, Hɛn dze, yennyi ho kwan dɛ yeku obiara; 32#Joh 3.14; 12.32 ma Jesus n’asɛm a ɔkae dze kyerɛɛ owu kor a orubowu no aaba mu.

33Na Pilate hɛɛn ambrado aban mu bio, na ɔfrɛɛ Jesus na ɔsee no dɛ, Ana ɔwo nye Jewfo hen no? 34Jesus buaa no dɛ, Wankasa reka yi, anaa binom kaa no mo ho kyerɛɛ wo? 35Pilate buaa dɛ, Ana emi meyɛ Jewnyi a? Wankasa wo mamfoo nye asɔfompanyin no na wɔdze wo brɛɛ me. Ebɛnadze na eyɛe? 36Jesus buaa dɛ, M’ahendzi mmfi wiadze yi mu: sɛ m’ahendzi fi wiadze yi mu a, nkyɛ m’asomfo bɔko, amma wɔaammfa me annhyɛ Jewfo nsa; na afei m’ahendzi mmfi ha. 37Pilate see no dɛ, Nna eyɛ ɔhen nye no? Jesus buaa dɛ, Ɔwoara aka dɛ meyɛ ɔhen: iyi ntsi na wɔwoo me, iyi ntsi na mebaa wiadze, ama maabɛgye nokwar no ho dase. Obiara a ofi nokwar no mu no, otsie me ndze. 38Pilate see no dɛ, Nokwar nye ebɛnadze?

Na ɔsee dɛm no, opuei kɔr Jewfo no hɔ bio, na ɔsee hɔn dɛ, Emi dze, munnhu afɔdzi biara wɔ no mu. 39Na hom wɔ atɔrmuadze dɛ apaho no mu migyaa nyimpa baako ma hom: dɛm ntsi, hom pɛ dɛ migyaa Jewfo hen no ma hom anaa? 40Na hɔn nyina tseaa mu bio dɛ, Nnyɛ oyi a, na Barabbas a, naaso Barabbas yi yɛ odwotwafo.

Currently Selected:

John 18: MFANBRPC

Highlight

Copy