Kejadian 38

Yehuda hwe Tamar e’birek en tigisa wene

1Agauwa mesik pam at Yehuda ano ari ebano oruakhwe, enebe ugonoboluk, ap onuk hira owi Adulam a’ge e’birek welik oluk, hau waga. 2E’birek ebano welat, ap Kanaan a’ge onuk Sua agalogo dogum il holuk, hwerlesirik e’birek nogogulat, 3hwe ano emalik ogola agoam e, emalik ap dogo poluk onuk Er tualegei. 4Pobuk en e, hwe ano arat emalik ogola agarik emalik ap dogo poluk onuk e, Onan tualegei. 5Pobuk nin Yehuda o Kezib lasukhwe hwe ano ap muat a’ge mesik dogo poluk onuk e Syela tualegei.

6Pobuk nin at Yehuda ano en omlogo naduk a’ge onuk Er ano hwele Tamar horlouwogoluk, wogesi. 7Wogegisa a’geat de, Yehuda omlogo Er ano re, Allah il pam wiak nak til lagama, Allah en weregei. 8Asogo waragama, at Yehuda en at Er ot logomalik Onan ano mo’guleselat,

“Hat hue Er ano eiyagai ebalema po erlakma enat waragama re, onuk un welemagoluk hue en tugwe pesi a’ge hwe Tamar ai hwerlaguntik he’biregat nogo ip o,” 9oluk mo’gulesimu, at ot ano edemu en e,

“Hwe yu emalik dorua holuk e, an nomlogo u erlakma en, nue emaligat oluk ogu lema hegi,” oluk ede epesirik uge ano tenak pasu holuk e, ue eiyagai wiyalemagoluk at mani ano herlilogo ’gwiang pam ’bo pasu laga. 10Ye, at Onan tegei ano re, Allah en e, wiagat hesirik weregei. 11Weregeimu, at Yehuda en, “An neiyagai emin warenebegei ’gela’ge nomlogo pobuk dogo a’ge onuk Syela yu, asogoat woruno oluk ede epesirik, at hwe Tamar ano mo’guleselat, Hwe yu o. An nomlogo Syela souwe agokhwe menet harok welat, we tugweat haik hia oruakma, lak o,” oluk mo’gulesimu at Tamnar ano en e, aik ia oruakma ene’bek laga.

12Asogo entai lagarik oruakhwe welegesarikmu enat Sua agalogo Yehuda ugwe ano waraga. Asogo waragama o pong poluk welegesarik pobuk en e, at Yehuda ue Adulam a’ge onuk Hira ano e’birek o Timna aphwami domba enasu ’balil lagaimu legesa. 13Lagaikhwe, aphwami en e, hwe Tamar ano mo’gulogulat,

“Erlak o. Hat hogun aik Yehuda ano uam domba enasu ’balu a’ge paget o Timna laigoluk wago yo,” 14oluk mo’gulogwi a’ge ano at hwe Tamar esa’go hwelegeitik, “Yehuda omlogo Syela ano arat souwe aga a’geat de, an woknobu erlakma re,” oluk epesirik, ’bogoyum is hwami tugwe a’ge en ’buktogwi a’ge ano mo’gorlogo ukpoluk e, ’bagoyum il muat a’ge ano bukhwerlasulat, orogole sum ’bukhwerlasulat, takpoluk o Timna ebela lagaimu o Enaim ’gebela ’goduk ’gwi lagaimu eriano eragamat hweriogo welaga.

15Hweriogo oruakma, at Yehuda ano lasulat, at imalhwe at a’geat de, orogole orlomurakma re, “Yu re, imalhwe opo erlakma en e, Hwami danian ano a’ge hwi a?” oluk epesirikmu, ’goduk esa’goma hweriogo oruakma, eragam horok lai lagarik mo’guleselat,

16“Hwe yu o. Ne’bek su o,” oluk asogo mo’gulesimu, at hwe ano en e,

“Ne’birek nogou a’ge e’gen ai o’go re, noat woknorogun?” 17Asogo mo’gulesimu, at Yehuda en e, “An nuam kambing emalik mesik hebaget perakpou weik o,” oluk mo’gulesimu, at hwe Tamar en e,

“A’geat de, an nebaget perakpou wom erlak owan oruakhwe, an en tenak wolom a’ge mesik woknoum a? Erlak a,”

18oluk mo’gulesimu at Yehuda en e,

“Hat tenakho wolom a’ge an en no a’ge wokhoum epegen?” oluk mo’gulesimu at hwe Tamar en e,

“He’gik a’basu pasulat, cap emin, cap agerle emin, hua’gun he’gikmu a’ge ai emin, woknoum o,” oluk mo’gulesimu wogesirik, hwe ano e’birek nogosoam e, arat emalik ogola aga. 19At hwe Tamar ano owi pam wagarik at orogole pam sum orlomurak welaga a’ge ano emin, at ’bogoyum op a’ge ’bik ’buk laga a’ge emin, ’berlegat no’gorlogo ukpoluk ’bogoyum is hwami tugwe a’ge en ’buktogwi a’ge ano ebalema ’buktak poluk e, welaga.

20Ye, at Yehuda a’ge a’ge di a’ge yu a’ge hwe tenakho oruak a’ge ebano wasulat, hwe wogoum a’ge mo’gulesi ano wogesi louwagoluk at are Hira ap Adulam a’ge perakpesi. 21Asogo perakpesimu lagarik, is ap ebano hin dawak lagalat,

“Malik logwe! Hwe danian a’ge o Enaim ebela pam ya welaga a’ge ano logon hegep a?” oluk mo’gulentil laga a’geat de, is ap ano en e,

“Hwami danian ai a’ge re, o ya mesik modok erlak o,” oluk mo’gulegisa.

22Asogo mo’gulegisema, at ap ano pobuk togolik wagarik Yehuda mo’guleselat,

“Ao, nare. An legirik hwe ano herak pasuam e, is aphwami eba a’ge en e,

Hwami danian ai ’gela’ge mesik o uema modok welagai erlak o, oluk mo’gulnegisema wegi o,” 23oluk mo’gulesimu, at Yehuda en eselat e,

“Kambing emalik yu at, hwe ai o’go wogemagoluk perakpegi a’geat de, he’birek la’bolu erlakma re, nis nene’gerli agoma no oluk nena’ge ai obat horlouwok o,” oluk mo’gulesi.

24Pobuk dugwi henagan takpoluk, is aphwami en Yehuda mo’gulogulat,

“Hat homlogo hugwe tugwe a’ge ano danian agarik pageat emalik ogola agama oruak o,” oluk mo’gulegisema at Yehuda en e,

“Ebe elaluk ’ga’go odouk narlik pouwogoluk woluk manis o,” oluk mo’gulentesi.

25Mo’gulentesimu, ebe woluk wemagoluk tigisema at hwe ano en is ap ebano disogo mo’gulentesi,

“A’ge di a’ge yu a’ge an tenakho welegi a’ge yu, nemalik nogola agoma re, e’gik a’bosu pasulat, cap emin, agerle emin, wo’gun emin, yu sa en a’ge hul?” oluk mo’gulentesi.

26Asogo mo’gulentesimu wogesi legesema at Yehuda ano en e,

“Ai an na’ge anoat hegi,” oluk ede epesirik,

“Hwe yu en wiak tegei erlak o. Nomlogo Syela wogegis pukmu logwe, ne’bigenen welegimu e, wiak tegis o,” oluk egei. Asogo egeirik hwe ano e’birek emin noge u erlagat welegesa. 27Pobuk at hwe Tamar emalik doru modok horok agama, hwe yu emalik enebe ’biren hulup malik dorua oluk enagat enil hogu legesa. 28Ye, at hwe Tamar ano derioluk nonouk tagokhwe, malik mesik e’gik mesik nak naduk wasuam hwe mesik malik dagenebiso a’ge en herlesi ’gura’ge pam hettak poluk, disogo egei, “Yu naduk dagaga o,” 29egeimu, malik e’gik ano togolik ogola pesimu, are ano naduk dagama, at hwe malik dagenebeso a’ge ano en e,

“Hat hanni pam hebilogo pil-pil liplau wegenma re, honuk Peres at o,” oluk tuelak pesi. 30Pobuk nin are e’gik herle hettak a’ge ano dagagama onuk Zerah at tualegei.

Currently Selected:

Kejadian 38: Wul

Highlight

Copy