John 17

Jesus Bɔ Mpaa Ma Noho na N’esuafo

1Iyinom na Jesus kae na ɔmaa n’enyi do kɔr sor na ɔsee dɛ, Egya, dɔn no edu: hyɛ wo Ba enyimnyam, ma Ba no so nhyɛ wo enyimnyam, 2dɛ mbrɛ emaa no tum wɔ honam nyina do, dɛ biribiara a edze ama no no, ɔmma hɔn onnyiewiei nkwa no. 3Na iyi nye onnyiewiei nkwa, dɛ wobohu ɔwo, nokwar Nyame kor no, nye nyia esomaa no, mekyerɛ Jesus Kraest. 4Muwiee edwuma a edze ama me dɛ menyɛ no na mehyɛɛ wo enyimnyam wɔ asaase do; 5na afei, Egya, fa enyimnyam a mowɔ no wɔ wo nkyɛn ansaana wiadze bɔɔ adze no hyɛ me enyimnyam wɔ wankasa wo nkyɛn.

6 Miyii wo dzin edzi kyerɛɛ nyimpa a edze hɔn fi wiadze maa me no. Wɔyɛ wodze, na edze hɔn maa me, na woesie m’asɛm. 7Afei woehu dɛ ndzɛmba a edze ama me nyina fi wo hɔ; 8osiandɛ nsɛm a edze maa me no, medze ama hɔn, na hɔn so gyee na wohun ampa dɛ mifi wo nkyɛn mebae, na wɔgyee dzii dɛ ɔwoara na esomaa me. 9Mibisa ma hɔn: mimmbisa mma wiadze, na hɔn a edze hɔn ama me a, osiandɛ wɔyɛ wodze. 10Na m’adze nyina yɛ wodze, na wodze so yɛ emi medze, na wɔahyɛ me enyimnyam wɔ hɔn mu. 11Na afei minnyi wiadze bio, na yinom wɔ wiadze, na emi dze, mereba wo nkyɛn. Egya Krɔnkrɔn, fa hɔn sie wo dzin a edze ama me no mu, ama wɔaayɛ kor dɛ hɛn. 12Mowɔ hɔn nkyɛn no, medze hɔn siei wɔ wo dzin a edze ama me no mu: na moweɔɔn hɔn, na hɔn mu biara annyew, gyedɛ ɔyera ba no, ama kyerɛwsɛm no aaba mu. 13Na afei dze, mereba wo nkyɛn, na meka yinom wɔ wiadze ama woeenya me dɛw no ma wɔaahyɛ ma wɔ hɔn mu. 14Medze w’asɛm ama hɔn, na wiadze taan hɔn, osiandɛ wommfi wiadze dɛ mbrɛ mo so mimmfi wiadze. 15Mimmbisa dɛ yi hɔn fi wiadze, na mbom dɛ yi hɔn fi bɔn no ho sie. 16Wommfi wiadze dɛ mbrɛ mo so mimmfi wiadze. 17Tsew hɔn ho wɔ nokwar no mu: w’asɛm yɛ nokwar. 18Dɛ mbrɛ ɔwo somaa me wiadze no, dɛmara na mo so mosomaa hɔn wiadze. 19Na hɔn ntsi metsew moho, ama hɔn so hɔn ho aatsew nokwar mu. 20Na nnyɛ yinom nkotsee ntsi na mibisa, na hɔn a wɔnam hɔn asɛm do gye me dzi no so ntsi bi, 21ama hɔn nyina aayɛ kor, dɛ mbrɛ ɔwo, Egya, ewɔ mo mu, na mowɔ wo mu, hɔn so waayɛ kor wɔ hɛn mu, na wiadze aagye edzi dɛ ɔwo na esomaa me. 22Na enyimnyam a edze ama me no, medze ama hɔn, dɛ wɔnyɛ kor dɛ mbrɛ yɛyɛ kor; 23na emi mentsena hɔn mu, na wo so ntsena mo mu, na woeewie kor yɛ, na wiadze eehu dɛ ɔwo na esomaa me, na mbrɛ edɔɔ me no, edɔɔ hɔn so dɛmara. 24Egya, dza edze ama me no, mepɛ dɛ mbrɛ mowɔ no, hɔn so bɛka mo ho na woeehu m’enyimnyam a edze ama me no, osiandɛ edɔɔ me ansaana wɔrehyɛ wiadze ase. 25Egya Tsenenee, wiadze ennhu wo, na emi dze, muhun wo, na yinom hun dɛ ɔwo na esomaa me. 26Na miyii wo dzin kyerɛɛ hɔn, eso mibeyi akyerɛ hɔn, ama ɔdɔ a edze dɔɔ me no aatsena hɔn mu, na mo so maatsena hɔn mu.

Currently Selected:

John 17: MFANBRPC

Highlight

Copy