KELUARAN 21

Ap enemingmingangge fahet ibag ane

(Ul 15:12-18)

1 # Ul 15:12-18 Nin Allahn Musa fam ele uruk lit, ”Tuk teg ane men tuk fug teg ane men fahet Israel inap hiyag isamihinon tu: 2#Im 25:39-46Ap ekeyen are Ibrani ahun eke ayeg waroho amingminganggeyap tahu halug amingmingangge inowen yabuk wit utukmen eneg mo ilig am wirig am turuk lit falfalikenam lahumu mo sabiron fam ikniyen saplangge lole fuhu. 3At uhe ohoma amingminganggeyap tuhu halug fobik at uhe men ambiyeg lol enebuhu. Uhe elegma amingminganggeyap tuhu halug fobik at amu eneg lole fuhu. 4Ikniyen uhe og uruhumu uheyen malik enderuhu halug fobik amingmingangge ino amu lole feruk lit uhe umalikisi men inikniyen ngi reg ulug lol enebuhu fug. 5Amingmingangge inowen ele uruk lit, ’An we tem toho nikni men nuhe numalikisi nindi enesug lahireg wilip aruhuk fug,’ uhu halug 6ikniyen nanggengge welaruhuwen Allah olohotman enehangge embemin ulug amingmingangge ino sokolma unduhuk feruk lit isanggo hein fam fo ruhumu ikni fahet yabuk witukmen eneg sabal aruhu.

7Israel ahun ekeyen nahaloho ap amingmingangge welaruhu ulug ap fam ayeg waroho og uruhu halug fobik ap umalik loloho wilip atuk hag toho at loloho wilip aruhu fug. 8Ap inowen amingmingangge hiyap ino nuheyap tahuk ulug hilaruk angge famen fobik nirimen embesimin puhu halug ap inowen hiyap tu hilahuk ulug tam sali emberukon ino pisan isaruk lit hiyap ino ap pohon fam ayeg waroho og um fug angge ikni isinga menen nin hebeloho ayeg waroho hilahup ano ulug kapal isahu. 9Ap inowen hiyap amingmingangge ino amloho uhe welaruhuwen og uruhu halug hiyap aru nahaloho hag toho wereg ulug umalikisi unubam tuk teg ane hikit toho ubam turuk laruhu. 10Ap inowen amingmingangge hiyap angge ino hilalug hiyap eke hilahu halug ahun ekeyen uhe fam tuk teg ane obog toho uhe tamon fam turuk lit suburu men sum wan turukon men tam og utuk latisi hag toho og utuk laruhu. 11Ap inowen uhe tamon fam ari hag toho turuk laruhu fug halug amingmingangge og taluhon ino saplangge loloho wilip aruhu,” ibag.

Ap unusulug larukon ili og eneptuk ambeg fahet ibag ane

12 # Im 24:17 Allahn Musa fam ele uruk lit, ”Ap san ap eke watukmu war aruhu halug ap ino ware fusuhup. 13#Bil 35:10-34; Ul 19:1-13; Yos 20:1-9Ap ino indimuwen pinggi watmin puk fug anggeyen inggiken kik harukmu Allahn peruk ane roho war aruhu halug ap ware feselug lahuwon ino nuwabuhup tohon ulug Anden hiyag hisahuk ambeg lahumu ili waruk lamuhup. 14Ap inowen indi oloken pinggi watmin ulug are Israel ahun misig ware fusuhureg ili og nabusa ulug An nibam hubu lahaptuk ambeg lahu halug hiren ap ino inggik lisoho wilibuhupteg ware fusuhup.

15Ikni isinga inggik fam unusuruk ahun ino war aruhu.

16 # Ul 24:7 Ap san ap eke inggik lisoho wahureg an namingmingangge welaruhu ano, ap fam ayeg waroho og uruhuk ano peruk ahun ino war aruhu.

17 # Im 20:9; Mat 15:4; Mrk 7:10 Ikni isinga huluwap eneptuk ahun ino war aruhu.

18Ap san are men yik aptuk lit inggik fam ano helep fam ano watukmu are war am hag teg lit olma nohorukmen eneg 19tot ine aruhureg olman wilip atug wanggun tomuk toho lahu halug at ware feserukon ino unggum ubam umbuhup fug angge famen are yabuk wibuk fug teg li onggo og utuk lit let turukmen eneg are ino fano aruhu.

20Ap san amingmingangge ap angge ano hiyap angge ano e fam watuk li itano war atuk halug unggum ubam umbuhup. 21Amingmingangge e fam watukon ino hup misig ano piren ano welatug war aruhu halug ikni ubam unggum embelep angge famen at anggengge siyag atisi ulug ikni ubam unggum umbuhup fug.

22Ap misihen ap eke men yik aptukmu hiyap malik ahummu fet taluhon iniraham weregman wabuhupmu hiyap ino fano welaruhu angge famen umalik ahummuwen hog tuhu halug hiyap ino ahunen onggo og nuruhun ulug heng tuhu. Heng tuhuwon fahet alem haloho emberuk inaben oho fano puhup halug malik ino siyahap tirisi ahunen hiyap ino ahunen heng tuhu ane hikit toho onggo og uruhu. 23Ap itanowen yik aptuk lit hiyap malik ahummu fet taluhon ino mep toho wabuhup halug at waruhu ahun ino hebeloho watuk lit hiyap ino waruhu ane hikit toho ubam emberuk lamuhubon tu: War atukon fahet war atukon wirim tuk teg, 24#Im 24:19-20; Ul 19:21; Mat 5:38il siyag atukon fahet il siyag atukon wirim tuk teg, ayeg fahet ayeg wirim tuk teg, inggik fahet inggik wirim tuk teg, uyug fahet uyug wirim tuk teg, 25indoken ahap paltukon fahet indoken ahap paltukon wirim tuk teg, yowilangge fahet yowilangge wirim tuk teg, tog sinat watukon fahet tog sinat watukon wirim tuk teg.

26Ap misihen amingmingangge ap angge ano hiyap angge ano il watukmu il hupnig aruhu halug ikniyen il siyahap tuhuwon fahet ayeg waroho amingmingangge ino lole fuhu. 27Ap inowen amingmingangge ap angge ano hiyap angge ano watuk lit ayeg langgo fesehu halug ikniyen ayeg langgo fusuhuwon fahet ayeg waroho amingmingangge ino lole fuhu.

28Wam sapi misihen ap eke watukmu war aruhu halug wam ino helep fam ware fusuhup angge famen wam ikni ubam unggum umbuhup fug. Wam ware fusuhubon ino naruk lamuhup fug. 29Wam sapi inowen indamen oho ap watukmen eneg weregma aben yet haruk lit ikni fam hambohom inowen ap unusuhu rohon ulug fano roho foroho laruhun ulug komo ruruk lamuhup angge famen wam ikniyen holuk fug angge wam ino fano foroho elegman wam inowen ap ano hiyap ano ware fesehu halug wam ino helep fam ware feseruk lit ikni oho ware fusuhup. 30Wam ikni oho ware feselep angge famen oluk welaruhuwen onggo og nisawag ulug heng tuhup halug wam ikni fam heng tuhup ane hikit toho onggo og isahu. 31Ari hag toho wam sapi inowen ap umalik ano hilani umalik ano watuk halug Allahn wam ap hiyap enebe suwon unusurukon fahet emberuk ane hikit toho wam ino men ikni men unubam turuk lamuhup. 32Wam inowen ap amingmingangge ap angge ano hiyap angge ano watuk halug wam ikni inowen amingmingangge ikni fam ayeg waroho uang perak teng misigmen nubam hilag hinahan og uruhumu ambohom sapi ino helep fam ware fusuhup.

33Ap misihen ik fahet kinang habulig ambeg abilit labuk fug angge larukmu wam sapi ano keledai ano kinang habulig ambeg inowen mako wamburuk halug 34kinang habultuk ahunen wam ikni uang og utuk lit wam wareg angge ino at hilaruk laruhu. 35Wam sapi misihen ap eke ambohom watukmu wam ino war aruhu halug wam oluk werehon ino ikniyen ap fam ayeg waruhureg uang og umuhubon minggiroho wam war aruhuwon ikni og uruhu. Og utuk lit wam war aruhuwon ino it pirenen huwisoho naruk lamuhup. 36Wam sapi inowen olok ane turukmu ikniyen yet hahu angge famen fano roho foroho laruhu fugmu ambohom inowen ap eke ambohom ware fesehu halug wam oluk werehon ikniyen wam war aruhuwon ikni ayeg waroho wam sapi eke og utuk lit wam war aruhuwon ino at hilaruk laruhu,” ulug hiyag itfag.

Currently Selected:

KELUARAN 21: YLI

Highlight

Copy