KELUARAN 20

Allahn wene alem numen Musa hiyag itfag ane

(Ul 5:1-21)

1 # Ul 5:1-21 Hiyag isibagma Allahn ele uruk lit, 2”Allah Hinikni hit o Mesir inaben enemingminganggeyap heneptukmu hondog heneplug wilip atikikon An tu welahi.

3Aben wel turuk angge winon wel enebuk fug angge we An nubam eneg wenggel niyaruk laruhun.#Allahn Musa feneyen Israel inap obog toho unubam ele hiyag isaruk latfag angge famen ap wal tanehen an nubam hiyag nutukmu an ninggarehen ari hikit toho turuk laruhuk pukag ulug ap misig ubam hiyag utuk hag toho hiyag isaruk latfag.

4 # Kel 34:17; Im 26:1; Ul 4:15-18 Poholma kinangma ikma#Ikma urukon ino Ibrani enele fam ik kinang apma yenggelehon fahet uruk. wereg angge wirim toho hinggiken lale ferukon fahet, ’Tu Allah hag toho wereg,’ ulug wirim tuk fug. 5#Kel 34:6-7; Bil 14:18; Ul 7:9-10An Hinikni Allah men mun angge man angge kinangma werehon men wirim naptukon fahet nirim peruk lahireg hinggiken laltuk angge wel eneptuk laruhun fug. An enembol yig nutuk inap arimano unumalikisi men unumbusagsi men unumbasi men Anden alem angginon unubam emberuk laruhuk. 6Aben An inindi nasug lit nele holtuk inap arimano Anden hebeloho nindi enesugmen eneg it arimanowen endebuhubonen endebuhubon arimanowen endetil lahubon oho let eneptuk laruhuk.

7 # Im 19:12 An nunuk saplangge uruk laruhun fug. Aben An Hinikni Allah nunuk saplangge urukon arimano Anden alem angginon unubam emberuk laruhuk.

8 # Kej 2:1-3; Kel 16:23-30, 31:12-17, 35:2; Im 23:3 O sabir angge Sabat An wel naptuk sambil fahet hindi holuk toho welaruhun. 9O falfalikenam o yabuk wituk laruhun. 10O sabir angge kel taruk lit An fahet wenggel niyaruk laruhun. O ino sambil hat humalikisi men hamingmingangge men hambohom oho ap pohon hat hibam werehon oho mun angge man angge wituk lamuhup fug. 11An Hinikni Allahn o falfalikenam pohol kinang ik mun angge man angge werehon obog toho wal tibiyareg o sabir angge kel tarik iyag. Ari fahet o sabir angge An wel naptuk lamuhup inap arimano Anden nindi enesug laruhuk ulug o Sabat ino usayap tiyag.

12 # Mat 19:18-19; Mrk 10:19; Luk 18:20 # Mat 15:4; Mrk 7:10; Ef 6:2-3 Hikni hisinga enele holtuk lit let eneptuk laruhun! Ari turuk laruhun halug hat fano wereg lit amusun toho kinang Anden og hisahukon fam weregman eneg sabal atuk laruhun.

13 # Kej 9:6; Mat 5:21 # Rm 13:9; Yak 2:11 Ap hiyap unusuruk laruhun fug.

14 # Mat 5:27 Hat ap welahenonen ap unuhesi hilaruk laruhun fug, hat hiyap welahenonen oho ap winon hilaruk laruhun fug.

15 # Im 19:11; Rm 13:9 Aben tohon yoholiyangge hilaruk laruhun fug.

16 # Kel 23:1-3 Hilen fum toho isa fug angge hori fahet un ane uruk laruhun fug.

17 # Rm 7:7, 13:9 Ap inibam, unuhesi, enemingmingangge, enembohom sapi men keledai men, ap enenggengge winon oho hilik ulug hilaruk laruhun fug,” ulug Allahn ibag.

Allah wambik watfahon fahet Israel inap enekol hibag ane

(Ul 5:22-33)

18 # Ibr 12:18-19 # Ul 5:22-31 Pinel lebeglu ruruk lit ululu sipuk turukmu waruk ele tung tirikim Israel inaben hol haruk lit tom ino famen hubu laharukmu yet hibareg enekolen unuwag elek turuk lit hikip toho yatma in arik laruk latfag. 19In arik libareg Musa fam enele uruk lit, ”Allah ele nit nunubam urukmu war amuhuk tohon haren eneg hele nit hiyag nisarukmu holtuk lamuhuk,” ibag.

20Ibagma Musa inowen, ”Henekol ha fug! Iren An fahet enekol toho wereg lit siyag ane turuk lamuhup tohon wal isamin ulug Allah nenembeg waha,” ibag. 21Ari ibag angge famen ap arimano yat ke unduhuk lit weregma we Musa amu eneg Allah hina anggulog hahon sehelimu wereg ambeg iraham libag.

Allah wene urukon fahet imbibag ane

22 Ninikni Allahn Musa fam ele uruk lit, ”Israel inap hiyag isamihinon tu: Anden poholman hit hunubam nele urukmu holehep. 23Ari fahet ili ruruk angge perak emas fam laltukon fahet, ’Tu Allah hag toho wereg,’ ulug wel tuk fug angge we An nubam eneg wenggel niyaruk lamuhup. 24An fahet hubu lahaptuk ambeg ulug kinang lahabil laharuk lamuhup ambeg emberimu wam domba men sapi men waroho esetuk lit winon Allah men nininggik ahandip toho welamuhuken enehangge umbul ulug indokma yaltuk lamuhup. Anden hiyag hisahuk ambeg obog tohowen An nunuk wel naptuk lamuhupmu An henembeg waharuk lit hinineyap heneptuk laruhuk. 25#Ul 27:5-6; Yos 8:31Hubu lahaptuk ambeg ulug helep sengget wabul puhup halug helep arimano ine angge besi fam fele ruk fug. Helep besi fam fele ruruk lit halog turukon arimano An wel naptuk ane men wirim teg elehen we helep fele ruruk elehon oko sengget watuk lamuhup. 26An namingmingangge imam inowen hubu lahapmin ulug hubu lahaptuk ambeg yat tehen yal fene laharukmu inggaliyangge aben yet hahup tohon ulug kinang ano helep ano yat toho lahabil laharuk lamuhup fug,” ulug hiyag isibag.

Currently Selected:

KELUARAN 20: YLI

Highlight

Copy