Kejadian 39
39
Yusuf en Potifar paget yabuk tisokhwe, Potifar ugwe en laligoluk tegei wene
1At Yusuf is aphwami Ismael a’ge o Mesir woluk legesarik, is ap ’gain onuk logo a’ge Firaun owi ’gwelakharok welat yabuk togu legesa a’ge onue onuk Potifar e’bek o’go paget woluk legesema o’go ’balegei. 2#Per. 7:9O’go ’balegeimu, Yusuf ap Potifar o Mesir a’ge ai eragam a’ge welat, owi pam ebe di yabuk yu yabuk tisokhwe Nenaik ’gain Onuk Logo a’ge en ’gwelakharok welat lethasu laga ai en e, elit nak taga laga. 3-4Di yabuk yu yabuk op nak tisokhwe, at Potifar en,
“I. Aik ’gain Onuk Logo a’ge Allah en tenak welat lethasu hegi o,” oluk Yusuf ebam lo’bok egeitik iabuk u’gwarek ebaget taga lemagoluk edikpesi. Edikpesirik, a’ge di a’ge yu a’ge e’gik pam welat, ugwe emalik degelenebise lemagoluk iabuk wogesi. 5Iabuk wogesimu, hwerli ai hwerli en, at Nenaik ’gain Onuk Logo a’ge en Yusuf pegilsogo ap owi Mesir a’ge ano ugwe emalik enemin enebe obabenebiselat, a’ge di a’ge yu a’ge o pam a’ge emin, parema yabukmu yogo a’ge emin, obap pasulat, taga laga o. 6At Potifar a’ge di a’ge yu a’ge ’berlegat at Yusuf e’gikmu pesi ai o. Asogo e’gikmu pesimu at Yusuf en tisokhwe no oluk e, Potifar en di a’ge yu a’ge owi pam a’ge tu a’ge eberise laga erlak we, mennei ’garoksogo welat, we, oso’boru no a’ge nak eberak welaga.
At Yusuf ebe re, orogole op en yetharok wolom ’gela’ge nak welaga. 7Asogo oruakma at hwe Potifar ugwe ai ogola en e,
“Yusuf en sennielep e,” oluk epasu lagarik,
“Nemin nogouwok,” oluk mo’gulesi.
8Asogo mo’gulesi a’geat de, at Yusuf asogo tu ebit en e, disogo mo’gulesi,
“Nia o. Nue Potifar en a’ge di a’ge yu a’ge owi pam welago a’ge ’berlegat an ne’gik pam pesirik, at en disogo yusogo mesik tu erlakma en wenemennei modok ’garoksogo welagoma re, asogo mo’gulnorogun no yo, nia. 9O pam di a’ge yu a’ge yema, at eiye welago ’gela’geat, an eiyerak nebesimu, an en elit tu nak a’geat de, hat hebe nak e, at ugweatma re, an ne’gik pam po erlak o. Allah il pam at iak sagalogo an asogo wiak tu modok mia o,” oluk mo’gulesi. 10Asogo mo’gulesi a’geat de, at hwe Potifar ugwe ai en e,
“Yusuf, nemin nogouwok,” oluk nin hwedik nan hwedigat ede ’gagaliso modok welaga a’geat de, Yusuf at emin nogou modok ebit welaga.
11Agauwa mesik erlige re, at Yusuf Potifar owi pam eba yabuk tigoluk aphwami logon modok erlakma omuat ’gwegei. 12’Gwegeimu, at Potifar ugwe ano en e, Yusuf osum lisogo tenak pesirik e, disogo mo’gulesi,
“Nemin nogouwok o,” oluk mo’gulesimu ebe perlik holuk osum aganhan sum ano at hwe ano e’gikmu ukpoluk hweiye odipmu libaga. 13Yusuf hweiye libagama, osum aganhan a’ge no’gorlak nak Potifar ugwe ai e’gikmu agama il hesi. 14Asogo hesirik, eragam a’ge worlentesimu wegesema re, disogo mo’gulentesi,
“Yethemit, an nogun en ap Ibrani a’ge o pam yema ’gwelakpou waga a’ge ano en nis yema wiagapnenebigoluk tegeimu o. At o ogorli an nogosoma ’gwegeitik, tenak nebaigoluk taga lagama an niak loksogo modok nga egi o. 15Niak asogo nga eselegimu re, osum yu nak no’gorlogo ukpoluk hweiye libaga o,” oluk mo’gulentesi.
16Asogo mo’gulentesirik, Yusuf osum no’gorlak a’ge ano ogun wago holuk en onukhaigoluk pesi. 17Pesirik oruakma, ogun Potifar ano togolik wagama re, wene is mo’gulentesi ’gela’geat perleneat disogo mo’gulesi,
“Ap Ibrani a’ge o pam yema ’gwelakpou wegen a’ge ano en o ogorli an nogosoma ne’bek ’gwegeitik e, wiagap nebigoluk tegei o. 18Asogo taga lagama, an niak nga eselegimu re, osum yu nak no’gorlogo ukpoluk hweiye libaga o,” oluk mo’gulesi.
19Asogo mo’gulesimu, at Potifar olot het a’bik aga. 20Asogo olot het a’bik agama, aphwami mu a’ge en Yusuf e’gik herle wusogo perleneat aphwami ene’gik herle werak a’ge onobogumu pei louwagoluk mo’gulentesimu, o ap ’gain onuk logo a’ge Firaun en aphwami ene’gik herle wusogo enebasu lagama ebano ’gwelebak pei legesa.
21 #
Per. 7:9
Asogo a’geat de, Allah en Yusuf tenak welat ebe ede modok hesirik, lethasukhwe aphwami ene’gik herle werak a’ge tenentarok welegesa a’ge onue ai en Yusuf ebe ebam liok egeitik ede welagayat. 22Asogo welat, aphwami herle werak welegesa a’ge pema disogo mo’gulentesi,
“His honue ’gela’ge re, Yusuf yu welemak o,” oluk edikpesirik, di yabuk yu yabuk herle werak oruakma togwi a’ge ’berlegat at e’gik pamat pesi. 23Asogo pesimu, Nenaik ’gain Onuk Logo a’ge Allah en Yusuf tenak welat lethasukhwe, yabuk tisokhwe re, elit nak aga laga ai en, ap herle werak tenentarok welegesa a’ge onue ano en,
“Yusuf, disogo tin, asogo tin,” oluk mo’gulum a’ge erlak en wenemennei ’garoksogo welaga.
Currently Selected:
Kejadian 39: Wul
Highlight
Share
Copy
Want to have your highlights saved across all your devices? Sign up or sign in
