Kejadian 40

At Yusuf en ap herle werak a’ge en enabi hegesa a’ge ebe mo’gulentesi wene

1Agauwa mesik welegesarik en, ap enebe ’birenat ’gain onuk logo a’ge Firaun o Mesir a’ge eragam a’ge. At mesik onue ’gain egeik no a’ge paget disogo yusogo takpoluk wogoum oluk wene le’gelise laga a’ge, ye, at mesik oso’boru roti a’ge werarisolom a’ge paget disogo yusogo weraru oluk, wene le’gelise laga a’ge emin en, onue ’gain onuk logo a’ge ano wiagapsogo pegesa. 2Asogo wiak togu legesema, at ’gain ano olot het a’bik aga. 3Asogo olot het agarik, emin ene’gik herle wusogo onobogumu ap ’gain onuk logo a’ge owi ’gwelakharok welagai a’ge onue owi pam eba at Yusuf e’gik herle wusogo o eba pegesema oruakma e’bek ’gwelebak pegesa. 4’Gwelabak pegesema, herle werak agauwa a’bigat welegesa. Oruakma, is ap ’gain onuk logo a’ge Firaun owi ’gwelakharok welegesa a’ge onue ano en e, Yusuf en is ap ai enebaget di a’ge yu a’ge wogentasu lemagoluk mo’gulesi. 5O mesik erlige hup e, is ap onuk logo a’ge Firaun egeik paget wene le’gelise laga a’ge ano emin, oso’boru roti paget wene le’gelise laga a’ge ano emin, e’biregat enabi hegesa. Enabi hegesa ai ebe om a’ge re, hun domogat o.

6O loruk o’gwe huberat at Yusuf ene’bek laga ’gal e, is e’birek onorogole hiktak oruakma entesi. 7Asogo oruakma entesirik e, disogo mo’gulentesi,

“O yogodak e, his he’birek honorogole hiktak welegep ai nopaget,” oluk enebam hin wesi. 8Wesimu, is en e,

“O yogo hup nenabi hege a’ge re,

Ebe disogo a’ge paget hegep, oluk mo’gulnonto a’ge aphwami ’berlegat eneperlak nak en welege o,” oluk mo’gulegisema at Yusuf en e,

“Allah en mo’gulentasumu nak e,

Ebe disogo a’ge hegep, oluk umu henabi hegep a’ge ai ’beli’gogo mo’gulnemis o,” oluk mo’gulentesi. 9Mo’gulentesimu, at ’gain onuk logo a’ge Firaun egeik no a’ge paget wene le’gelise laga a’ge ano en e,

“Nabi ai re, anggur edip mesik an norogolema yogo welaga hegi. 10Anggur ai e’gik ago henagan pam tak a’ge re, e’gela ’gerat sebelise laga. Sebeliselat perleneat e’gen egesegei a’ge re, perleneat momi aga laga hegi o. 11Asogo hasulat e, ige’be ik at ’gain onuk logo a’ge Firaun nasu a’ge ne’gikmu tenak welat, anggur e’gen ano a’ge ’balogo, a’bosu ige’be ano ogola na’gogo pegirik ’gain wogeselegimu hegi o,” oluk mo’gulesi.

12Asogo mo’gulesimu, at Yusuf en e, disogo mo’gulesi,

“Hat habi hegen ai ebe re, disogo,

Anggur e’gik ago henagan pam hegen ai ebe re, o erlige agauwa henagan wolomul ebele paget hegen o. 13Ye, at ’gain onuk logo a’ge Firaun en agauwa henagan wolomtik e, hat he’gik hebilogo lebikhoboluk, wene hebam a’ge no’gorlogo erlagap poluk, hiabuk naduk welaga a’ge togolik wokhema o. Asogo wokhemma re, at ’gain onuk logo a’ge Firaun ige’be ai pam egeik na’gogo wogese legen ’gela’geat wogorogun a’ge hegen o. 14-15Asogo a’geat de, hat hiabuk wokhemma op welat, an nebam hede eberip o. An wiak mesik tu erlakmayat de, aphwami Ibrani a’ge onowi pam en yema peraknobou egesema welegi o. Ye, o Mesir yema en ogo re, wiak mesik tugumu wene enebam poluk herle wusogo ’gwelabonobogwi ai ’gela’ge an en mesik tu erlakmayat de, ne’gik herle wusogo yema ’gwelapnobu egesema welegiat ai en e, at ’gain onuk logo a’ge Firaun en ne’gik herle hebilogo lebiknobuagoluk, mo’gulomup o,” oluk mo’gulesi.

16At ap ’gain onuk logo a’ge Firaun en egeik no a’ge paget le’gelise laga a’ge ano abi hesi a’ge ebe op om a’ge mo’gulesimu, at ’gain onuk logo a’ge Firaun oso’boru roti a’ge weragoum a’ge paget wene le’gelise laga a’ge ano esa’go holhesirik e, Yusuf disogo mo’gulesi,

“An nabi re, so’boru roti worogo a’ge mul henagan egeik a’ge ogola yagathe’gik na’gul pam woluk lasu legimu hegi o. 17Mul egeik ebe o’borl pam e, di kue yu kue at ’gain onuk logo a’ge Firaun en nouwagoluk werakho woluk lagaimu re, tue wagarik kue ano nasu lagama hegi o,” oluk mo’gulesi.

18Asogo mo’gulesimu, at Yusuf en e,

“Hat habi hegen ai ebe re, disogo, mul egeik henagan a’ge hegen ai ebe re, o erlige agauwa henagan pam wolom a’ge paget hegen o. 19Ye, at ’gain onuk logo a’ge Firaun en agauwa henagan wolomtik, osi mo’gulontoma re, hat ho’gorlop ’balogo wathoboluk e, hebe werak e pam herle erlilogo hoboma re, tue wemarik hebe nouwa a’ge paget hegen o,” oluk mo’gulesi.

20Asogo mo’gulesirikmu en, o agauwa henagan welegesarik, at ’gain onuk logo a’ge Firaun ebe dagaga hegitsogo seni lok soruogoluk osi at ebaget yabuk togu legesa a’ge ’berlegat enemin nouwogoluk yo’go enebesi. Asogo yo’go enebesirik, at egeik no a’ge paget wene le’gelise laga a’ge ano emin, oso’boru roti no a’ge paget wene le’gelise laga a’ge ano emin, ene’gik herle hebilogo at osi iabuk togu legesa a’ge pema ebano ene’bek wogonoboluk wemagoluk osi logon mo’gulentesi. 21Asogo mo’gulentesimu wogenebil legesarik wogonoboluk wegesa ’gal e, at ap ’gain onuk logo a’ge Firaun egeik no a’ge paget wene le’gelise laga a’ge ano iabuk naduk taga laga a’ge togolik wogeselat e, 22ap oso’boru roti no a’ge paget wene le’gelise laga a’ge ano nak e, ebe modok woruagoluk wene ebam pesi. Wene ’berlegat asogo aga ai, at Yusuf en egei hegitsogoat aga. 23Asogo a’geat de, at ap ’gain egeik no a’ge paget wene le’gelise laga a’ge ano Yusuf ebam eberu erlak, we, modok memerak pesirik welaga.

Currently Selected:

Kejadian 40: Wul

Highlight

Copy