MALEAKHI 1

1 Ninikni Allahn Israel inap hiyag isaruk laruhun ulug hun Maleakhi fam hiyag utuk latfahon suwesingga aru fam haharoho imbibag.

Allahn Israel hinap nindi henesug lahi ulug hiyag isibag ane

2 # Rm 9:13 # Yes 34:5-17, 63:1-6; Yer 49:7-22; Yeh 25:12-14, 35:1-15; Am 1:11-12; Ob 1:1-14 Ninikni Allahn umalikisi unubam ele uruk lit, ”Anden hit nindi henesug lahi,” urukmu it arimanowen, ”Ninikniyen nangginoho nit indi nenesug?” uruk.

Ari roho urukmu Ninikni Allahn hebeloho hiyag isaruk lit, ”Yakub owe Esau fug? Ot owe wereg angge famen Yakub nalukema emberuk lit 3Esau nambol yig itikik. Tom Esau umalikisiyen tohon siyaha feserikikmu enengginang oho olomene wereg ambeg atisi.

4Esau umalikisi Edom inap arimanowen, ’Ninibam o pumbuk siyag atusa angge famen niren nin wit taruk lamuhuk,’ ulug enele elep halug An Hinikni Allah pohol ha kinang ha seneg lahiyonen, ’Wibuhup angge famen Anden nin halog tubusuhuk,’ ulug hiyag esele. It arimano ununuk ’Allah enembol yig utuk inap’ ulug aben suwal enebuhupteg, ’Edom inap arimano Ninikni Allahn olok ane unubam turukmen eneg wereg,’ ulug enele sahaltuk lamuhup.

5Anden it unubam nolok ane turukmu hit hinilen yet hahupteg, ’Ninikni Allah suwon inowen Israel kinang sel fil werehon oho kim isaruk lit wereg,’ ulug henele uruk lamuhup,” ulug Allahn ele uruk.

Allahn siyahon eneg An nubahet emberuk lahep ulug komo enepfag ane

6 Ninikni Allah pohol ha kinang ha senehon inowen At fahet hubu lahaptuk hinap imam hunubam ele urukon tu, ”Amlohowen ikni ele holtuk, amingminganggeyen ikni fahet akol toho wereg. Hinikni An tu welahi angge famen nungge fahet hiren nele holtuk lahep fug? Hit An namingmingangge welahep angge famen nungge fahet An henekol toho welahep fug? Hiren An nunuk siyahap turuk lahep anggeyen hiren te, ’Nangginoho Hat hunuk siyahap turuk lahe?’ ulug kapal niyaruk lahepma Anden te, 7’Hiren suburu siyahon me nape ruruk hahon An nolohotma emberuk lit An nunuk siyahap turuk lahep,’ ulug hiyag hisaruk lahi angge famen hiren, ’Nangginoho me hapeyap haptuk lahe?’ uruk lahepma Anden te, ’Hiren An nubahet suburu emberuk ambeg wasubag sup tebeseruk hag toho turuk lit me napeyap naptuk lahep,’ uruk lahi. 8#Ul 15:21Hiren te wam inil hupnihon, ouk warukon, unuyug siyahon Allah og utuk lit siyag ane turuk lahe fug peruk lahep. Wam ari hahon honowe henengginang senehon ino og etlepma ahiyeg helepteg fano ane hunubam elep?” ulug Ninikni Allah pohol ha kinang ha senehon inowen komo heneptuk.

9Allah fahet hubu lahaptuk hinap, ketiya Allah ubam, ”Hindi nisimin,” ulug heng turuk lamek! Hiren siyahon eneg og utuk lahepma Aren hebeloho hiyag hisa fug teg. 10Ninikni Allah pohol ha kinang ha senehon inowen ele urukon tu, ”Ap ekeyen sok An Allah nibam kurukon lare feselepma An nubahet saplangge hubu lahaptukon eleg lalep peruk lahi. Anden hit nirim peruk lit An nolohotma emberuk lahebon fahet fano embehesa peruk lahi fug. 11Mo lahik waharuk filen ubuk uruk fil ap obog tohowen An nunuk palimuwap naptuk. Allah wel turuk lamul ulug o kema-kema wam waroho yaltuk lit suburu fanowon oho An nolohotma emberuk. Ap enele wal-wal urukon arimanowen An nunuk suwap turuk angge famen 12hiren An nindi siyahap naptuk lahep. Suburu hiren embeseruk lahebon An og nutuk lit suburu emberuk ambeg wasubag sup tebeseruk hag toho turuk lahep. 13Henele uruk lit, ’Niniyabuk asengseng toho wituk lahe,’ uruk lahebon ariyen An Hinikni pohol ha kinang ha seneg lahiyon nolokap naptuk lahep. Wam yoholiyangge hilaruk lahebon men unuyug siyahon men ouk warukon men Allah og umul ulug walug waharuk lahep. Allah ahiyeg hamisi ulug walug waharuk lahep ano? 14Ap san ambohom sehelimuwon fanowon tu Allah fahet umbuhuk uruk anggeyen wam ino embeselug wam siyahon eke An fahet emberuk ahun ino war amag. An Hinikni suwon pohol ha kinang ha seneg lahiyon ap enele wal-wal urukonen enekol toho wel naptuk nahun inowen nele tu uruk lahi.”

Currently Selected:

MALEAKHI 1: YLI

Highlight

Copy