DEDI 40

I Yuhupu ba na-kaloka-ha da manggadipangu-da da tau pa-tahangu

1Palàngangu-ka pi - pirana na rehi malamiri da tau madua da malumu-nya na hanganji, nu na ma-paloku-nya pa-unungu dàngu na ma-paloku-nya pangangu ningu panjala-da la hanganji. 2Ka hàngga-nanjaka nuda da tau madua da malumu-nya paraïna hanganji, 3hi na-patama-nja la uma kapàtangu la umana na kapala manggangu, na ngia pataha-danya i Yuhupu. 4Damandai-ma la uma kapàtangu, tàka na kapala manggangu uma hanganji hi na-patanggu-nya i Yuhupu la palumunja.

5La hau na rudungu na ma-paloku pa-unungu dàngu na ma-paloku pangangu da maràngga manggadipangu. Na ihi manggadipangu-da nda da-pahama-a. 6Ba namaika i Yuhupu lai nyuda nu hadangu harii, naita-ha ba bitida-paduaka. 7Hi na-paàra-nja paraïna i Yuhupu, “Hi tu-inaka na bitimi la lodu nàhu?” wàna.

8Dahema nyuda, “Kamodu ma-manggadipangu, dàngu nda ningua haàtu mapinya ihina,” hi wàda.

Napaya i Yuhupu, “Mbulungu i Ala na mawua-nya peku na tau la pa-kaloka-ya na ihi manggadipangu. Màla kamangu papeka-ya na manggadipangu,” hi wàna.

9Na ma-paloku pa-unungu hi napanii, “La manggadipangu-nggu kuita-ya na hareti na pingi angguru la hangganggu. 10Na angguru nuna tailu kahanga-na. Hina-maapa da parungu da kahanga-na, luma wàla-ma-adanya, hàla rara-ma-adanya da wuana. 11La rehi nuna yàpa-nggunya-padua na kaba wai paunu wàna na hanganji ka pàpu-nggunyaka wua angguru hi kupohu-nya na kabai waina na hanganji, hi ku-payema-nya,” wàna.

12Napaya i Yuhupu, “Yiana-ya na ihina na manggadipangu-mu: Da tailu kahanga ba wàmu jiaya na tailu mbua lodu. 13Tailu mbua lodu-kiaka napa na hanganji na-pahàla-kau, napa najàma-nggau dàngu hi na-pabeli-nggau la pakata memamu. Napa nyumu muhilu payema belinya kaba wai paunu wàna na hanganji hama tuna la wungana. 14Na nyuna namu àruka duku jàka era hàmu-naka na ngeramu nyumu. Peka àrunya na hanganji na rukunggu nyungga, ka na-pahàla-ka welingu la uma kapàtangu yiana. 15Nadu, làti nyungga duku àmangu ba piti ramba-adangga welingu la paraingu tau Imbarani, tàka lai yiahu-mbu la Mehiru, nda nggàrama duku pa-pandoi-nggu hau ma-akatu hi peku patama dangga la uma kapàtangu,” wànanya.

16Na ma-paloku pangangu ba napii-nyaka ba nahàmu na ihi manggadipangu-na na ma-paloku pa-unungu, kapanii-ma-nanyaika duna lai Yuhupu, “Nyunggambu ku-manggadipangu, tidungu-nggunya tailu mbua katanga roti la katingguku-nggu wànggu. 17Daa la katanga mangia pinu dehi ningu ma - màtu kanguta ndumana na hanganji, tàka nàmunja da ma-hawurungu da ngaa pambuta-maha nuda da kanguta, wànggu,” wàna.

18Nahema i Yuhupu, “Yiana-ya na ihina nuna na manggadipangu: Da tailu mbua katanga jia-mayai na tailu mbua lodu. 19La dalu tailu mbua lodu paràhangu-nanyaka tau na hanganji pa-katiku-ya na katiku-mu, na kayumbu-mu hi tiwalu-nya la kapuka ai, ka mai-danyaka da ma-hawurungu panganya na tolumu,” wànanya.

20Palàngangu-ka tailu mbua lodu jia-yaka na lodu dedina na hanganji, wulu-nanyaka remi bokulu nduma mbuu ndàbada da panggawi. Na-wuangu pareta ka paluhu-ha welingu la uma kapàtangu na ma-paloku pa-unungu dàngu na ma-paloku pangangu dàngu hi karia-nja la hangga mbuu ndàbada da panggawi uma hanganji. 21Na ma-paloku pa-unungu pabeli-nanyaka la pakata memana àmangu. 22Tàka na ma-paloku pangangu hi nahuku pameti-ya. Na-padeningu hàla hama tuna ba mbàda wàna i Yuhupu. 23Na nyuna na ma-paloku pa-unungu nda nahili namu-ayapa i Yuhupu. Maromba ailulu-maana-nyaka.

Currently Selected:

DEDI 40: KAM

Highlight

Copy