KEJADIAN 48

Yakub inowen Yusuf umalikisi Allah unuk fam hi enepfag ane

1Tot welatfareg aben Yusuf fam hikni ouk waruk ulug hiyag itfagma umalikisi piren Manasye men Efraim men Yakub ambeg libag. 2Yusuf waha urukmu Yakuben hol hibareg nohoruk ambehen in am fug teg anggeyen ine roho in atfareg heriyeg lit 3#Kej 28:13-14Yusuf fam hiyag utuk lit, ”Allah mondabi ineyon ino an Kanaan kinangma o Lus weregma nolohotma inam atisireg nineyap napmin ulug hi naptuk lit, 4’Anden humbusagsi anggolowap tuhukmu o pumbuk humon enele wal taneg urukon welamuhup. Kinang aru iren ngi roho senegman welamuhuben og isahuk,’ ulug hiyag nitisi,” ibareg 5nin eke uruk lit, ”Namloho, humalikisi Efraim men Manasye men an uwan wam fugmu o Mesir tuwen indag atuson itano fahet anden indag tarikikon Ruben men Simeon men hag toho wereg peruk lahi. 6We fobik indag tahunon arimano fahet eneg haren an numalikisi peruk laruhun. An war atuk lit kinang lin tebesuhukon winon Efraim men Manasye menen ngi amuhup halug onotsi fobik indag enebuhunon arimano onowesi welamuhup ambeg heriyeg lamuhup. 7#Kej 35:16-19(Malik itano hisinga Rahel inowen indag netlep hag toho wereg peruk lit ari roho ihi.)#Ibrani enele fam hahatfahon ino seleg teg elehen aben wenggeltuk ane hikit toho emberuk lahe. Nit o Mesopotamian suhuloho waharuk lit o Efrata horogma waharukmen hisinga Rahel ino war atisimu Efrata larukon funggalem iraham sale feserikik,” ulug hiyag itfag. (Efrata uruk latfahon ino ketiya Betlehem uruk.)

8Hiyag itfareg Yusuf umalikisi itano yet isaruk lit, ”Malik aruma sa men sa men?” ulug kapal hibagma 9Yusufen, ”An numalikisi tiya Allahn o Mesir tuwen og nitisiyon,” ulug hiyag itfag.

Hiyag itfagma Yakuben ele uruk lit, ”Anden Allah unuk fam hi enepminen niraham wamag,” ibag. 10Yakub ino mondabi sabal atfareg il hik tehen fano roho yet isa fug angge weregma Yusufen malik itano Yakub iraham og eneplug watfagma Yakuben mako pug toho sen enepfareg 11Yusuf fam ele uruk lit, ”Hat horohole yet hiyahuk fug perikik angge famen Allahn let naptukmu hat humalikisi men yet hisaruk lahi,” ibag. 12Ibagma Yusufen umalikisi Yakub ahoman lisoho og enepfareg ikni olohotma orohole han kinangma sahung atfag.

13-14Sahung atfareg in atuk lit Yusuf inowen Manasye namloho wandabon ulug Yakub inggik pikit fil unduhuk fibareg Efraim fobikon ulug inggik hare fil unduhuk fibag angge famen Yakub inowen inggik pikiron Efraim hare fil welatfahon unggulmu emberuk lit inggik hareyon Manasye inggik pikit fil welatfahon unggulmu imbibag. 15Imbibareg Yusuf umalikisi#Ibrani enele fam Yusuf umalikisi fahet uk fug angge unuk Yusuf eneg hahareg lit wereg. hi eneptuk lit,

”An numbusag Abraham men nikni Ishak menen Allah ele holtuk lit alukema laruk latfag.

Aren wanggi wat nasugmen eneg ketiya oho welahi.

16Alem eke hag eke hag nubam atukmu siyag ale angge famen

Aren ot malaikat ino monde fik waharuk lit windat naptuk latisi.

At inowen malik ariya inineyap eneptuk lamag ulug heng turuk lahi.

An nunuk men Abraham Ishak ununuk men longgo uhu rohon

iren ondohowonen endebuhubon anggolo amuhupteg kinang keleg uhu,” ibag.

17Yakuben inggik pikiron Efraim unggulmu imbibahon yet hibareg Yusuf indi siyag atuk lit nikni inggik pikiron lisoho Manasye unggulmu embemin ulug sene fibareg 18hiyag utuk lit, ”Nikni, ari roho fug! An namloho wandabon tu unggulmu hinggik pikiron embemihin,” ulug hiyag itfag.

19Hiyag itfagma ikniyen ele holmin fug pibareg hiyag utuk lit, ”Namloho, an noluk, hindi anggin ha fug! Manasye umbusagsi anggolo amuhupteg o pumbuk humon welamuhup angge famen ot Efraim ino ine anggolo reg lit aren enderuhuwonen endebuhubon arimano anggolo mondeg lamuhupteg o pumbuk humon enele wal taneg urukon welamuhup,” ulug hiyag itfag.

20 # Ibr 11:21 Hiyag itfareg itano Yakub inowen Yusuf umalikisi itano nin eke hi eneptuk lit, ”Israel inap welamuhubonen ap eke Allah unuk fam hi rimin peruk halug hununuk uruk lit, ’Allahn hun Efraim men Manasye men indi isaruk latfag hag toho har oho indi hasug laruhu,’ uruk lamuhup,” ulug hi enepfag. Ari roho turuk lit Yakub inowen Efraim tamonap turuk lit Manasye fobikonap tibag.

21Ari tibareg Yakub inowen amloho Yusuf fam ele uruk lit, ”An war atuk ane horog tegma yet niyaruk lahen angge famen Allahn hit let heneptuk lit welaruhureg nunumbasi welatfag ambeg o Kanaan suhuloho hunumbahik lahu. 22O Sikhem kinang mondabi fanowon ino anden tog aptuk lit Amori inap ininggikmuwen taluk eneptikik ambeg ino hori og isa fug angge hat og hutuk lahi,” ulug hiyag itfag.

Currently Selected:

KEJADIAN 48: YLI

Highlight

Copy