Keluaran 8
8
Wene ’birenak a’ge re, Allah en o Mesir yagaiye nak yarluk takpesi wene
1Asogo oruakma, pobuk at Nenaik ’gain Onuk Logo a’ge en e, Musa disogo mo’gulesi,
“Hat hebe at Firaun e’bek loluk e, Allah en e, disogo mo’gulhesi oluk mo’gulomup,
An neiyagai en An erliknobogu lemagoluk e, perakpomup o. 2A’ge re, hat en peragenebagun erlak holuk, An en wene henebam poluk e, yagaiye modok a’bik takpoma re, o Mesir di owi yu owi ’berlegat yagaiye nak modok ’bete ua ani o. 3Asogo ’bete oluk, ik Nil ogola re, yagaiye nak modok yarluk uarik ’bete ua ani o. ’Bete oluk, o’borl akhit liplau wotluk e, hat howi pam ’goluk, o ogorli hebe nogo ese legenma ’goluk, sum nogose legen a’ge ogola ’gwiselat, hosi onowi lo’gwe ’gwiselat, aphwami ’berlek onowi lo’gwe ’gwiselat, so’boru roti werarogwi’gwe ’gwiselat, uong ’gela’ge ogola ’gwiselat, taga lema ani o. 4Asogo tagalat, yagaiye ai en hat hebe emin, hosi emin, aphwami ’berlek emin, ’berlegat henebetne ’golek-’galek ligaga lasu lema o, oluk mo’gulhesi ai o, oluk mo’gulomup o,” oluk mo’gulesi.
5Asogo mo’gulesirik, At ’gain Onuk Logo a’ge en Musa pobuk mesik disogoat mo’gulesi,
“O Mesir di owi yu owi ’berlegat yagaiye modok a’bik yarluk otluk modok ’bete uagoluk, at Harun en o’bouwa’gun ano wik-wok e, ik wei o’gwe lok o’gwe ’berlek emin, ’galok wogo’gwe emin, omugwe ye’gelak o’gwe emin, e’gik en ’bouwa’gun tenak welat, ik ogum pam ’bilhouwagoluk mo’gulemin o,” oluk mo’gulesi.
6Asogo mo’gulesimu, at Harun en o’bouwa’gun ano wesirik e, ik ’berlek ogum hegit e’gik en ’bouwa’gun ano ’bilhai lagama re, yagaiye a’bik hebarligen agarik o Mesir di owi yu owi ’berlegat yarluk otluk ’bete egei. 7Asogo tegeimu, is ap asuagun a’ge ebano en ogo re, enasua a’ge pam togwiam yagaiye a’bik hebarligen otluk yarlugat egei.
8Asogo aga lagama at ’gain ano en Musa Harun emin worlentasuam legesema re, disogo mo’gulentesi,
“His henaik ’gain Onuk Logo a’ge en e, yagaiye eba modok erlagap pou wagoluk mo’gulemis o. Yagaiye erlak ago holuk, an en his aphwami Israel a’ge henaik ’gain Onuk Logo a’ge paget wam di a’ge yu a’ge wusogo odouk narlogu lorogup en perakhenebaik o,” oluk mo’gulentesi.
9Asogo mo’gulentesimu, at Musa en e,
“An nogola nagai hasulat, nue, hat hebaget pobuk se’ban ik o. Hat en,
O ai erligeat se’ban nonobomup o, oluk ogun holuk an en hat hebe hebaget emin, hosi enebaget emin, aphwami ’berlek enebaget emin, se’ban ik o. Se’ban ikmu re, yagaiye ai, hat hebam welema modok erlak o. We, ik Nil olomu nak welema o,” oluk mo’gulesi. 10Asogo mo’gulesimu, at ’gain ano en e,
“An nebaget se’ban hubet ip o,” oluk mo’gulesimu, at Musa en e,
“Nue, hat en,
Disogo taknobo, oluk mo’gulnorogun holuk e, an en tigat o. Tagoam, hat en e,
His henaik ’gain Onuk Logo a’ge Allah ai ’gela’ge mesik modok erlak o. We, at Allah at hegi, oluk pobi togunat o. 11At en e, hat hebe emin, hosi emin, aphwami ’berlek emin, yagaiye henemin modok welegep a’ge ai henebam en erlagap paik o. Asogo erlagap poma honowi lo’gwe ’berlegat yagaiye logon welema modok erlak o. We, ik Nil olomu nak welema o,” oluk mo’gulesi.
12Asogo mo’gulotluk, at Musa Harun emin at ’gain ukpoluk liplau wegesarik e, at Musa Nenaik ’gain Onuk Logo a’ge en yagaiye ’gain ebam a’bik yarluk takpoluk pesi a’ge ano erlagap pou wagoluk ’gonu mo’gulesi. 13Asogo mo’gulesimu, at Nenaik ’gain Onuk Logo a’ge en, Musa en ’gonu mo’gulesi a’ge ano iak esa’go hwelegeirik, yagaiye olo’gwe emin, o seli’gwe emin, yabuk o’gwe emin, welaga a’ge ’berlegat waremagoluk tegeimu waraga. 14Asogo waragama, aphwami Mesir a’ge en e, yagaiye werak a’ge ebano odoksogo pil-pil legesema, o Mesir di owi yu owi ’berlegat e’ben modok sang eselat tegei. 15Yagaiye asogo waragama, at ’gain il hesi a’geat de, ede modogat nin helep ’gela’ge agarik, at Nenaik ’gain Onuk Logo a’ge en egei hegitsogoat Musa Harun emin en egesema eniak hologo tu erlakma en ugenebesi.
Wene henaganak a’ge re, Allah en ’golun yarluk takpesi wene
16At Nenaik ’gain Onuk Logo a’ge en e, Musa disogo mo’gulesi,
“At Harun en o’bouwa’gun ano pam ’gwiang pam pukhuagoluk mo’gulemin o. Pukhasuam e, ’gwiang a’ge o Mesir di owi yu owi ’berlegat ’golun modok a’bik ema o,” oluk mo’gulesimu re, Harun mo’gulesi. 17Asogo mo’gulesimu, at Harun en e, o’bouwa’gun ano pam ’gwiang pam pukhesimu, o Mesir eba ’gwiang ulage ano ’berlegat ’golun nak agarik, aphwami enebetne emin, wam petne emin, modok e’girlenebise laga. 18Asogo e’girlenebise lagama, is ap asuagun a’ge ebano enasua pam ’golun logon enemak pou wagoluk walhegesa a’ge re, modok mia aga. Asogo mia agama oruakhwe, o eba en yema en ’berlegat wam pam, aphwami enebam ’golun nak modok a’bik yarluk ese laga. 19#Luk. 11:20Asogo agama, is ap asuagun ebano en e, at Firaun disogo mo’guligisa,
“Yu re, at Allah enat tago hegi o,” oluk mo’guligisa a’geat de, at ’gain ede modok helep ’gela’geat agarik e, at Nenaik ’gain Onuk Logo a’ge en egei hegitsogoat Musa Harun emin eniak ogwiam hologo tu erlakma en ugenebesi o.
Wene uganak a’ge re, Allah en sobon yarluk takpesi wene
20Pobuk Nenaik ’gain Onuk Logo a’ge en e, Musa disogo mo’gulesi,
“Hat hebe hubet siaksogo re, at Firaun ik Nil olomu ’bu agoma ologotma loluk hemin sarlok toguptik e, An niak egi a’ge yu mo’gulomup o,
An neiyagai en An erliknobogu lemagoluk peragonobomup o. 21Ye, hat en is peragenebagun erlak holuk e, hat hebe emin, hosi emin, aphwami ’berlek emin, sobon henebam pou weik ani o. Perakpou wagoam, aphwami Mesir a’ge di owi yu owi onowi lo’gwe emin, odip o’gwe emin, sobon modok a’bik yarluk otluk ’bete ua o. 22Asogo a’geat de, hat en e,
Ai enaik ’gain Onuk Logo a’ge Allah en tiso hegi, oluk pobi nobuagoluk, An neiyagai onowi pam welagaimu o Gosyen eba nak e, sobon modok erlak welema o. 23An en e, neiyagai enebam muat tagenebasulat, hat heiyagai enebam muat tagenebaik ai re, o lorugat elalin a’ge tik o, oluk egei, oluk e, mo’gulomup o,” oluk mo’gulesi. 24Nenaik ’gain Onuk Logo a’ge en asogo mo’gulesirik e, at ’gain Firaun owi pam emin, osi onowi pam emin, sobon modok a’bik perakpou wagama re, o Mesir di owi yu owi sobon modok a’bik yarluk e’geimu, aphwami Mesir a’ge ’berlegat modok wik-wiaksogo welegesa.
25Asogo agama, at ’gain ano en e, Musa Harun emin worlentasuam legesema re, disogo mo’gulentesi,
“His henaik Allah paget wam di a’ge yu a’ge wusogo o momu narlik ebei lagup erlak o. We, o yema akhit horoksogoat narlesi lo yo,” oluk mo’gulentesi. 26Asogo mo’gulentesimu, at Musa en e, disogo mo’gulesi,
“Asogo tul erlak o. Nis en wam di a’ge yu a’ge Allah paget asogo wusogo narlik obogwiam e, aphwami Mesir a’ge en enil nontoluk e,
Ai wiak togwi o, oluk, nis nenaik ’gela’ge wam asua pogwi a’ge wusogo narl o’gwi o, oluk nenebe helep pam modok watnonobua o. 27Holuk e, Nenaik ’gain Onuk Logo a’ge en mo’gulnentesi hegitsogoat, o leimu aphwami erlakma eba agauwa henagan wolomultik en wam di a’ge yu a’ge wusogo Nenaik ’gain Onuk Logo a’ge Allah paget odouk narlik ebei lul o,” oluk mo’gulesi.
28Asogo mo’gulesimu, at ’gain en e,
“An en his o leimu aphwami erlakma eba loluk, henaik ’gain Onuk Logo a’ge Allah paget wam wusogo odouk narlesi lagup en perakhenebaik o. A’ge re, henebe walegat e, lagup no yo. We, horokho laguptik an nebam henede eberogulat an nebaget se’ban ogu lomup o,” oluk mo’gulentesi. 29Asogo mo’gulentesimu, at Musa en e,
“An laik holuk e, hubet sobon ai ’berlegat, hat hebe emin, hosi emin, aphwami ’berlegat emin, henebam en libemagoluk, se’ban perleneat naik ’gain Onuk Logo a’ge mo’guleik ani o. Asogo mo’guleik a’geat de, hat en hiak eseiyat nis lalnenebiselat, aphwami Israel a’ge enaik ’gain Onuk Logo a’ge paget wam di a’ge yu a’ge wusogo odouk narlesi louwogoluk togumu ene’gebela lariselat, pobuk togun modok erlak o,” oluk mo’gulesi.
30At Musa en ’gain ano asogo mo’gulotluk wagarik e, se’ban Nenaik ’gain Onuk Logo a’ge ’gonu mo’gulesi. 31Mo’gulesimu, at Nenaik ’gain Onuk Logo a’ge en Musa iak esa’go hwelegeirik e, sobon ebano at ’gain emin, osi emin, aphwami ’berlegat emin, ugonoboluk darak louwagoluk tegeimu re, mesik mo u erlakma en ’berlek perlengsogoat darak modok legesa. 32Asogo aga a’geat de, at ’gain ede modok helebat agarik aphwami Israel a’ge,
Lit o, oluk mo’gulonto erlakma en mo egei.
Currently Selected:
Keluaran 8: Wul
Highlight
Share
Copy
Want to have your highlights saved across all your devices? Sign up or sign in
