Kejadian 37

Yusuf arilak enemin en tigisa wene

1At Yakub o Kanaan aik welagoma eba welaga. 2Welat, at Yakub ugwe emalik enemin en togu legesa re, disogo,

At Yakub omlogo Yusuf ebe umur 17 tahun pam, uelak enemin wam kambing emin, domba emin, oluk esan a’ge tenak welat degelogu legesa. Is Yusuf uelak ai re, hwami enebe ’biren Yakub u’gwarek eragam a’ge ugwami wogenebegei a’ge ononuk e, Bilha emin, Zilpa emin, eriano enemalik. Onuam asogo degelogulat, Yusuf uelak enebabut wiak togu legesa a’ge aik mo’gulosu aga laga. 3Yakub e, eiyagai enebam ’berlegat ebit ’gela’ge welat, Yusuf nak e, sebal pam dakhwerlesi ai en, ede modok hwedik welaga. Asogo welat agauwa mesik erlige re, sum modok op a’ge ’bekhit oboktak a’ge ikho wogesi. 4Asogo wogesimu, is Yusuf uelak en e,

“Nenaik en nis ebit welat omlogo Yusuf nak e, ede modok hwedik hegi o,” oluk egesarik, Yusuf ebe enebirap pegesarik, weneane enemin opsogo ogu legesa modok erlak.

5Agauwa mesik erlige re, Yusuf abi hesirik, uelak ’beli’gogo mo’gulentesi a’ge re, is uelak en ebenagaikmu modok enebirap pegesa. 6At Yusuf abi hesi a’ge is ’beli’gogo mo’gulentesi a’ge re, yuat,

“Henesa’go opsogo hwelit. 7An nabi disogo hegi. Nis nenebe ’berlegat gandum owi yogoma ’gwigerik, e’gen ’balogulat herle ’geralogulat tugumu re, an en a’ge ’gerelak a’ge ebano inlai lasuam e, his en a’ge ’gerelak ebano an en a’ge eragam o’gwe wali’gogo legesarik e, ondogorlu pam en erliktogumu hegi o,” oluk mo’gulentesi.

8Asogo mo’gulentesimu, is en e,

“Hat hogola en e, nis nonue ’gain honuk logo a’ge oroguntik, sennentarok weleik, epegentik en mo’gulnentigen a?” oluk e’gerli wusogo wene yagegisa. Wene yagegisema abi hesirik, mo’gulentesi ai en, is modok ebenagaikmu enebirap modok takpegesa.

9Pobuk at Yusuf abi mesik hesirik pobuk uelak ebano disogoat mo’gulentesi,

“Mo emin, dugwi emin, hwesagal ebe 12 a’ge eminat, an ondogorlu pam hweriogo welat erliknobogumu hegi o,” oluk uelak ’beli’gogo mo’gulentesi.

10Asogo mo’gulentesirik, abi hesi a’ge ano, at aik ogo ’beli’gogo mo’gulesiat. Asogo mo’gulesimu, aik en e’gerli wusogo wene disogo wene yagesi,

“Habi ai ’gesogo paget hegen. Hat hogola en e, an emin, hia emin, harilak emin, hat heragam womultik nondogorlu pam hweriogo welat hat erlikhobu ebele paget hegen hegi, i a?” oluk wene yagesi. 11#Per. 7:9Asogo wene yagesimu, is Yusuf uelak en e, orlumamitsogo enebirap pegesa. Asogo pegesema, aik en nak e,

“Abi ai ebe no’gosogo takpouwa a’ge paget hesi,” oluk ede eberiso modok welaga.

Yusuf ebe o’go ’baligisema o Mesir woluk legesa wene

12Agauwa mesik erlige re, is Yusuf uelak ebano wam kambing emin, domba emin, enaik en a’ge oluk esan a’ge ebano o’gonuogoluk o Sikhem legesa. 13Legesema, at Yakub en e, Yusuf disogo mo’gulesi,

“Hat huelak wam nis en a’ge kambing, domba, o Sikhem wam esan o’gonogwi a’ge ai entai lak o,” oluk mo’gulesimu, at en e,

“I o, naik,” oluk mo’gulesi.

14Mo’gulesimu, at aik en e,

“Hat huelak emin, kambing, domba oluk esan o’gonogumu re, yogodak no’gosogo oruak. Hil entai laguntik e, nede se’geksogo mo’gulnosu orogun en e, perleneat lak o,” oluk mo’gulesimu, Yusuf o Hebron ukpoluk e, Sikhem laigoluk laga. Lagarik, o Sikhem perleneat laga. 15Asogo lagarik, o leimu eba laga ’gal e, ebela heratil waga lagarik ap a’ge mesik emin sarlok tigisarik, ap ano en e, disogo mo’gulesi,

“Not. Hat e, no heratil waga legen,” oluk mo’gulesimu at en e,

16“Nue. An e, nuelak wam kambing, domba oluk esan o’gonogwi a’ge heraenebil waga legi o,” oluk mo’gulesirik e, disogoat mo’gulesi,

“Is enebe o ’geba oruak, hat haluk a?” oluk hin wokhesi.

17Hin wokhesimu, at ap ano en e,

“Is e, ebela ’go yu lagalat e, is en e,

O Dotan louwok, oluk ogumu eniak nesa’go hwelegis ebano re,” oluk mo’gulesi. Asogo mo’gulesimu, at Yusuf uelak ene’berlik lasu lagarik, enebe o Dotan oruakma entai laga.

18Entai lagarik, ebe ene’bek horoksogo lo erlakma en walegat lasumu, Yusuf enak a’ge enil yethau wegesarik, ebe modok ’be’gi woruogoluk obok ’baligisa. 19Obok ’baligisarik is-is nak disogo egesa,

“Ap abi modok hasu a’ge ano ai wago ai o. 20At abi hesi a’ge ebano ebe no’gosogo agoma hul. Ebe wit-wat e, ik omugwe pelak i erlakma werak ’belabuok. ’Belebak poluk, wam maro iak anni a’bik a’ge iak en derlelegeimu, oluk uok o,” oluk egesa.

21Weim obok asogo egesa ai, at Ruben esa’go hwelegeirik e, Yusuf ebe deligoluk disogo mo’gulentesi,

“At ebe worogup erlak o. 22We, ebe re, ’go’bu woru erlakma enat, o leimu ik omugwe pelakma yema ’belabuok,” oluk mo’gulentesi. Asogo mo’gulentesi ai re, Yusuf ebe delogo togolik owi pam perakpou weigoluk egei a’ge o. 23Asogo egesarik oruakma, at Yusuf ano uelak ene’bek lasumu, Yusuf osum modok op a’ge ano no’gorlogo pegesa. 24Pegesarik e, ebe woluk ik omugwe pelakma ik deng egeimu ano ’belebak pei legesa.

25Asogo ’belakpegesarik, so’boru no’gulat oruakma aphwami Ismael a’ge logolak o Gilead en hwedali ’gela’ge a’ge emin, e a’bosu ’gela’ge a’ge emin, e mur a’bosu emin, di a’ge yu a’ge, wam unta o’borl pam pegesarik, o Mesir louwogoluk wagaimu enil entigisa. 26Enil entigisarik e, at Yehuda enarilak disogo mo’gulentesi,

“Nis nonot nopaget hisakho wusogo hisarua no. 27At ebe nis nonot nenemep me’gerik a’geatma, ebe di obotut yu obotut takpo a’ge erlak o. We, aphwami Ismael a’ge eba enebam o’go wouwok o,” oluk mo’gulentesimu, is enarilak en e,

“Op,” egesa.

28 # Per. 7:9 Asogo egesarik oruakma, aphwami Midian a’ge ebela’gwe ai wagaimu, Yusuf ebe ik omugwe pelakma en porlu egesarik e, o’go uang perak a’ge ebe 20 pam en, helep e’gen ’gela’ge o’go a’bik ’balogwi a’ge pam o’go ’baligisa. O’go ’baligisema, is aphwami Ismael a’ge o’go diphe’gik, sabuthe’gik, togwi a’ge ebano en Yusuf o’go ’baligisarik e, ebe o Mesir horloluk legesa.

29Horloluk legesema, pobuk at Ruben ik omugwe pelak a’ge ano il hai laga ’gal e, Yusuf ebe erlakma hesirik e, ede en e, osum derlepsogo hwikhesi. 30Hwikholuk, arilak ene’bek wagarik e, disogo mo’gulentesi,

“Nemi ano ebe eba erlak o, holuk e, an yogodak no’gosogo tik hwe,” oluk mo’gulentesi.

31Asogo mo’gulentesimu, is en e, wam kambing mesigat nak a’ge mesik werigisarik e, Yusuf osum ano wam mep egil-agalsogo pegesa. 32Asogo pegesarik, is en e, is logon mo’gulontogulat,

“Sum ai nenaik e’bek wogesi laguptik e, disogo mo’gulomup o,

Sum yu hat homlogo en a’ge hwiatluk wege a? oluk mo’gulesi lu o,” oluk egesa.

33Asogo egesema mo’gulosu agama re, at Yakub en e,

“Demat, sum yu an nomlogo en a’ge o. At demat wam maro a’ge iak en derlelegeimu waraga hegi o,” oluk egei.

34Asogo egeitik, ede en osum derlep-derlapsogo hwikhesirik, sum wiak a’ge ’belagwi sum ’buktegei. Asogo ’buktegeirik, nin hwedik-nan hwedigat omlogo paget nge tiso modok welaga. 35Asogo oruakma en, is emalik ap emin, hwami emin, Yakub ede obap pouwogoluk togumu, at en e,

“His en an nede obap nobu re, nebit o,” oluk egeitik e, disogo egei,

“An nomlogo paget, nge tago modok hwerli nebe wareik o,” oluk egeitik, omlogo paget ’belagwi ’buktak modok welaga.

36At Yakub asogo oruakhwe, is ap Midian a’ge en Yusuf ano o Mesir woluk legesarik, ap Potifar, ap Firaun onuk logo a’ge owi ’gwelakharok welegesa a’ge onue ’gain a’ge ebam o’go ’baligisa.

Currently Selected:

Kejadian 37: Wul

Highlight

Copy