ZAKHARIA 13
13
Usasum umbusuhup ibag ane
1 Ninikni Allahn nin ele uruk lit, ”O itano li ik eleruk eke wilip aruhumu Dauren endetfahonen ondohowon men o Yerusalem inap menen siyag ane turuk latuson men siyag angge eke hag eke hag unubam tag tehon men ik inowen puhunap eneptuk laruhu. 2O itano li An Hinikni Allah pohol ha kinang ha seneg lahiyonen tu Allah hag toho wereg ulug wel eneptukon ununuk obog toho eleha fusuhukmu ap misihen oho uruk laruhu fug. Ap hime siyahon unubam weregma Allah unuk fam uruk lahi ulug enele si uruk inap arimano oho kinang tu famen elehap enebuhuk. 3Elehap enebuhukmu ap ari hahon fobik in aruhu halug ikni isinga at indag tarusonen at ubam enele uruk lit, ’Haren Ninikni Allah unuk fam uruk lahi ulug hele si ane uruk lahenma war atmihin,’ uhupteg karog fam hak toho ware fusuhup. 4O itano li enele si ane uruk inap arimanowen fulu roho yet haruk lamuhup angge famen ininggaliyen ap hiyag isaruk lamuhup fug. Iren Allah amingmingangge nabi wan turuk asum wan teg lit ap enele ying eneptuk ane umbusuhup. 5Umbusuhupteg it wal tanehen ap hiyag isaruk lit, ’An nabi welahi fug. An nebe totman olma nahun wereg lit suburu yabuk waruk latikik,’ uruk lamuhup. 6Ari roho urukmu ap ekeyen kapal isaruk lit, ’Hat hamigmu hahap kiriring tehon aru nunggeyen huwatisi?’ uruk lamuhup halug#Tu Allah hag toho wereg ulug wel eneptukon enemingminganggeyen enehap ke kiriring til laruk ane fahet ari hag toho kapal isaruk (1Raj 18:28). iren hebeloho hiyag isaruk lit, ’An nare eke ibam larikikmen nuwatusa,’ uruk lamuhup,” irisi.
Karog ap unusurukon fahet ibag ane
7 #
Mat 26:31; Mrk 14:27 Ninikni Allah pohol ha kinang ha senehon inowen nin ele uruk lit, ”Karog Anden tohon, wam domba inikni An niraham werehon ino watmihinen in amin! Ware fesemihin halug ambohom linggik-longgo uhup. Longgo uhupmu Anden unumalik oho siyahap enebuhuk. 8Ari roho tuhukmu kinang atogman atogma ap obog toho war amuhupmu ap hinahan-hinahan sehelimuwon we misig eneg onoluk welamuhup ulug An Hinikni Allahn uruk lahi. 9Onoluk welamuhubon arimano unubabut hal amag ulug melei il yanggowap turuk lit indokma iringguruk hag toho Anden ir oho indok fam wal isahuk. Ari tuhukmu iren An nubam enele urukmu Anden hol isaruk laruhuk. Anden it unubam numalikisi welahep ulug hiyag isarukmu iren hebeloho Allah nit Ninikni wereg uruk lamuhup,” irisi.
Currently Selected:
ZAKHARIA 13: YLI
Highlight
Share
Copy
Want to have your highlights saved across all your devices? Sign up or sign in
@ LAI 2018
