ZAKHARIA 14
14
Obog-obog aruhu sambil Allah in aruhu ibag ane
1 Ninikni Allahn nin ele uruk lit, ”Anden mun ane man ane alem obog toho haloho umbuhuk sambil horog aruhumu hit henenggengge ap seliyonen huhulangge hilahubon arimano hit hiniline fibir amuhup. 2O ino sambil Anden ap o pumbuk obog toho indit-indit werehon palu enebuhukteg o Yerusalem siyahap tuhup ulug mon enebik waruhukmu o ino ilmig taruk lit inibam kuhupteg enenggengge hilaruk lit hiyap siyahap enebuhup. Siyahap enebuhupteg o Yerusalem inap pul ke minggiroho inibam embeselug winon arimano ininggik hele waroho o winama imbisik lahup,” irisi. 3Ari roho tuhupmu Ninikni Allahn indam tog aptuk latfag hag toho ap seliyon arimano men tog abik lahu. 4Tog abik lahu sambil ino Ninikni Allah uyug o Yerusalem yali fil zaitun punumu unduhuk lit weregman punu ino yali filen tulug hubula fil pilang tubusuhumu pul ke tonggo aruhu. Punu fuma fil pilang tubusuhuwon ino ik eleruk fil ilig atikim fuma fil pilang tubusuhuwon ik ambut fil wirig aruhumu 5o pumbuk Ezel horogma tonggo aruhu. Hun Uzia ino Yehuda inap onowe suwon welatfag li o mek suwon turukmu hunumbasi linggik-longgo ibag hag toho hir oho tonggo ino feneyen linggik-longgo uhup.#Ari hag toho uruk ano Punu pilang tubusuhuwon ino nin hebeloho lar aruhu uruk ano. Linggik-longgo urukmu itano Nikni Allah anden wel turuk lahiyon inowen amingmingangge malaikat obog toho hondog eneplug waruhu. 6O itano li o sun atukon men 7hik atukon men mondabi eleg aruhumu hubanggo oho seleg teg eneg laruhu. Ari roho tuhu ane ari ke sambil tuhu ulug Ninikni Allah eneg oluk teg lit wereg. 8#Yeh 47:1; Yoh 7:38; Why 22:1O ino sambil o pumbuk Yerusalem inowen ik aben narukmu onoluk eneg welamuhup ahik wilip aruhu. Ik ino pul ke minggiroho winon yali fil laruk lit ik Il Warehon fam kilaptukmu winon hubula fil wirig atuk lit saho ahik fam kilaptuk laruhu. Hibi fam oho osit fam oho ik ino firig am fug angge larukmen eneg welaruhu. 9Ari roho tuhu sambil Ninikni Allah ap kinang atogman atogma werehon obog toho Inikni suwon in aruhumu ap obog tohowen Ninikni Allah we misig ulug At unuk eneg wel turuk lamuhup. 10O Yehuda kinang atogman atogma o pumbuk Geba famen tulug ik ambut fil o Rimon fam tonggo aruhumu o Yerusalem eneg ketiya wereg hag toho lehoma welaruhu. O Yerusalem elehet walinggoho ohowon sok yali fil werehon unuk Benyamin famen tulug hubula fil sok tamon welatfahon ubalma witfahon unuk Indit tehon fam laruk lit ik eleruk filen o yaron ap yet enesug ambeg hun Hananeel inowen witfahon famen tulug ik ambut fil hele anggur anggen ap suwonen tohon tahanoho pete ruruk ambeg lahu. 11#Why 22:3Ari roho weregma fobik Allahn peruk ane roho ap seliyonen nin hebeloho pin halog toho unusik wamuhup fugmu Yerusalem inap inindi yuwag toho welamuhup. 12Ap seliyon o Yerusalem ilmig tahuk ulug wamuhubon arimano Ninikni Allahn ouk alem angginon unubam monde fik waruhumu unduhuk lit weregman ununu filik atikim inilet enembilikanggenet wo uhup. 13Ari roho turuk lit Ninikni Allahn inindi nonghonga fusuhumu it wal tanehen onori sen enesug lit wat-war atuk lamuhup. 14Wat-war atukmu itano o Yehuda inaben o Yerusalem inap inibil atuk lit it men ambiyeg tog aptuk lamuhup. Tog aptuk lit mun angge man angge ap seliyonen tohon emas men perak men enesum obog toho men huhulangge hilahup. 15Hilahupmu ouk alem angginon Allahn ap seliyon unubam monde fik waruhu ane hikit toho enembohom kuda, bagal, unta, keledai oho wam winon ambiyeg werehon obog toho ununu filik aruhu.
16 #
Im 23:39-43
Ari roho tuhumu ap o Yerusalem siyahap tuhuk ulug wamuhubon Allahn unusurukmu we tor angge onoluk wilip amuhubon arimanowen Ninikni suwon Allah pohol ha kinang ha senehon ubam sembahyang ul ulug mo eke fam eke fam o Yerusalem waharuk lit Israel inap lekman o sabo wiroho nohil laruk latfag ane fahet wenggel haruk sambil enehiyehen Ninikni Allah wel turuk lamuhup. 17Ap o pumbuk ekeyen Ninikni suwon Allah pohol ha kinang ha wel tul ulug o Yerusalem wamuhup fug halug osit enengginangma pilaptukon eleg aruhu. 18Israel inap lekman o sabo wiroho nohil laruk latfag ane fahet wenggel haruk sambil o Mesir inap arimano wamuhup fug halug Ninikni Allahn ap o pumbuk winon wamuhup fuhon unubam tuhu ane hikit toho it enengginangma oho osit pilabik waharuk laruhu fug. 19Ari roho turuk lit Ninikni Allahn Mesir inap o ino sambil wamuhup fuhonet o pumbuk winon wamuhup fuhonet alem angginon unubam umbuhu.
20O itano li wam kuda unuyugmu pinggong hahon ililoho po roho larukon arimano fene ”Ninikni Allah Angge” ulug hahareg laruhu.#Aben wam kuda emberimu lahalug tog aptuk ane ari eleg aruhumu wam arimanowen we Allah fahet yabuk turuk lamuhup. Ninikni Allah ibam wam unu esetuk angge arimano kou fanowon Allah fahet hubu lahaptuk ambeg alukema unduhukon hag toho mondabi fano welamuhup. 21Mondabi fano welamuhup hag toho Yerusalem inaben tohon men Yehuda inaben tohon men kou esetuk angge arimano obog toho Ninikni Allah pohol ha kinang ha senehon anggengge ulug mondabi fano amuhupmu ap sa-o sa-o kou arimano fam wam Allah fahet umbul perukon esetuk lamuhup. O itano li Ninikni Allah pohol ha kinang ha seneg ahun ibamen ayeg waroho hilaruk ane eleg aruhu.
Currently Selected:
ZAKHARIA 14: YLI
Highlight
Share
Copy
Want to have your highlights saved across all your devices? Sign up or sign in
@ LAI 2018
