Keluaran 7

1Asogo mo’gulesimu, at Nenaik ’gain Onuk Logo a’ge en Musa disogo mo’gulesi,

“An en at Firaun ilem e, hat e, an Allah ’gela’ge takhoboluk hebaik, ye, hue Harun e hat eiye welat hiak ogun a’ge at ’gain ano mo’gulosolom o. 2An en disogo tip, asogo tip, oluk mo’gulhegis a’ge ai ’berlegat at Harun mo’gulomup o. At Harun en e, at Firaun mo’guleselat,

Hat en e, aphwami Israel a’ge, o Mesir ukpoluk lebemagoluk mo’gulontomup o, oluk mo’gulemagoluk mo’gulomup o. 3#Per. 7:36Asogo a’geat de, An en at ’gain ede modok helep ’gela’ge takpoluk paik ani o. Asogo takpoluk, an en di wene yu wene onogorlok a’ge a’bigat aphwami Mesir a’ge enebam paik a’geat de, at ’gain en wene hat en mo’gulorogun a’ge ai esa’go hwelak poluk tu erlakma en ukpasu lema ani o. 4At ’gain en asogo taga lema ai en, An en aphwami Mesir a’ge wene modok e’gin a’ge enebam poluk wiagap enebiselat, pobuk neiyagai Israel a’ge esan logolak ai enebe ’berlegat o Mesir ukpoluk wogonoboluk lebeik ani o. 5An en, aphwami Mesir a’ge wene enebam poluk wiagap enebiselat, aphwami Israel a’ge o Mesir en wogonoboluk libagoma, is aphwami Mesir a’ge en e,

At Allah re, ’gain Onuk Logo a’geat hegi, oluk pobi nobua ani o,” oluk mo’gulesi. 6Asogo mo’gulesimu, at Musa Harun emin wene Nenaik ’gain Onuk Logo a’ge en,

“Disogo tip, asogo tip,” oluk mo’gulentesi a’ge anoat tigisa. 7At Musa ebe umur 80 tahun, ye, at Harun ebe umur 83 tahun pam, wene Nenaik ’gain Onuk Logo a’ge en mo’gulentesi a’ge ano, at ’gain mo’gulomogoluk e’bek legesa.

At Harun o’bouwa’gun ano pam elalin til denaga laga wene

8At Nenaik ’gain Onuk Logo a’ge en e, Musa Harun e’birek disogo mo’gulentesi,

9“At Firaun en,

An wene pobi tuagoluk elalin a’ge mesik togupmu re, oluk mo’gulhentasu holuk e, at Harun o’bouwa’gun at ’gain ilem ’gwiang pam hwikhouwagoluk mo’gulomup o. Asogo obokhasuam ’bouwa’gun ai ’gosu ema ani o,” oluk mo’gulesi. 10Asogo mo’gulentesimu, at Musa Harun emin at ’gain e’bek legesarik e, Allah en,

Di tip, yu tip, oluk mo’gulentesi a’ge ano hegitsogo tigisa. Asogo togulat, at Harun o’bouwa’gun ano at ’gain emin, osi emin, enil pam ’gwiangma ’belebak pasuam e, ’gosu de, aga. 11Asogo tegei ai en, at ’gain ano en osi di wene yu wene enaluk a’ge emin, is asuagun a’ge emin, worlentesimu wegesarik e, wene is enasua a’ge pam, ai ’gela’geat tigisa. 12Asogo togulat, is en e, ono’bouwa’gun ’gwiangma hwikhogwiam e, ’gosuat aga laga. A’geat de, asogo agoam at Harun o’bouwa’gun ano en is ono’bouwa’gun ano haumsogo ne’gei.

13Asogo agama, at Nenaik ’gain Onuk Logo a’ge en e,

“His asogo togup a’geat de, at ’gain ede helep ’gela’ge emarik, his heniak esa’go hwelak erlakma en ukpasu lema ani o,” oluk mo’gulentesi hegitsogoat tegei ai o.

Wene naduk: Allah en ik mebap pesi wene

14Pobuk at Nenaik ’gain Onuk Logo a’ge en e, Musa disogo mo’gulesi,

“At Firaun ai en ede modok helep ’gela’ge otluk, aphwami Israel a’ge,

Lit, oluk oso modok erlak ai o. 15Ai en e, hat hebe huberat siaksogo at ebe ik onuk Nil olomu ’bisoma hemin sarlok togup en e, lu o. Lasulat, ’bouwa’gun ’gosu ago a’ge ano woluk loluk e, at ’bisoma orogolema ik esa’goma eba wolomup o. 16Loluk ebano oruakma, at ’gain ebe ’bu ago holuk disogo mo’gulomup,

Nis aphwami Ibrani a’ge Nenaik ’gain Onuk Logo a’ge Allah en e,

Hat en at eiyagai peragenebasuam o leimu aphwami erlakma loluk at erliktogu lemagoluk an yo’go nebesirik he’bek peraknobu wagama mo’gulheselegi a’geat de, hat yogodak hwerli en niak hesa’go holu modok hebit welegen ai o. 17#Wah. 16:4Asogo taga legen ai en, nis Nenaik ’gain Onuk Logo a’ge en disogo mo’gulhesi,

An en pobuk tik a’ge hil holuk e,

At ebe ’gain Onuk Logo a’ge hegi, oluk pobirak nobouwayat o, oluk egei. Holuk e, an yogodak ’bouwa’gun yu ik ogum pam ’bo pasuam e, ik mep modok ema o. 18Asogo agoam, hiane ’berlegat waremarik e, ik e’ben modok wiak agoam, aphwami Mesir a’ge ik yu no’gu lema modok erlak ani o, oluk mo’gulomup o,” oluk mo’gulesi. 19Asogo mo’gulesirik, pobuk at Nenaik ’gain Onuk Logo a’ge en e, at Musa mesik disogoat mo’gulesi,

“At Harun en o’bouwa’gun ano wik-wok e, ik Mesir a’ge lok o’gwe wei o’gwe ’berlek emin, ’galok wogo’gwe ye’gelak a’ge emin, omugwe ye’gelak a’ge emin, e’gik en ’bouwa’gun ano tenak welat ik ogum hegit ’bilhasuam e, ik o Mesir di owi yu owi ’berlegat ik uong petne a’ge ogo, helep heli’gogo ogola ye’gelak a’ge ogo, ’berlegat mep nak agalat, tuagoluk, mo’gulemin o,” oluk mo’gulesi.

20Asogo mo’gulesimu, Musa Harun emin Nenaik ’gain Onuk Logo a’ge en,

Disogo tip, asogo tip, oluk mo’gulentesi a’ge ’berlegat at ’gain ano emin, osi emin, enilem tagalat, at Harun o’bouwa’gun ano wesirik e, ik Nil ogum hegit e’gik en ’bouwa’gun ano tenak welat ’bilhesimu re, ik ebano mep nak aga. 21Asogo mep nak agama, hiane ik Nil ogola welaga a’ge ’berlegat waragarik, e’ben modok sang egeimu, aphwami Mesir a’ge ik ano modok no mia aga. O Mesir ebano di owi yu owi ’berlegat mep nagat welaga. 22Asogo a’geat de, is ap Mesir asuagun a’ge ebano en enasua a’ge pam asogoat togu legesa o. Ai en e, at ’gain ano ede modok helep ’gela’ge at welat at Nenaik ’gain Onuk Logo a’ge en egei hegitsogoat Musa Harun emin eniak esa’go holu ebirat welaga ai o. 23Asogo welat, togolik owi pam welagama ebano ’gwi lasulat, wene elalinat aga a’ge ano ebakhenneat ukpesi.

24Is aphwami Mesir a’ge ik Nil ano modok no mia aga ai en e, enebe ’berlegat ik esa’go’gwe eba ik no’gulom a’ge heratugulat ik omugwe a’bigat paligisa. 25At Nenaik ’gain Onuk Logo a’ge en ik Nil hweim pesirikmu en, agauwa sabiren welegesa.

Currently Selected:

Keluaran 7: Wul

Highlight

Copy