KEJADIAN 47

Yakub ino Mesir inap inikni ambeg libag ane

1-2Ari ibareg owesi fuwaben hondog eneplug Mesir inap inikni ambeg libareg hiyag utuk lit, ”Nikni ap suwon, an nikni umalikisi menen enembohom domba sapi arimanowet enengge obog tohowet hilalug inibam o Kanaan embeselug waharusareg o Gosyen wereg. It winon o Gosyen weregma nowesi fuwaben ariya eneg hondog eneplug hambeg wahi,” ulug hiyag itfag. 3Hiyag itfagma ap suwon inowen, ”Hiren yabuk nunggeyon turuk lahep?” ulug kapal isibagma iren hiyag utuk lit, ”Niniknisi welatfag hag toho nir oho wam foroho ninap welahe. 4Nit ninibam o Kanaan suburu obok anggolowen hoholangge nenembohom narukon oho eleg atisimu ap pohon hag toho welamuhuken tuma wahe. Ari fahet o Gosyen welamuhuken hiyag nisimin,” ulug heng tibag.

5Heng tibagma ap suwon inowen Yusuf hiyag utuk lit, ”Hat hikni men hori men tuma waharusama 6o Mesir kinang aru anden tohon pemihinteg kinang mondabi fanoma o Gosyen welamuhuben hiyag isamihin. Hori enesehelimuwon enesukun fanowon wereg halug an nambohom fet enesug lamuhuben hiyag isamihin,” ulug hiyag itfag.

7Hiyag itfagma Yusuf inowen ikni Yakub hondohik libareg Mesir inap inikni ambeg watfagma Yakub inowen ap suwon ino Allah unuk fam hi ribag. 8Hi ribagma ap suwonen Yakub fam, ”Hat indag hapfag sali mo maren welahen?” ulug kapal hibagma 9Yakuben hiyag utuk lit, ”An ap pohon hag toho la wam turukmen eneg indag napfag sali mo ilig am wirig am turukmu teng fuwaben 130 atisi. Numbasi ap pohon hag toho wereg lit amusun toho welatfag ane men an siyag toho wereg lit il horog toho welatikik ane men wirim teg eleg,” ulug hiyag itfareg 10Allahn fet hasug laruhu ulug hi ribareg wilip atug libag. 11Libareg weregma Yusufen ap suwonen hiyag itfag ane hikit toho ikni men owesi men Mesir kinangma yug toho welamuhup ulug kinang misig mondabi fanoma o Rameses horogma hiyag isibag. 12Hiyag isibareg Yusufen hundig-hundig ikni men ori unumalikisi suwonet toronet unubahet naruk angge anggolo og isaruk latfag.

Suburu obok welatfag li itano Yusufen turuk latfag ane

13O kema-kema suburu eleg atfagma Mesir inap men Kanaan inap men suburu oboken inine eleg atfag. 14Ari roho wereg lit likiya hupmu roti anggen Yusuf ambeg onggo palik larukmu Yusufen uang arimano walug ap suwon ibam imbik laruk latfag. 15Ari turukmen eneg Mesir inap men Kanaan inap men ininggikmu uang obog toho eleg atfag. Eleg atfagma Mesir inap arimano Yusuf ambeg waharuk lit, ”Uang nininggikmu eleg atisimu war amuhuk tohon naruk angge yuhun og nisaruk laruhun,” ulug hiyag itfag.

16Hiyag itfagma Yusufen hiyag isaruk lit, ”Uang hininggikmu eleg atisi halug henembohom og nirik waharukmu anden naruk angge og hisaruk laruhuk,” ulug hiyag isibag. 17Hiyag isibagma Mesir inaben enembohom kuda, domba, kambing, sapi, keledai arimano Yusuf og irik waharukmu aren ayeg waroho naruk angge og isaruk latfag. Ari turukmen eneg mo ilig atfareg wirig atfagma enembohom arimano obog toho Yusuf inggikmu atfag.

18Inggikmu atfagma Mesir inap arimano Yusuf ambeg watfareg hiyag utuk lit, ”Ninikni, uang nininggikmu eleg atisimu nenembohom oho obog toho hat hinggikmu eneg atisiyon fahet fag toho hiyag hutuk lahe. Ketiya nininggikmu nungge-nungge elehen nenebe men nenengginang men eneg og hum teg lahe. 19Ari fahet nit war amuhukmu niniyabuk fare lahaku rohon nenebe men nenengginang men ninikni ap suwonen tohon amuhuken og utukmu haren ayeg waroho naruk angge og nisaruk laruhun. Nit nonoluk welamuhuken roti anggen og nisimin! Niniyabuk wituk elegma siyag aruhu rohon eiyangge og nisamihin!” ulug heng tibag.

20Heng tibareg weregma suburu obok ino eleg am fug angge werehen Mesir inap obog tohowen naruk angge og nisaruk lamag ulug enengginang wal taneg Yusuf og utuk latfagma Mesir kinang atogman atogma ap suwon angginang atfag. 21Mesir inap enebe oho obog toho ap suwon amingmingangge atfag. 22We Mesir inap unumbasi fahet hubu lahaptuk inap arimano ap suwonen likiya hupmu naruk angge og isarukon enengginang Yusuf og itfag fug. 23Ari turukmu Yusufen Mesir inap arimano hiyag isaruk lit, ”Nori, o yoho henebe men henengginang men ninikni ap suwon anggengge amag ulug og nerehepma anden ayeg waroho eiyangge og hisaruk lahi. Eiyangge og hisaruk lahiyon aru hit wal tanehen yabuhupteg 24anggen paluhup sambil minggiroho palu fuwaben tebelug palu misig ap suwon og utuk lamuhup. Winon hininggareg hunuhe malik menen naruk lit nin ei yag taruk lamuhup,” ulug hiyag isibag.

25Hiyag isibagma iren hiyag utuk lit, ”Ninikni, haren nit war amuhup tohon ulug let nenebehen. Haren fano peruk lahen halug ap suwon amingmingangge amuhuk,” ibag. 26Ari roho turuk latfagma Mesir inaben yabukmu yatuk angge minggiroho winon ap suwon og utuk ane fahet Yusufen kong toho imbibahon ino hikit toho ketiya oho turuk. We Mesir inap unumbasi fahet hubu lahaptuk inap enengginang arimano ap suwon inggikmu atfag fugmu Yusufen kong toho imbibahon ino hikit toho turuk eleg.

Yakub war atukon horog atfagma Yusuf hiyag itfag ane

27Israel inap arimano Mesir kinangma wereg lit o Gosyen ino ngi atfareg weregma enebe anggolo atfag. 28Yakub ino o Mesir weregman mo ilig am wirig am turukmu nanggolop fiman 17 atfagma ebe mondabi sabal 140 tahun teg lit 29#Kej 49:29-32, 50:6war atukon horog atfagma amloho Yusuf wol tibareg hiyag utuk lit, ”Haren an fahet hindi nasug lahen halug hat hinggik an nuyug honggoleg ke kila femihinteg an nindimuwen wenggel haruk lahi ane hikit toho tuhunen hele tik-tem toho imihinon tu, ’Nikni, hat war aruhunmu Mesir kinang tu fam sal habuhuk fug. 30Humbasi sal enepfag ambeg har oho sal habuhuken hebe wareg angge og haplug lahuk,’ imihin,” ulug hiyag itfag.

Hiyag itfagma Yusufen, ”Haren ehen ane hikit toho tuhuk,” ibagma 31Yakuben, ”Tik-tem toho tuhuk imihin,” ibag. Ibagma Yusufen we tik-tem toho tuhuk ulug sali imbibagma Yakub inowen nohoruk ambehen Allah wel tibag.

Currently Selected:

KEJADIAN 47: YLI

Highlight

Copy