YUHANI 17

I Miri Yehu na-hamaya-nja tungguda da papanau-na

1Ba nahàla-ka papanii tuna nu, tangara-nanyaka la awangu i Yehu hi napanii, “Ou Ama, toma-nanyaka na rehina. Pa-mangunju-yawa na Anamu, ka na-pamangunju-kau Nyumu paraïna Anamu. 2Mbàda wua-munyaka kawaha la nggubulu tau pinu tana na Anamu, ka peku wua-nanya na luri na ma-langatàka dàngu na ma-palupangu la mbuu ndàbana na tau na pawua-munya Nyuna. 3Yiana-ya na luri na ma-langatàka dàngu na ma-palupangu; ka datanda-kau tau, ba Ala mangu didingu-kau dàngu ma-langatàka-kau dàngu ka datanda-ya i Yehu Karitu na pambàda palewa-mu. 4Mbàda pa-mangunju-nggunggauka Ama la pinu tana yiana ba kuwàngu pa-palundu-nya na paràma pa-panduma-mungga. 5Ou Ama! Pa-mangunju-kawa nàhu la lihimu Nyumu, hama tuna na mangunju-manda duta ba ningga la lihimu ba ndedi padika-nya na pinu tana.

6Mbàda peka-nggunggauka la tau pinu tana da pambàda wua-mungga, ka datanda-kau ba wànggu. Mangumu Nyumu-maha dumu Ama, hi mbàda wua-munggaha Nyungga. Mbàda kiku-danyaka na pulumu. 7Nàhu pi-danyaka ba ma-pawelingu lai Nyumuha mbuu ndàbada da pawua-mungga. 8Mbàda patàka-nggunjaka lai nyuda da pulungu da pawua-mungga; dàngu mbàda kataku-dahaka. Dapi hàmu-manya ba ma-langatàka-maya namainggu welingu lai Nyumu dàngu mbàda pawai-madaka ba Nyumu ma-palewa-ka.

9Ku-hamaya-nja ndumada nyuda. Nda ku-hamaya-anya ndumana na pinu tana, tàka ndumada nyuda-a duda nu da tau da pambàda wua-mungga, maa ba mangumu Nyumu-maha dumu. 10Mbuu ndàbada da mangunggu Nyungga, mangumu Nyumu-mbuha Ama; tàka mbuu ndàbada da mangumu Nyumu, mangunggu Nyungga-mbuha. Tàka hi pa-mangunju-ka lai nyuda. 11Nàhu ka kubeli lai Ama wàngguka. Nda ku-ndàdiku-apa la pinu tana; tàka nyuda ninjapa la pinu tana. Ou Ama ma-matua! Mangga-njawa wàngu mbihana na tamumu, nu na tamu na pambàda wua-mungga#Mangga-njawa ... na tamumu, nu na tamu na pambàda wua-mungga; Da lawiti ndai da manda pirada: Wànya na mbihana na tamumu Ama, mangga-njawa nyuda da pambàda wua-mungga Ama. – ka peku mbulungu-da hama tuna ba ta-mbulungu nyuta. 12Ba ninggapa la pahiku-da, mbàda mangga-manggu-njaka wàngu mbihana na tamumu Ama – na tamu na pambàda wua-mungga.#mbàda mangga ... na tamu na pambàda wua-mungga; Da lawiti ndai da manda pirada: Wànya na mbihana na tamumu Ama, mbàda mangga-manggu-njaka duku nyuda da pambàda wua-mungga Ama. Mbàda mangga-manggu-njaka hi nda haàtu-a ma-mbulangu welingu lai nyuda, hinggilu-na nyuna duna nu na maràka-mana la pa-mbulangu; nu ba tuna nu ka na-hàrangu wàngu na pa-tulihu la Huratu Matua. 13Nàhu ka kubeli lai Ama wàngguka. Hi kupanii-ha yiada mbuu ndàbada ba ni-inggapa la pinu tana; ka peku hulungu-na daa la etida na pàda-danya na hawola-nggu Nyungga, wànggu. 14Mbàda patàka-nggunyaka duku na pulumu lai nyuda, hi na-karaü-nja eti paraï pinu tana, maa ba nda mangu pinu tana duha, hama tuna Nyunggambu ba nda mangu pinu tanaka. 15Ka napiti-ha welingu la pinu tana yiana paraïna i Ama nda wànggua pakarai-nggu, tàka ka namangga-nja lai Ma-akatu paraïna i Ama wànggu duku pakarai-nggu. 16Hama tuna Nyungga ba nda mangu pinu tanaka, tuna numbu nyuda ba nda mangu pinu tanaha. 17Panjadi-hawa mangumu pa-pahinggilu-mu la ma-padeningu; na pulumu Ama ma-padeningu-ya. 18Hama tuna ba mbàda palewa-munggaka la pinu tana tuna numbu Nyungga ba ku-palewa-ha la pinu tana. 19Lumuda nyuda ku-huharungu wikinggu ka mangu pa-pahinggilu-mungga Ama, ka peku-mbuna nyuda ba mangu pa-pahinggilu-munja la ma-padeningu.

20Nda didi meha-aha nyuda da pa-hamaya-nggu ndumada. Ku-hamaya mbunja ndumada da tau mapawai lai Nyungga rukuna na-hakahii-dangga yiada da papanau-nggu. 21Ku-kamahi-nggau ou Ama, màtawa ka da-mbulungu nyuda mbuu ndàbada, hama tuna Nyumu bau mbulungu dàngu Nyungga, hamanai Nyungga ba ku-mbulungu dàngu Nyumu. Màta àruki nyuda ka da-mbulungu dàngu Nyuta, ka peku pawaina na pinu tana ba Nyumu ma-palewa-ka. 22Mbàda wua-nggunjaka nyuda na pa-mangunju wàngu na pawua-mungga ka peku mbulungu-da nyuda, hama tuna Nyuta ba ta-mbulungu; 23Nyungga lai nyudaka, tàka Nyumu lai Nyunggaka; ka peku nyangana na mbulungu-da. Ka peku pinanya pinu tana ba Nyumuma ma-palewa-ka Nyungga, dàngu bau mbuhanja nyuda hama tuna bau mbuhangga Nyungga.

24Ou Ama, yiana-ya duku na parinju-nggu, màtawa nyuda nu da pawua-mungga ka ninja la ngia paningga Nyungga la lihinggu wànggu, ka peku ita-danya na mangunju-nggu; nu na mangunju pawua-mungga, maa bau mbuha-dungga ba ndedi padika-nya na pinu tana. 25Ou Ama mamola! Na pinu tana nda natanda-akau, tàka Nyungga duku kutanda-makau; dàngu da tau yiada da pingga ba Nyumu ma-palewa-ka. 26Mbàda peka-nggunyaka na tamumu Ama lai nyuda; dàngu tu mànu-manggu nu napa ba kuhili pekaya, màtawa nambuha-mungga Nyungga ka peku pa-daingu-na daa la etida, tàka Nyungga duku hi ku-pambulu dànja nyuda,” wàna.

Currently Selected:

YUHANI 17: KAM

Highlight

Copy