John 20

Jesus no Wusoɛr

(Matthew 28.1-8; Mark 16.1-8; Luke 24.1-12)

1Na da a odzi dapɛn no kan no anapatutu a enyim nntsetsewee no, Mary Magdalene baa nda no do, na obohun ɔbo no dɛ woeyi efi nda no ano. 2Na otutuu mbirika baa Simon Peter, ɔnye osuanyi baako no a Jesus dɔɔ no no hɔ na ɔsee dɛ, Woeyi Ewuradze efi nda no mu, na yennyim mbrɛ wɔdze no akɔto. 3Na Peter nye osuanyi baako no puei kɔr nda no do. 4Na hɔn beenu nyina tutuu mbirika: na osuanyi baako no paa Peter ho, na odzii kan baa nda no do. 5Na ɔbɔɔ no mu adze no, ohun ndwera no dɛ ogu hɔ, naaso ɔannkɔ nda mu. 6Na Simon Peter dzii n’ekyir bae, na ɔkɔr nda no mu, na okohun ndwera no dɛ ogu hɔ, 7ɔnye duukuu a wɔdze bɔɔ ne tsir no dɛ onngu ndwera no ho, na wɔabobɔw no nko gu nkyɛn beebi. 8Na afei osuanyi baako a odzii kan baa nda no do no so kɔr mu, na okohunii, na ɔgyee dzii. 9Nna wonnyae nnhun kyerɛw no dɛ otwar dɛ ɔsoɛr fi ewufo mu. 10Na esuafo no sii mu kɔr hɔn fie bio.

Jesus Yi Noho Kyerɛ Mary Magdalene

(Matthew 28.9, 10; Mark 16.9-11)

11Naaso nna Mary dze, ogyina nda no do rusu. Na orusu no, ɔbɔɔ no mu adze hwɛɛ nda no mu. 12Na ohun abɔfo beenu wɔ ntar fufuw mu dɛ wɔtsetse hɔ: ɔbaako tse etsifi, na ɔbaako tse anaafo wɔ beebi a Jesus no fun dae hɔ. 13Na wobisaa no dɛ, Ɔbaa, ebɛnadze ntsi na irusu yi? Ɔsee hɔn dɛ, Osiandɛ woeyi m’Ewuradze kɔ, na minnyim mbrɛ wɔdze no akɔto. 14Na ɔsee dɛm no, ɔdaan noho hwɛɛ n’ekyir, na ohun Jesus dɛ ogyina hɔ, naaso nna onnyim dɛ Jesus a. 15Jesus see no dɛ, Ɔbaa, ebɛnadze ntsi na irusu? Erohwehwɛ woana? Na ɔno dze, osusu dɛ ɔno nye turehwɛfo no, ɔsee no dɛ, Mo wura, sɛ ɔwo na afa no efi ha a, kyerɛ me mbrɛ edze no akɔto, na menkɛfa no. 16Jesus see no dɛ, Mary! Na ɔno daan noho see no Hebriw kasa mu dɛ, Raboni! (Ɔnye dɛ, Kyerɛkyerɛfo) 17Jesus see no dɛ, Mma mmfa wo nsa nnka me, na minnyae monnkɔr sor wɔ m’Egya nkyɛn; na kɔ mo nuanom no nkyɛn kɛse hɔn dɛ, Morobɔkɔ sor wɔ m’Egya nye hom Egya, me Nyankopɔn nye hom Nyankopɔn nkyɛn. 18Mary bae bɛsee esuafo no dɛ, Mehu Ewuradze; ɔnye nsɛm a ɔkaa kyerɛɛ no no nyina.

Jesus Yi Noho Kyerɛ N’esuafo no

(Matthew 28.16-20; Mark 16.14-18; Luke 24.36-49)

19Na da a odzi dapɛn no kan no ara ewimbir no, nna ɔnam Jewfo no hɔn ho suro ntsi wɔatotow mbobow mu wɔ mbrɛ esuafo no ehyia no, na Jesus bae begyinaa hɔn finimfin, na ɔsee hɔn dɛ, Asomdwee nka hom! 20Na ɔsee dɛm no, ɔdze ne nsa nye ne mfemu kyerɛɛ hɔn. Na esuafo no hun Ewuradze no, wodzii dɛw. 21Na Jesus see hɔn bio dɛ, Asomdwee nka hom: dɛ mbrɛ Egya no asoma me no, mo so mosoma hom. 22Na ɔkaa iyi no, oguu ahom guu hɔn do, na ɔsee hɔn dɛ, Hom ngye Sunsum Krɔnkrɔn no: 23#Mat 16.19; 18.18 hɔn a hom dze hɔn bɔn kyɛ hɔn no, wɔdze akyɛ hɔn; hɔn a hom ma hɔn bɔn ka hɔ no, wɔama aka hɔ.

Jesus na Tomas

24Nna Tomas, duebien no mu baako a wɔfrɛ no Ata no, onnyi hɔn mu na Jesus bae. 25Na esuafo nkaa no see no dɛ, Yeehu Ewuradze! Na ɔsee hɔn dɛ, Sɛ mennhu ne nsa mu mprɛgow no ananmu, na mammfa me nsatseaba mannka mprɛgow no ananmu, na mammfa me nsa annka ne mfemu a, merenngye nndzi.

26Na n’ekyir ndaawɔtwe no, nna esuafo no wɔ dan mu bio, na Tomas ka hɔn ho. Na Jesus bae, nna mbobow no wɔatotow mu; na obegyinaa hɔn finimfin, na ɔsee dɛ, Asomdwee nka hom! 27Na ɔsee Tomas dɛ, Tsen wo nsatseaba bra ha bɔhwɛ me nsamu, na fa wo nsa bɛka me mfemu, na mma nnyɛ okyingyefo, na mbom yɛ gyedzinyi. 28Tomas buae see no dɛ, M’Ewuradze nye me Nyankopɔn! 29Jesus see no dɛ, Tomas, ɔnam dɛ ehu me ntsi, na egye dzi yi? Nhyira aka hɔn a woennhu me eso wɔagye edzi.

Nwoma Yi no Botae

30Nsɛnkyerɛdze pii so na Jesus yɛe wɔ n’esuafo enyim a wɔnnkyerɛɛw no nwoma yi mu. 31Na wɔakyerɛw iyinom ama hom aagye edzi dɛ Jesus nye Kraest no, Nyankopɔn ne Ba no, na hom gye dzi a, hom eenya nkwa wɔ ne dzin mu.

Currently Selected:

John 20: MFANBRPC

Highlight

Copy