DEDI 39

I Yuhupu dàngu na papaha-na i Potiparu

1I Yuhupu da-karia-nya la Mehiru paraï da tau Ihimailu, dàngu hi dadangga-nya lai Potiparu, na parawira-na na hanganji na ma-katangu kapala manggangu la uma hanganji. 2I MIRI nandula mànuya i Yuhupu, jia hi na-ondungu mànu la paràma - paràma-naka. Nyuna na-ndàdiku la umana na mirina, na tau Mehiru. 3Na mirina naita-ya ba nandula-ya i Yuhupu paraïna i MIRI, jia ba tuna hi nalingu hàmu la mbuu ndàbana na paràma-na. 4I Potiparu nahàmu-nya eti i Yuhupu hi natuya matanggu paloku nduma wikina nyuna; hi na-patanggu-nya i Yuhupu la pa-paloku-ya la kuru umana dàngu mbuu ndàbada da bandana. 5Piti welingu nu, lumuna i Yuhupu, i MIRI na-pakanyuru-ya na kuru umana nuna na tau Mehiru dàngu mbuu ndàba-daka da pamangu-na, màla la uma màlambu la woka. 6Mbuu ndàbada da ngga - nggàrana da pamangu-na i Potiparu na-patanggu hàlanya i Yuhupu. Nu ba tuna nu nyuna i Potiparu nda nahili pi-anyapa duna da pa-paloku la kuru umana, jiaya nangangu-kika duna na papina.

I Yuhupu na-nggajungu dàngu na-paràka miningu. 7Palàngangu pi - pirana na rehi, na papaha-na i Potiparu nangeri mataru-nyaka i Yuhupu, hàla hi na kamangu pa-pamanda-nya la pa-katuda danya. 8I Yuhupu nda nabihu dàngu hi napanau-nya, “Malangu-mu Ràmbu, i Umbu Potiparu, na patanggu hàla-ngganyaka mbuu ndàbada da mangu-naka lai nyungga. Nyuna nda nggàra-apa duna pa-pangàda-na tubana na kuru uma yiana. 9Lai yiahu na kuaha-nggu nyungga hama-ma-anaka na kuaha na nyuna. Nda hili ningu-apa hau na pànda patanggu-nangga nyungga, hinggilu-mu nyumu. Nggiki hama peku-naka nyungga hi jia tu bia-nggunya na ma-akatu tungu nu dàngu hi kunjala la hanggana i Ala?” wànanya. 10Jiapa ka na-pamanda mànunya nimbihu lodu paraïna papaha-na i Potiparu, tàka nuna na bidi mini jiapa-maya ba nda nabihu pa-katuda angunya.

11La hau na lodu ba talànga tama-naka i Yuhupu la uma pa-paloku-ha da paràma-na, nda ana ningua haàtu tau lai nu. 12Na papaha-na i Potiparu na-padàngi weli kalembi bokulu-nya i Yuhupu, “Mai na kata katuda angu,” wànanya. I Yuhupu na-kawutaru ba napa-hàlangu wikina, hàla hi napalai la hambeli, tàka na kalembi bokulu-na na-ndàdiku-ka la limana nuna na tau kawini. 13Ba naita-yaka palaina i Yuhupu paraïna papaha-na i Potiparu tàka na kalembi bokulu-na ba na-ndàdiku, 14paau-nanjaka da papalewa-na, hi napanii, “Ni kai tàngaru! Na tau Imbarani na-patama ngàndina na leinggu la uma yiana, na-paaka-ndaka. Natama daa la kurungu-nggu, ka ku-rumbaku-ya wànangga làti, tàka hi ku-kaladaku pa-kodungu. 15Ba narongu-ka ba ku-kaladaku, palai-nanyaka la hambeli, tàka na kalembi-na ndàdiku-nanyaka,” wàna.

16Ka pahàmu-nanyaka na kalembi-na paraïna papaha-na i Potiparu lupa nabeli na leina. 17Ba nabeli-ka na leina, lu panii-nanyaka na leina na rukuna nuna, “Na tau Imbarani na pangàndi-mu yiahu, na tama la kurungu-nggu ka ku-pamakia-ya wànangga làti. 18Tàka ba ku-kaladaku-ka, palai-nanyaka la hambeli hi na-ndàdiku yiana na kalembi-na,” wànaka.

19Lalu mbana mbeniya i Potiparu. 20Hi na-wuangu pareta la payàpa-ya dàngu la pa-patama-nya la uma kapàtangu, la kàli ngia papuhi-na tau na hanganji. 21Na nyuna i MIRI nandula-ya i Yuhupu dàngu namu mànu-nanya-padua hi lupa nambuha-nya paraïna kapala uma kapàtangu. 22Nyuna na-patanggu hàlanya lai Yuhupu na tau pa-tahangu, dàngu i Yuhupu-maka na pa-wuangu wai ngaba la patanggu hàlanya na paràma, na pa-paloku daa la uma kapàtangu. 23Na kapala uma kapàtangu nda na-tàngaru-ahapa mbuu ndàbada da pambàda patanggu-na i Yuhupu, nadu i MIRI ba ndula-nanya padua, hi lupa nalingu ndàba na paràma-naka.

Currently Selected:

DEDI 39: KAM

Highlight

Copy