YUHANI 16

1Kupanii ndàba-nggaiha nuda keha ka àmbu da-kandulingu wànggunggai. 2Napa da-jukaru-nggai welingu la uma bunggu - uma bungguru. Napa nàmunya na rehi, na tau na ma-pameti-kai nyimi, pa-tundungu-nggunya lai Ala, wàna. 3Hi tudanggai nu, jiaya ba nda datanda-ya i Ama hamanai Nyunggambu nda datanda-aka. 4Tàka nàhu hi kupanii-nggai, màta jàka nanjadi-ka napa, ka peku namu-minya ba mbàda panii-nggunyaka nuna lai nyimi,” wànanja.

Na paràma-na na Ngahuna i Ala

Hi nda kupanii haha-nggaiha yiada la pakiri-na, maa ba ni-dunggapa la pahiku-mi. 5Tàka nàhu beli-nggunyaka duku napa la Ma-palewa-ka; dàngu nda haàtu-a la hongami ma-paàrangu jàka nggi kulaku ningu. 6Tàka nàhu hi hawina wàngu bia-nanyai na etimi, ba kupanii-nggainya nuna. 7Tàka ma-padeningu-maya nàhu na papanii-nggunggai: Nahàmu-mapa duna ndumami nyimi, jàka kulaku; nadu jàka nda kulaku, nda jia mai-ana napa i Ma-pandulangu lai nyimi. Na nyuna jàka kulaku-ka, napa ku-palewa-ya lai nyimi. 8Jàka namai-yaka, napa na-paloha-nya na pinu tana nggàraya duna na njala, nggàraya duna na pa-deningu, dàngu nggàraya duna na hukungu welingu lai Ala. 9Napa na-paloha-nya jàka nda papawai lai Nyungga ba manjala-ya; 10dàngu ba ku-padeningu Nyungga, nadu ba laku-nggunya lai Ama tàka hi ndai hili itaka; 11dàngu ba pa-kiringu-nanyaka i Ala pa-hukungu, nadu ba mbàda huku-nanyaka na makata-nya yiana na pinu tana.

12Dadangu-mapa duna làti da pa-paningu-ha ba wànggunggai, na nyuna ba tuna, ndedia nàhu na-turuku-kai. 13Na nyuna jàka namaika i Ngahu, nu na ma-paloha-nya na ma-padeningu rukuna i Ala, napa nairu ngàndikai la patanda ndàbaya na ma-padeningu. Nda jia wàngu eti wiki-ana papanii, tàka jiaya na parongu-na duna na papanii-na, dàngu napeka-nggainya napa jàka nggàraya na manjadi la lodu malamiri. 14Napa Nyuna na-pamangunju-ka Nyungga, nadu na pangala-na welingu lai Nyungga jia-maya na pa-patàka-na lai nyimi. 15Mbuu ndàbada da maninja lai Ama mangunggu Nyunggaha. Tuna nuduka hi kiri panii-nggunggai, jàka nggàraya na pa-patàka-na i Ngahu lai nyimi, pangala-na welingu lai Nyunggaya hi wànggu.

Na handuka dàngu na hawola

16“Ndedi mbàdiku-anapa ba ndai hili itaka napa, dàngu ndedi mbàdiku-mbunapa napa bai hili ita belika,” wànanja.

17Ninja hawiangu da papanau-na i Yehu da ma-paàrangu dàngga anguda, “Nggàraya ihu na pawuku-na ba napanii-nda: ‘Ndedi mbàdiku-anapa ba ndai hili itaka napa, dàngu ndedi mbàdiku mbunapa napa bai hili ita belika,’ ba wàna? Hili nggàrayai na pawuku-na, ‘Laku-nggunya lai Ama,’ ba wàna?” wàda. 18Paàra pangalangu-madanya, “Nggàraya ihu, ‘ndedi mbàdiku-anapa,’ ba wàna? ‘Nda ta-jàngapu-aya jàka nggàra rukuya na papanii-na,’ wàda.”

19Ba pi-mananya paraïna i Yehu ka ta-paàra-nya ba wàda, “Nu ka panii-nanyaka, ‘Ndedi mbàdiku-anapa ba ndai hili itaka napa, dàngu ndedi mbàdiku mbunapa napa bai hili ita belika,’ wànggu ni kawai ka jiaya nuna bia nu na pa-paàra wàmi dua wikimi?

20Langatàka-ma ka kupeka-nggai, napa nyimii hii dàngui pa-dudurungu, tàka na pinu tana hawola-nanyaka duna. Napa nyimii handuka, na nyuna nu na handuka-mi napa na-pambeli-ya hawola. 21Jàka mareni habola-nanyaka na haàtu kawini, handuka-nanyaka, maa ba rehi-nanyaka na-mayila-na. Na nyuna wàha ba wànaka na anana, ailulu maromba-madua-nanyaka na mayila-na paraï pa-hawola ruku dedina na haàtu ana rara la pinu tana. 22Tuna numbu nyimi: Nàhu ninggai la handuka, na nyuna napa kuhili tàbuku-kai, hi ninggai napa la mbaha eti; dàngu nda jia haàtu-a ma-ngalangu papiti-ya nu na mbaha etimi.

23La lodu nu, nda nggàra-apa pa-paàra-mingga. Langatàka-ma ka kupeka-nggai: Nggàra biaya na pakarai wàminya na tamunggu lai Ama, nawua-manggainya duna.#Nggàra biaya na pakarai wàminya na tamunggu lai Ama, nawua-manggainya duna; Da lawiti ndai da manda pirada: Jàka ningu pakarai-mi lai Ama, napa nawua-nggainya la tamunggu. 24Lundu nàhu ndedi nggàra-a pakarai wàminya na tamunggu. Ba tuna ikaraiwa, napa ingalangu-ma duna, ka na-lànyapu na hawola-mi,” wànanja.

Na ngera taluya na pinu tana

25“Mbuu ndàbada yiada kupanii wànggai pangerangu. Na nyuna ninya napa na rehina, ba nda kuwàngu-apa pangerangu, tàka kupanii pa-habola-nggai rukuna i Ama. 26La rehi nu karai-wadimi-nyaka na tamunggu lai Ama; kai pinya, nda Nyungga-apa makarai-nggai ndumami lai Ama, 27Nadu i Ama wiki ba nambuha-manggai. Hi nambuha-nggai nyimi, maa bai mbuha-dungga Nyungga dàngu ba mbàda pawai dimika ba paweli-nggu lai Ala. 28Ma-pawelingu lai Ama-maka, hi kumai la pinu tana. Tàka nàhu dunjaku-nggunyaka na pinu tana ka kubeli lai Ama, wànggu,” wànanja.

29Tàka da papanau-na i Yehu, “Nàhu panii pa-habolangu-munyaka Miri, ndau wàngu-apa pangerangu, 30tàka nyuma mapi-manya bau pi hàla-manya dumu. Nda haàtu-apa Miri majàra pa-paàra-nggau ngga - nggàra. Tuna nuduka hi mapawai ba ma-welingu lai Alakau,” wàdanya.

31Nahema i Yehu, “Ba tuna pawai dimi-nyaka nàhu? 32Nandi-manya! Ninya napa na rehina, dàngu rehi-mana-nyaka nàhu, la papai - ihanggai. Napa nyimii maràngga beli la umami haàtu - haàtu, tàka hii dunjaku mehangga Nyungga. Na nyuna nda didi meha-aka duku, maa ba ninya i Ama na ma-angungga. 33Kupanii ndàbaha yiada ka peku ngala-minya na peku hàmu rukuna bai pambulu dàngga Nyungga. Imayila napa la pinu tana yiana. Na nyuna pamàndu-nja da etimi! Mbàda talu-nggunyaka na pinu tana!” wànanja.

Currently Selected:

YUHANI 16: KAM

Highlight

Copy