Keluaran 9
9
Wene huabenak a’ge re Allah en ou edip wiak a’ge pam wam di a’ge yu a’ge ’berlegat weregei wene
1Asogo agama, pobuk at Nenaik ’gain Onuk Logo a’ge en e, Musa disogo mo’gulesi,
“Hebe at ’gain Firaun e’bek loluk e, aphwami Ibrani a’ge enaik ’gain Onuk Logo a’ge Allah en e, disogo egei ip o,
An neiyagai en an erliknobogu lemagoluk peragonobomup o. 2A’ge re, hat en e,
Is lo re, nebit, oluk tenagenebagun holuk, 3ou onogorlok a’ge hat huam ’berlegat kuda emin, keledai emin, unta emin, sapi emin, domba emin, kambing emin, ene’bek hat he’bek emin perakpou weik ai o. 4An en e, aphwami Israel a’ge onuam pebisogo mesigat nak holuk mesik woru erlakma en ukpasulat, his aphwami Mesir a’ge honuam nak e, modogat werik o. 5An Nonuk Logo a’ge en werigoluk egi a’ge ai, o huberat tigoluk egi o, oluk egei, oluk mo’gulomup o,” oluk mo’gulesimu mo’gulesi.
6Asogo toluk loruk ’gela’ge, at Nenaik ’gain Onuk Logo a’ge en egei hegitsogoat tisoam, aphwami Mesir a’ge onuam modogat waraga. Asogo waretil lagama, wam aphwami Israel a’ge onuam mesik nak ogo warom modok erlakma en op nak welaga. 7Asogo agama, at ’gain ano en elalin aga a’ge ai paget aphwami hin wogentesimu, is en e,
“Wam aphwami Israel a’ge onuam nak e, mesigat nak ogo warom erlak o,” oluk mo’guligisa a’geat de, at ’gain ede modok helebat agarik, aphwami Israel a’ge louwagoluk peragonobo ebirat welaga.
Wene hebarlik a’ge re, Allah en ’bot enebetne yarluk takpesi wene
8Asogo agama pobuk Nenaik ’Gain Onuk logo a’ge en e, Musa Harun emin disogo mo’gulentesi,
“His en ul odouk narlogumu eba a’ge logon hene’gik en wik-wok e, Musa en at Firaun ano il pam ’bulogo ’bogorl akhit hwikha ligomup o. 9Asogo hwikha ligorogupmu re, ul ai o Mesir en di owi yu owi eba modok weiyalogo louwa o. Asogo louwarik aphwami enebam emin, wam, tue, ’baik ebam emin, ’bot wiak a’ge enebam emarik supsogo re, mulen a’bigat libaga lema ani o,” oluk mo’gulentesi.
10 #
Wah. 16:2
Asogo mo’gulentesimu, Musa Harun emin ul woluk at ’gain ano e’bek legesarik e, at Musa en ul ano wesirik e, ’bogorl pam ’bulogo hwikhai ligagama, ’bot aphwami enebam emin, wam, tue, ’baik ebam emin, enebetne til lagarik, supsogo mulen liplau waga laga. 11Asogo tisokhwe is aphwami Mesir a’ge enebe ’berlegat enebam ’bot a’bik aga ai ’gela’ge, is ap asuagun a’ge ebano en ogo re, ’bot enebam modok a’bik aga ai en, at Musa e’bek no’gosogo lo ’gela’geat aga. 12Asogo agama, at Nenaik ’gain Onuk Logo a’ge en egei hegitsogoat, at en ’gain ede modok helep ’gela’ge takpesimu, at en e, Musa Harun emin eniak esa’go hologo tu erlakma en ugenebesi.
Wene tabit a’ge re moru hagarle’gen enebam ’belakpou waga wene
13Asogo agama, pobuk Nenaik ’gain Onuk Logo a’ge en e, Musa disogo mo’gulesi,
“Hat hebe huberat siaksogo re, at Firaun ano e’bek laguntik e,
Nis aphwami Ibrani a’ge Nenaik ’gain Onuk Logo a’ge Allah en e, disogo egei ip o,
An neiyagai en An erliknebi louwagoluk e, peragenebemin o. 14Hat en e,
Aphwami ’gwiangma yema ’berlek en erliktogwi a’ge at Allah emin walhoma re, mia hegi, oluk pobi tinogoluk, An en yogodak wene is hat hosi a’ge emin, aphwami ’berlek emin, is nak wene enebam paik erlak o. We, hat hebe heminat henebam paik o. 15An en ou henebam perakpou welema re, hat hebe emin, aphwami ’berlegat emin, modogat warelep o. 16#Rom. 9:17Asogo a’geat de, di a’ge yu a’ge onugontogwi ai ’gela’ge, An Nanni onukhiasuam, An Nonuk o di owi yu owi louwagoluk, hebe modok wathobu erlakma en ukhebegi ai o. 17Asogo a’geat de, hat hu’gwarek en erlikhwerlasulat e, An neiyagai louwagoluk modok peragonobo erlakma enat welegen o. 18An en o loruk mo yogodak ya ’gela’ge moru hagarle’gen onogorlok a’ge o Mesir yema page en hwerli yogodak hwerli mesik nasu modok erlak a’ge hene’bek perakpou weik o. 19Holuk e, hat en e, honuam emin, hena’ge di a’ge yu a’ge emin, odip o’gwe ’berlegat, olo’gwe degelogo ’gwelabil louwagoluk mo’gulontomup o. Aphwami emin, onuam emin, ’berlegat olema ’gwelabu erlakma odipmu welema holuk, ’berlegat moru hagarle’gen en modok waronobua o, oluk egei, oluk mo’gulontomup o,” oluk Musa mo’gulesimu ’gain ano mo’gulesi.
20Asogo mo’gulesimu, is ’gain osi logon Nenaik ’gain Onuk Logo a’ge en egei a’ge ai onogorlok agarik e, eneragam a’ge wam di a’ge yu a’ge o’gonogwi a’ge enebe emin, wam emin, o pam moru yethouwano oluk olo’gwe wogonoboluk ’gwi legesa. 21Asogo ’gwi legesema, is logon wene enebabut heberlemagoluk mo’gulentesi a’ge ano onogola en mi-miarak poluk, eneragam a’ge wam o’gonogwi a’ge enebe emin, wam emin, o pam woluk ’gwi lo erlakma en leimu ebano ukpegesa.
22Asogo tigisema, at Nenaik ’Gain Onuk logo a’ge en e, Musa disogo mo’gulesi,
“He’gik ’bogorl akhit pei ligemin o. Asogo pei ligagoam e, moru hagarle’gen o Mesir di owi yu owi ’berlegat ’bu agalat, aphwami enebe emin, onuam emin, warenebiselat, di a’ge yu a’ge yabukmu yogo a’ge ’berlegat wiagap pasulat, tua o,” oluk mo’gulesi. 23Asogo mo’gulesimu, at Musa o’bouwa’gun ano ’bogorl akhit pei ligagama re, Nenaik ’gain Onuk Logo a’ge en ’gwiangma obinal yebekhauwagalat, orlolu modok lok a’ge ’baktak pou wagalat, tagalat e, moru hagarle’gen ’gwiangma ’belakpou wagalat e, 24#Wah. 8:7; 16:21moru hagarle’gen onogorlok a’ge emin, obinal yebeksogo pou wagalat pei lasulat tegei a’ge emin, perakpou waga. Nadugat, o Mesir eba o moru hagarle’gen ai ’gela’ge nasukhwe modok ho erlak a’ge welegesarikmu en, ai erligeat perakpou wagama pobuk ai ’gela’ge mesik ho erlagat o. 25O Mesir en di owi yu owi moru hagarle’gen ai nasulat, aphwami enebe emin, onuam emin, odipmu welegesa a’ge warenebiselat, yabuk o’gwe di a’ge yu a’ge owi yogo a’ge ’berlegat wiagap pasulat, tiselat e, e dek-daksogo modok pesi. 26Asogo a’geat de, aphwami Israel a’ge welegesema o Gosyen nak e, moru hagarle’gen ai no erlakma en ukpesi.
27Asogo tegeimu, at ’gain ano en e, Musa Harun emin worlentesirik e, disogo mo’gulentesi,
“An modok wiak tegis o. His henaik ’gain Onuk Logo a’ge ai demat tagokhweat de, An nebe emin, aphwami ’berlegat emin, at il pam wiak tige o. 28His pobuk o yema wolorogup erlak o. Perakhenebaikmu re, nis o moru hagarle’gen orlolu o’borlogouk modok ’bageselat wiaksogo watnenebegei ai ene henaik ’gain Onuk Logo a’ge mo’gulomup o,” oluk mo’gulentesi.
29Asogo mo’gulentesimu, at Musa en at disogo mo’gulesi,
“Hat en e, ’gwiangma yema eiye re, his henaik ’gain Onuk Logo a’ge arat o, oluk pobirak pagun en e, an perleneat o seli lokma en odipmu libagalat, ne’gik lagabak poluk naik ’gain Onuk Logo a’ge ’gonu mo’guleikmu re, moru hagarle’gen orlolu iak ’bakoso a’ge ai erlak ema ani o. 30Asogo a’geat de, hat hebe emin, hosi emin, nis Nenaik ’gain Onuk Logo a’ge honogorlok modok ho erlakma en honogola en mi-miarak pogu legep o,” oluk mo’gulesi.
31Moru hagarle’gen en asogo wiagap pasulat, eria hegit herle esi wogwi a’ge onuk rami yogo a’ge e’gen arat ’buk a’ge palogulat, ye, no’gwi a’ge onuk jelai yogo a’ge ebe eselat, tisoma no oluk e, modok wiagap pesi. 32Asogo wiagap pesimu, gandum emin, e’gen egesiso a’ge logon emin, e’gen egesiso erlak ai en wiagap po erlakma en obat welaga.
33Musa en at Firaun ano ukpoluk o kota o’borl akhit liplau wagarik, e’gik lagabak poluk Nenaik ’gain Onuk Logo a’ge ano ’gonu mo’gulesi. Asogo ’gonu mo’gulesimu, ai erianoat orlolu iak ano ’garok eselat, moru hagarle’gen lok ano ’garok eselat, moru ’balagalat, tegei. 34Asogo tisoam at ’gain ano il hesirigat de, pobuk wiagat tegei. At osi enemin enede modok helebat agarik, 35at Nenaik ’gain Onuk Logo a’ge ano en,
Is asogo tu a’ge paget Musa mo’gulesi ’gela’geat, at Firaun en,
“His aphwami Israel a’ge lit o,” oluk mo’gulonto ebirat aga ai o.
Currently Selected:
Keluaran 9: Wul
Highlight
Share
Copy
Want to have your highlights saved across all your devices? Sign up or sign in
