John 16

1 Maka iyinom akyerɛ hom amma hom eemmfintsiw. 2Wobeyi hom edzi efi nhyiamudan mu mpo: dɔn no reba a obiara a oboku hom bɔdwen dɛ ɔdze rosom Nyankopɔn. 3Na wɔbɛyɛ iyinom osiandɛ wonnyim Egya no, anaaso emi. 4Na maka iyinom akyerɛ hom, ama sɛ dɔn no ba a, hom aakaa dɛ mekaa kyerɛɛ hom dɛm. Na ahyɛse no mannka iyinom annkyerɛ hom, osiandɛ nna menye hom wɔ hɔ.

Sunsum Krɔnkrɔn no N’edwuma

5 Na afei dze, morokɔ nyia ɔsomaa me no nkyɛn; naaso hom mu biara mmbisa me dɛ, Erokɔ hen? 6Na osiandɛ maka iyinom akyerɛ hom ntsi, awerɛhow ahyɛ hom akoma ma, 7naaso dza mereka yi yɛ nokwasɛm, dɛ oye ma hom dɛ mokɔ, osiandɛ sɛ mannkɔ a, Okyigyinafo remmba hom nkyɛn, na sɛ mokɔ a, mobɔsoma no wɔ hom nkyɛn. 8Ɔno na sɛ ɔba a, obeyi wiadze atsɛn wɔ bɔn nye tsenenee nye atsɛmbu ho: 9bɔn ho, osiandɛ wɔnngye me nndzi; 10tsenenee ho, osiandɛ morokɔ Egya no nkyɛn, na hom nnkohu me bio; 11atsɛmbu ho, osiandɛ woebu wiadze hen atsɛn. 12Mowɔ nsɛm pii ka kyerɛ hom, na hom runntum nngye no sesei. 13Na sɛ ɔno, nokwar Sunsum no, nya ba a, obegya hom kwan akɔ nokwar nyina mu: na ɔnnkɛhyɛ nankasa noho akasa, na biribiara a ɔbɛtse na ɔbɛka, na dza ɔreba so ɔbɛkyerɛ hom. 14Ɔno na ɔbɛhyɛ me enyimnyam, osiandɛ ɔbɛfa dza ɔyɛ medze no bi na ɔdze abɛkyerɛ hom. 15Dza Egya no wɔ nyina yɛ medze: iyi ntsi na mesee dɛ, Ɔbɛfa dza ɔyɛ medze no bi na ɔdze abɛkyerɛ hom.

Awerɛhow Bɛdan Enyigye

16 Aka kakra na hom nnhu me, na bio aka kakra na hom bohu me, osiandɛ morokɔ Egya no nkyɛn. 17Na n’esuafo no binom kekae wɔ hɔn mu dɛ, Ebɛn asɛm na ɔreka kyerɛ hɛn yi? Aka kakra na hom nnhu me; na bio aka kakra na hom bohu me: na, Osiandɛ morokɔ Egya no nkyɛn? 18Na esuafo no see dɛ, Ebɛn asɛm na ɔreka yi, Aka kakra? Yennyim dza ɔreka. 19Na Jesus hun dɛ wɔrepɛ ebisa no no, ɔsee hɔn dɛ, Ana iyi ho na hom ribisabisa wɔ hom mu dɛ mesee dɛ, Aka kakra na hom nnhu me, na bio aka kakra na hom bohu me yi? 20Mese hom wɔ nokwar mu dɛ, Hom bosu na hom edzi nkɔmbɔ, na wiadze edzi dɛw; hom dze, hom werɛ bɔhow, naaso hom awerɛhow bɛdan enyigye. 21Ɔbaa roko awoo a, onya awerɛhow, osiandɛ no dɔn edu; na sɛ onya wo ba no a, ɔnnkaa n’ahoguan no bio, wɔ ne dɛw a odzi dɛ wɔawo nyimpa aba wiadze ntsi. 22Na hom so sesei dze, hom enya awerɛhow; na mubohu hom bio, na hom akoma bedzi dɛw, na hom dɛw no obi renngye no hom nsamu. 23Na da no hom nnkebisa me hwee. Ampa, meka kyerɛ hom dɛ, Biribiara a hom bɛserɛ Egya no wɔ me dzin mu no, ɔdze bɛma hom. 24Ɔdze bodu sesei hom nnserɛɛ hwee wɔ me dzin mu: hom nserɛ na hom benya, ma hom dɛw aahyɛ ma.

Wiadze do Konyimdzi

25 Maka iyinom akyerɛ hom wɔ mbɛbu mu. Dɔn no reba a mennkɛkasa akyerɛ hom wɔ mbɛbu mu bio, na maka Egya no ho asɛm akyerɛ hom petee. 26Da no hom bɛserɛ wɔ me dzin mu. Mennka nnkyerɛ hom dɛ mibebisa Egya no ama hom; 27na Egya no ankasa dɔ hom, osiandɛ hom adɔ me na hom agye edzi dɛ mifi Nyankopɔn nkyɛn mebae. 28Mifi Egya no nkyɛn na mebaa wiadze; bio meredan wiadze egya na makɔ Egya no nkyɛn.

29N’esuafo no see no dɛ, Hwɛ, afei ekasa pefee, na nnyɛ abɛbu mu a. 30Afei yenyim dɛ inyim ndzɛmba nyina, na onnhia wo dɛ obi bisa wo: iyi mu na yɛgye dzi dɛ ifi Nyankopɔn nkyɛn bae. 31Jesus buaa hɔn dɛ, Afei hom gye dzi? 32Hwɛ, dɔn no reba na oenya edu a hom nyina bɛpetse akɔ homankasa homdze mu, na hom adan mo nko egya, naaso ɔrennka mo nko, osiandɛ Egya no wɔ me nkyɛn. 33Maka iyinom akyerɛ hom ama hom eenya asomdwee wɔ mo mu. Wiadze mu dze, hom wɔ ahohiahia mu naaso hom mma hom akoma ntɔ hom ntɔ hom yamu: osiandɛ medzi wiadze do konyim.

Currently Selected:

John 16: MFANBRPC

Highlight

Copy