Kejadian 41

Yusuf en e, “Habi hegen ai ebe disogo a’ge paget hegen o,” oluk at ’gain onuk logo a’ge Firaun mo’gulesi wene

1Mo il ’biren welegesarik en, at ’gain onuk logo a’ge Firaun ebe ik Nil eragam edik oruakma abi hesi. 2Ebe asogo edik oruakma erianoat, wam sapi enebe sabiren a’ge esei a’bik a’ge re, asu ik merak a’ge ’gela’ge ik Nil ik olomu en liplau wegesarik, e’gela ik esa’go’gwe a’ge dak-dak no’gumu abi hesi. 3Asogo no’gumu en e’berlik e, wam sapi mu a’geat enebe sabirenat ik Nil ik olomu en liplau wegesayat. Wam sapi ai ebe uak soloksak en agap e, modok e’gerlik a’ge hebarligen egesarik, wam sapi esei a’bik a’ge ik esa’goma welegesa a’ge ebano eneragam inegesa. 4Asogo inegesarik wam sapi uak soloksak a’ge ebano en wam sapi esei a’bik a’ge ebano perlengsogo no’gumu abi hesirik at ’gain onuk logo a’ge Firaun ano elaluk aga.

5Asogo tegeirik, pobuk nogo egeitik abi mesik disogo hesiat. Gandum edip mesigat a’ge pam en e’gen ebe sabit pam modok hurle op a’ge ikho lebikpou waga lagama hesi. 6Ye, mesik e, gandum edip mesigat a’ge pam en e’gen momogou ebe sabiren a’ge sogwei aganhan wiak a’ge en e’gen ebano eragoltak poluk, a’bosu erlak a’ge ’bugap pesi a’ge ikho lebikpou waga lagama abi hesi. 7Asogo lebikpou wagoma, at gandum e’gen logon eragol a’ge ebano en gandum e’gen op welaga a’ge ebe sabiren a’ge ebano ninomolsogo nasumu hesi. Asogo ne’geitik, at ’gain onuk logo a’ge Firaun ano elaluk agalat ede heberlagarik e,

“I, an nabi hegimu hegi,” oluk epesi.

8 # Dan. 2:2 Ano asogo hesirik, o dakha egeimu huberat at ’gain onuk logo a’ge ano ede modok wiak aga. Asogo ede wiak aga ai en, ap o Mesir a’ge ’berlek asuagun elalin togu legesa a’ge emin, di a’ge yu a’ge owene enaluk a’ge emin, worlentai louwagoluk yo’go enebesimu, worlentai lagaiam wegesema re, abi hesi a’ge ebano is ’beli’gogo mo’gulentesi a’geat de, ap is a’ge mesik en,

“Habi ebe disogo ema a’ge paget hegenma o,” oluk mesik modok mo’gulum a’ge erlak aga.

9Asogo mo’gulum a’ge erlak agama, ap mesik ’gain onuk logo a’ge egeik no a’ge paget wene le’gelise laga a’ge ano en at ’gain onuk logo a’ge Firaun disogo mo’gulesi,

“Nue, an heragam a’ge naduk mo’gulhum erlakma en wiak tegis a’ge mesik yogodak ’baksogo mo’gulheik o. 10Naduk ebano pam e, nue hat en ap so’boru roti paget wene le’gelise laga a’ge ano emin, an heragam a’ge yu emin, wene yaknentigentik, nene’gik herle wusogo o aphwami ene’gik herle werak ’gwelabonobogumu ebano ’gwelebak nenebegenma, o ap hat howi ’gwelakharok welagai a’ge onue ’gain owi pam welege ani o. 11Asogo welat, o agauwa hup mesik erlige, nis ne’birek nenabi ebe hundomok om a’ge paget hege ai o. 12Asogo hegerik, ap souwe a’ge mesik Ibrani a’ge is aphwami hat howi ’gwelakharok welagai a’ge onue ’gain ano eragam a’ge welaga a’ge nemin o eba welege. Asogo welat nis nenabi hege a’ge ano ’beli’gogo mo’guligema, at en e,

Ebe disogo ema a’ge paget hegepma o, oluk mo’gulnentesi. 13At en asogo mo’gulnentesi hegitsogo demat aga. Ai ebe re, hat nue ’gain en e, an heragam a’ge wene nebam a’ge no’gorloguntik e, niabuk naduk taga legi a’ge togolik wokneselat, ap hoso’boru roti no a’ge paget wene le’gelise laga a’ge ano wene ebam poluk ebe modok werigen ai o,” oluk mo’gulesi.

14Asogo mo’gulesimu, at ’gain onuk logo a’ge en is mu a’ge en Yusuf wai louwagoluk peragenebesimu legesarik e, o ene’gik herle werak onobogumu en perleneat lebikpou wegesa. Lebikpou wegesema, at Yusuf emde asu ’baliselat, osum ’buktagalat, tegeirik e, ’gain onuk logo a’ge Firaun e’bek waga. 15Wagama, at ’gain onuk logo a’ge en Yusuf disogo mo’gulesi,

“An nabi arat hegi a’ge re, aphwami mu a’ge en ebe disogo om a’ge paget hegenma o, oluk mo’gulnum a’ge modok mia aga o. Asogo agama, aphwami pema en e,

At en elit ebe disogo ema a’ge paget hegenma, oluk mo’gulhum a’ge oruak o, oluk mo’gulnegisema en hat worlhiegi o,” oluk mo’gulesi. 16Asogo mo’gulesimu, at Yusuf en e,

“An heragam a’ge en ebe disogo ema a’ge paget hegen o, oluk mo’gulhum mia o. We, at Allah emategat nak modok se’geksogo mo’gulhum a’ge oruak o,” oluk mo’gulesi.

17Asogo mo’gulesimu, at ’gain onuk logo a’ge en e,

“An nabi hegi re, an nebe ik Nil esa’goma edik welat nil yethegi ’gal e, 18ik olomu en sapi ebe sabiren esei a’bik asu op a’ge liplau wegesarik e, e’gela ik esa’go’gwe a’ge dak-dak no’gumu hegi o. 19Asogo liplau wegesarik no’gumu, e’berlik e, sapi mu a’geat logon enebe sabiren a’ge o’borluak derak a’ge en e, enagap e’gerlik a’geat hebarligen egesa. Wam sapi modok wiak atnik a’ge o Mesir en di owi yu owi yema ’berlegat logon nil hasu erlak a’ge hegi o. 20Ye, wam sapi o’borluak derak a’ge ebano en wam sapi ebe sabiren esei a’bik a’ge ebano no’gumu hegi o. 21Asogo ne’gei a’geat de, wam sapi enebe op om erlakma en, ono’borluak deragat oruakma hegi o. Asogo hasumu en e, nede e’gat otluk nelaluk egi o.

22Pobuk nogogistik e, nabi mesik disogo hegi. Gandum edip mesigat a’ge pam en e’gen momogou ebe sabiren a’ge modok hurle op a’ge ikho liplau waga lagama hegiat o. 23Ye, gandum edipmu a’geat mesik pam e’gen momogou ebe sabirenat sogwei aganhan wiak a’ge en e’gen pema eragoltak poluk, a’bosu erlak ’bugap pesi a’ge ikho lebikpou wagokhwe hegiat o. 24Asogo lebikpou wagokhwe, at gandum e’gen pema eragol a’ge ebano en e, gandum e’gen op oruak a’ge ebano nomol-nemalsogo nasumu hegi o. An nabi ’biren asogo hegirik e, ap asuagun elalin tiso a’ge ’beli’gogo mo’gulegis a’geat de, ap is a’ge mesik en e,

Habi ebe disogo ema a’ge paget hegen o, oluk mesik modok mo’gulnum a’ge erlak aga o,” oluk mo’gulesi.

25Asogo mo’gulesimu, at Yusuf en at ’gain onuk logo a’ge Firaun ano disogo mo’gulesi,

“Nue, hat habi ’biren hegen ai ebe mesigat ema a’ge paget hegen o. Habi ai ebe at Allah en pobuk tua a’ge paget, at enat mo’gulhesi o. 26Habi sapi enebe sabiren esei a’bik a’ge hegen ai ebe re, 7 tahun wolomul a’ge paget hegen o. Ye, gandum e’gen op oruakma hegen ai ebe re, 7 tahun wolomul a’ge pagerat hegen o. Habi ’biren hegen ai ebe re, mesigarat ema a’ge paget hegenma o. 27Ye, e’berlik sapi enebe sabiren ono’borluak derak a’ge hebarligen egesa ai emin, gandum e’gen sogwei aganhan wiak a’ge en e’gen pema eragoltak poluk, a’bosu erlak ’bugap pesi a’ge ai emin, ebe re, so’boru obouk modok 7 tahun wolomul a’ge paget hegenma o.

28An e,

Habi ebe asogo ema a’ge paget hegenma, oluk nue mo’gulhegis ai re, at Allah en pobuk tua a’ge hil yethuagoluk mo’gulhesimu hil yethegen a’geat mo’gulhegis o. 29Pobuk o Mesir di owi yu owi yema ’berlegat 7 tahun di a’ge yu a’ge ebam louksogo modok lok emma op modok wolomul o. 30-31Asogo wolomtik, e’berlik e, 7 tahun so’boru di a’ge yu a’ge obouk wema. So’boru obouk ai modok wiak a’ge wagoam e, o yema di a’ge yu a’ge modok erlak omma wik-wiaksogo wolomul ai en, naduk di a’ge yu a’ge modok ebam louktak esik-’besiksogo op wolomul a’ge ai modok meme ua o. 32Nue, hat habi agauwa ’biren hegen ai re, at Allah en ebe perleneat tigoluk epesirik oruak en hegen o.

33Ai en e, nue. Aphwami yema enebaget di a’ge yu a’ge o yema degelogo pou wagoluk, hat en ap ebabut heberlak welat, di a’ge yu a’ge owene aluk modok a’ge holuk e, pulogo yo’go poluk edikpoluk e’gik pam poma op o. 34-35Asogo edikpoluk, mesik e, hat hosi logon en 7 tahun pam so’boru ebam louksogo esik-’besik takpoluk op no’gulat gandum ’berlegat e’gen ’balua a’ge ene’gik wenakho hwerli huaben lai lasu holuk, uganak a’ge nouwagoluk wogontogulat, logon me’gisogo mesikmu pul a’ge odoksogo o kota ’berlegat poluk tenak welemagoluk yo’go onoboluk edigonoboat o. 36Gandum e’gen odoksogo pul ai re, pobuk 7 tahun welat, o Mesir yema so’boru obouk modok wiak a’ge wema ai pam welat, no’gulomul a’ge paget odoksogo pul ai o. Asogo odoksogo pulholuk e, aphwami ’berlegat so’boru nele en warema erlak o,” oluk mo’gulesi.

At ’gain onuk logo a’ge Firaun en Yusuf yo’go poluk ebe gubernur welemagoluk edikpesi wene

37At Yusuf en at ’gain onuk logo a’ge Firaun asogo mo’gulesimu, at osi enemin en at Yusuf en wene pobuk tu a’ge paget egei ai,

“Obat egei,” oluk egesa. 38Asogo egesarik at ’gain onuk logo a’ge Firaun en osi disogo mo’gulentesi,

“At Yusuf Allah Arogun ogola welat mo’gulosoam oso ai en, yabuk ai at en elit tu a’ge oruak ai ’gela’ge ap mesik mu a’geat ’ga heratul epegep. Modok erlak o,” oluk mo’gulentesi. 39Asogo mo’gulentesirik, at Yusuf disogo mo’gulesi,

“Wene ’berlegat e’gen ai Allah en mo’gulhesimu en e’gen o. Holuk e, is aphwami logon enebabut weiyat heberlak welat di a’ge yu a’ge owene weiyat enaluk a’geat de, hat nak e, hebabut modok heberlak welat di a’ge yu a’ge owene modok haluk e, hat nak o. 40#Per. 7:10Holuk e, an en hat hebe gubernur welemagoluk edik hebasuam aphwami ’berlegat hat en,

Disogo tip, asogo tip, oluk mo’gulentasuam hiak hologo nak togu lemak o. We, an nematek nak e, hat weiyat opma’gwe mia ’gela’ge oruakhwe adia logo ’gela’ge o yema eiye weleik o,” oluk mo’gulesi.

41-42 # Dan. 5:29 Asogo mo’gulesirik e, at ’gain onuk logo a’ge Firaun en emas a’ge e’gik tegerlet pam ’gain onuk logo welat, aphwami eragam tenentarok oruak a’ge oluk enede we’gerlogo wantak welaga a’ge no’gorlogo at Yusuf e’gik pam wantak poluk welat disogo mo’gulesi,

“Hat hebe aphwami Mesir a’ge ’berlegat onue ’gain gubernur welerinogoluk yo’go hoboluk edikhebegi o,” oluk mo’gulesi. Asogo mo’gulesirik, osum mit wiak a’ge onuk linen a’ge egesik welaga a’ge ’buktak pasulat, ’besieme’gen alli a’ge emas a’ge o’gorlop pam wantak pasulat, tegei. 43Asogo wantak pesirik, at ebe onuk logoat aphwami eragam ’gela’ge onoboluk tenentarok welat ’gwiangso ’gela’ge pam wam kuda en lisogo woluk lasu a’ge pam nese laga a’ge ebe ’biren oruakma, mesik at Yusuf woluk denaga lemagoluk wogesimu, woluk lasukhwe, is ap at ’gain onuk logo a’ge hau wusogo togu lemagoluk tenak welegesa a’ge ’gwiangso ai orogole’gwe lagalat eniak loksogo disogo il legesa,

“Henebe! At louwagoluk selagap pemit o,” oluk il laga legesa. Asogo takpoluk at Yusuf aphwami Mesir a’ge ’berlegat onue ’gain gubernur welemagoluk edikpesi ai o. 44Asogo edikpesirik, at ’gain onuk logo a’ge Firaun en wene uak mesik disogo egei,

“An ’gain nonuk logo a’ge Firaun en, aphwami Mesir a’ge ’berlegat hat en,

Disogo tip, oluk mo’gulonto erlakma en, enede opoluk mesik togu lema modok erlak o, oluk Yusuf mo’gulegis ai henesa’go hwelip o,” oluk mo’gulentesi. 45-46Asogo mo’gulentesirik, Yusuf ano onuk is aphwami Mesir a’ge ononuk ’gela’ge Zafnat-Paaneah tuelak poluk, ugwe Asnat ap onuk Potifera dogwi asua is en a’ge eiye o kota Heliopolis a’ge agalogo wogesi.

Asogo edikpesirik ugwe asogo wogesimu, at Yusuf ebe umur 30 tahun pam yabuk ’gain onuk logo Firaun owi pam Mesir a’ge paget, tigoluk edip tenak pesi. Tenak pesirik, at Yusuf ebe ’gain onuk logo a’ge Firaun owi pam eba en o Mesir esa’go’gwe o di owi yu owi ’berlegat il ’gogolil laga. 47Lasukhwe, 7 tahun op modok oruakhwe, di a’ge yu a’ge owi yerigisa a’ge e’gen modok a’bik esik-’besiksogo egesegei. 48Gandum e’gen egesegei a’ge ebano at Yusuf en odoksogo o kota ’berlegat pesi. O kota eba ebe lo’bok eragam o’gwe yabuk o’gwe gandum e’gen egesegei a’ge ’balogo re, o kota ebayat pil laga. 49At Yusuf en gandum e’gen modok a’bik ik’berlik laut ye’gelak eragam o’gwe welago ai ’gela’ge odoksogo pesi ai en e, elit a’ge pam walhasu lagarik en, pobuk a’bik en e, walho erlakma en welaga.

50Asogo welat, so’boru obouk ano owan wom erlak oruakhwe, at Yusuf ugwe Asnat ano emalik enebe ’biren dagenebegei. 51Asogo dagenebegeimu, at Yusuf en e, disogo egei,

“At Allah en e, an di obotut yu obotut a’bigat hegi ano memerak pasulat, naik eiyagai enemin ogo memerak enebasulat, tuagoluk taknebesi ai en e, nomlogo naduk a’ge onuk, Manasye,” oluk tualegei. 52Asogo tualegeirik mesik disogo egei,

“Allah en e, an nebe wiaksogo oruakma nemalik ya woknesi o,” oluk egeitik omlogo pobuk a’ge ai onuk e, “Efraim,” oluk tualegei.

53Asogo tualegei eria pam e, o Mesir 7tahun op modok welegesarik en til-til ologun pam lau waga. 54#Per. 7:11Asogo takpesirik, e’berlik e, naduk at Yusuf en,

“So’boru obouk oruakhwe 7 tahun wolomul o,” oluk mo’gulentesimu ano hegitsogoat so’boru obouk ano arat waga. So’boru obouk ano arat wagama, o di owi yu owi so’boru modok obouk aga a’geat de, o Mesir di owi yu owi ’berlegat so’boru pegesa a’ge welaga. 55#Yoh. 2:5So’boru asogo obouk agama, aphwami Mesir a’ge so’boru nele en mia agama, so’boru at ’gain onuk logo a’ge Firaun ’gonu mo’gulesi legesema, at en e, disogo mo’gulentesi,

“Yusuf en e,

Disogo tip, asogo tip, oluk mo’gulhentasu holuk e, iak hologo modok tip o,” oluk enesa’go wusogo Yusuf e’bek peragenebesi.

56Asogo peragenebesirik en, so’boru obouk ano, o eba di owi yu owi ’berlegat wiyaletil modok mia agama, at Yusuf en gandum e’gen ’balogo o kota-kota ’berlegat pesi a’ge ebano ’goduk hwetil lagarik, o’go ’balisoma is aphwami o Mesir a’ge en so’boru at ebam o’go ’balogu legesa. 57Asogo ’balogulat oruakma aphwami o di owi yu owi ’berlegat so’boru obouk modok wiak aga ai en e, aphwami o yema en, etleba en, ’berlek en so’boru Yusuf pam o’go ’baluogoluk o Mesir nak ’gogu legesa.

Currently Selected:

Kejadian 41: Wul

Highlight

Copy