KEJADIAN 49

Yakuben ele fotog toho umalikisi hiyag isibag ane

1Welatfareg Yakub inowen umalikisi wol enepfareg hiyag isaruk lit, ”Numalikisi, fobik hunubam atuk laruhu ane fahet hiyag hisaminen palu arik maniyek!

2An Yakub numalikisi welahebon,

an hinikni Israelen nele iminon holtihiben maniyek!

3Ruben namloho, hat wandabon,

an nebe kabini reg lit indag haptikikon nahaluwe tamon welahen.

Hat hebe hine reg lit palimu welahen angge famen

4ik il kililoho larukon hag toho wereg lit

anden nuheyap tarikik hiyap men nohoruk lit an nibalma siyahap tirikinmu

hat tamon hag toho welaruhun fug.

5Hit Simeon men Lewi men ot owe welahebonen

sehen seneg lit honolok ane eneg turuk lahep.

6Hiren nenele sahaltul ulug palu ruruk lahep ambeg laruk lahi fug.

Hit hinindimu ahe laharuken ap unusuruk lit

yuhun angge wam sapi unuyug siyahap tebeseruk latikip.

7Ap hinindi isa fug angge honolok ane unubam turuk latikibon fahet hit siyag amok!

Anden Israel inap eneseheli ke linggik-longgo hunubahakuk.

8Yehuda, haren ap seliyon enenduhunmu sen enesug lahenon fahet

horiyen onorohole han halukeman sahung atuk lit wel haptuk lamuhup.

9 # Bil 24:9; Why 5:5 Olomene olokon singa kabiniyonen pak waroho nalug ibam watug ying atuk lit nohoruk hag toho

hat weregma ap misihen oho elel habuk fug teg laruhu.

10Haren ap suwon rajan seneg uwanggun seneg laruhunmu

haren ondohowonen endebuhubonen oho senegman eneg

at hat palimu werehon ino waruhumu

ap o pumbuk obog tohowen

ele holtuk lamuhup.

11At ino waruhumu mun angge man angge anggolo werehen

ambohom keledai hele anggur anggen yihikon uwag fam ilili feruk laruhu.

At inowen anggur ahaluwe fam asum umag taruk laruhu.

12Anggur ahaluwe anggolo naruken ilanggen wirik teg lit umbagpag turuk laruhu.

Sapi ag humu eneg naruk lit

ayeg fano roho yanggo reg eneg laruhu.

13Zebulon, hat ik saho ahik ayegma welaruhun ambeg kou ik ahum pali ke larukon kuk wilip am turuk lamuhup.

Hat hangginang yat toho o Sidon fam hili wareg laruhu.

14Isakhar, wam keledai sum angginon ha rulug laruk lit

kel tamin ulug nohoruk hag toho hat welaruhun.

15O ino mondabi fano rehen kel tamin puhun angge re

aben mingming haptukmu sum angginon ha rulug larukmen eneg hambol simbuk aruhu.

16Dan, hat humalikisi arimano Israel inap sehelimu wereg lit ununggul unuk misig enemu welamuhupmu

haren alem unubam weregma fano roho haltuk laruhun.

17Pisanggo olokonen kalemma sap teg lit wam kuda uyug anggulmu fato rurukmu

ap kuda fam lahalug larukon ino ambol han mako wamburuk hag toho

haren ap seliyon apmayap eneptuk laruhun.

18 Nikni Allah, Haren windat nabuhun ulug nangno hasug lahi.

19Gad, hanggengge hirag tul ulug aben hat huwabuk oho waharukmu

haren hebeloho unusimin ulug yanggal eneptuk laruhun.

20Asyer, hat hiyabukmu yatuk laruhun angge arimano fano-fano angge anggolo werehen

ap suwon raja unubaher oho fanowon eneko emberuk laruhun.

21Naftali, hat wam rusa farema yuhun angge larukon hag toho wereg lit

hele fano roho uruk ane holuk teg laruhun.

22Yusuf, hele anggur ik elerukmu yatukmu wilip atuk lit

inggiken helep lehet hililip turuk hag toho welaruhun.#Emberuk laheyon hikit toho uruk ano, wam keledai ik eleruk keyen tom alem ke larukon uruk ano.

23Ap seliyonen hat huwabul ulug mug hiyaruk lit

tog fam sele haptuk lamuhup angge famen

24hat hindi yuwag toho wereg lit hinggik fano rehen fuki roho tog fam unusuruk laruhun.

An Yakub Nikni Allah ineyon helep owik hag toho wereg lit

Israel ninap wanggi wat nenesuhon inowen hat hineyap haptuk laruhu.

25Allah mondabi ineyon an hikniyen wel turuk lahiyon inowen hat let haptuk lit

osit poholman pilap hirik waharuk lit

kinang apman ik lahap hirik waharuk laruhu.

Malik men wam men anggolo og hutuk laruhu.

26Tom wal tilmu werehap tibahon arimano yat toho laharuk angge famen

an Nikni Allahn og hutuk laruhu angge arimano anggolo rehen

tom arimano men wirim teg laruhu fug.

Hori enesehelimuwen hat hamu eneg Allahn mumal hasuhon welahenma

Aren og hitmin perukon arimano hat hubam eneg atuk laruhu.

27Benyamin, hat olomene olokon hag toho wereg lit

ilingge ap unusuruk lit

enengge huhul warukon arimano hubanggo fibir eneptuk laruhun,” ibag.

28Obog toho ibag ane ari it enebe nisanggowen wal tanehen ondohowonen endebuhubon unubam teko laruk laruhu ane fahet hiyag isibareg Allah unuk fam hi enepfag.

Yakub war atfagma o Kanaan salik libag ane

29-30 # Kej 23:3-20 Hi enepfareg Yakuben umalikisi hiyag isaruk lit, ”Niknisi tam larusama onombolim lamin halug it iniraham Kanaan kinangma o Mamre yali fil Makhpela owikmu sal nabik lahup. Owik ino men kinang walinggoho werehon men fahet Abraham inowen Het ahun Efron fam onggo palfareg ngi atfag ambeg ino 31#Kej 25:9-10, 35:29uhe Sara men inggareg men amloho Ishak men uhe Ribka men sal enepfag. It iniraham anden Lea oho saltikik. 32Kinang numbusahen onggo palfag ambeg ino an oho sal nabik lahup,” ulug hiyag isibareg 33#Kis 7:15ying atuk lit war atfareg umbasi men mangno atfag.

Currently Selected:

KEJADIAN 49: YLI

Highlight

Copy