Popular Bible Verses from DEDI 39

Share

I MIRI nandula mànuya i Yuhupu, jia hi na-ondungu mànu la paràma - paràma-naka. Nyuna na-ndàdiku la umana na mirina, na tau Mehiru.

Mbuu ndàbada da ngga - nggàrana da pamangu-na i Potiparu na-patanggu hàlanya i Yuhupu. Nu ba tuna nu nyuna i Potiparu nda nahili pi-anyapa duna da pa-paloku la kuru umana, jiaya nangangu-kika duna na papina. I Yuhupu na-nggajungu dàngu na-paràka miningu.

Nyuna na-patanggu hàlanya lai Yuhupu na tau pa-tahangu, dàngu i Yuhupu-maka na pa-wuangu wai ngaba la patanggu hàlanya na paràma, na pa-paloku daa la uma kapàtangu.

Hi na-wuangu pareta la payàpa-ya dàngu la pa-patama-nya la uma kapàtangu, la kàli ngia papuhi-na tau na hanganji. Na nyuna i MIRI nandula-ya i Yuhupu dàngu namu mànu-nanya-padua hi lupa nambuha-nya paraïna kapala uma kapàtangu.

Palàngangu pi - pirana na rehi, na papaha-na i Potiparu nangeri mataru-nyaka i Yuhupu, hàla hi na kamangu pa-pamanda-nya la pa-katuda danya. I Yuhupu nda nabihu dàngu hi napanau-nya, “Malangu-mu Ràmbu, i Umbu Potiparu, na patanggu hàla-ngganyaka mbuu ndàbada da mangu-naka lai nyungga. Nyuna nda nggàra-apa duna pa-pangàda-na tubana na kuru uma yiana. Lai yiahu na kuaha-nggu nyungga hama-ma-anaka na kuaha na nyuna. Nda hili ningu-apa hau na pànda patanggu-nangga nyungga, hinggilu-mu nyumu. Nggiki hama peku-naka nyungga hi jia tu bia-nggunya na ma-akatu tungu nu dàngu hi kunjala la hanggana i Ala?” wànanya.

La hau na lodu ba talànga tama-naka i Yuhupu la uma pa-paloku-ha da paràma-na, nda ana ningua haàtu tau lai nu. Na papaha-na i Potiparu na-padàngi weli kalembi bokulu-nya i Yuhupu, “Mai na kata katuda angu,” wànanya. I Yuhupu na-kawutaru ba napa-hàlangu wikina, hàla hi napalai la hambeli, tàka na kalembi bokulu-na na-ndàdiku-ka la limana nuna na tau kawini.