Keluaran 24

Musa en e, “Allah en mep yu pam wene wusogo wokhenebegei o,” oluk mep ano enebetne weragenebesi wene

1Pobuk e, nenaik ’gain Onuk Logo en Musa disogo mo’gulesi,

“An ne’bek orlu orogun en e, hat emin, Harun emin, Nadab emin, Abihu emin, aphwami Israel a’ge onuelak enebe 70 a’ge logon emin, enemin orlu oroguntik e, is enebe walekma eba welat ondogorlu pam hurotluk an erliknobuak o. 2Asogo oruakhwe, Musa hat homu nak e, an ne’bek horoksogo manup o. Asogo a’geat de, is ai an ne’bek horoksogo wagalat, is aphwami Israel a’ge ’berlegat dom yu pam orlu agalat, tu modok mia o,” oluk mo’gulesi.

3Asogo mo’gulesimu, at Musa wagarik e, Nenaik ’gain Onuk Logo a’ge en disogo yusogo togulom a’ge oluk mo’gulesi a’ge emin, wene ’belak a’ge pam louktak til lasulom a’ge emin, mo’gulentesi. Mo’gulentesimu, is aphwami Israel a’ge enebe ’berlegat eniak la’bulogoat disogo egesa,

“Nis en Nenaik ’gain Onuk Logo a’ge en wene mo’gulnentesi a’ge ai ’berlegat hegitsogo nak togu lomul o,” oluk egesa. 4Asogo egesema re, at Musa en Nenaik ’gain Onuk Logo a’ge en,

“Disogo togu lomup, asogo togu lomup,” oluk mo’gulesi a’ge ano ’berlegat pelal wesi. Pelal wesirik, dom edipmu eba wam di a’ge yu a’ge Allah paget wusogo odouk narlik obogulomma ebale ebe helo’gogulat, oyuk helep a’ge 12 pam heli’gogo edikpesi. Helep delak pesi ai ebe lo’bok e, aphwami Israel a’ge ena’gul onuk lo’bok enebaget dalogo pesi o. 5Asogo heli’gogo pesirik, ap souwe a’ge logon en di a’ge yu a’ge Nenaik ’gain Onuk Logo a’ge paget wusogo narlogulat Allah emin la’boluogoluk wam sapi pema werak poluk se’gerlogo pou wagoluk yo’go enebesirik, peragenebesi. Peragenebesimu asogoat tigisa. 6Wam sapi ano werak poluk se’gerligisema, emep at Musa en na’gwegeitik e, pema loyang ogola nanghegeik, pema wam di a’ge yu a’ge Allah paget wusogo odouk narlik oboma ebano o’borl pam ’gwisaliselat, tegei. 7Asogo tegeirik, Nenaik ’gain Onuk Logo a’ge en wene,

Disogo togu lomup, asogo togu lomup, oluk nenesa’go weregei a’ge Musa en pelal wokho pesi a’ge ano wesirik e, iak loksogo aphwami Israel a’ge holuagoluk onuk tualegeimu, is en e, disogo egesa,

“Nis en e, Nenaik ’gain Onuk Logo a’ge en wene nenesa’go wusogo,

Disogo togu lomup, asogo togu lomup, oluk mo’gulnentesi a’ge ai ’berlegat hwelak poluk togu lomul o,” oluk mo’guligisa.

8 # Mat. 26:28; Mrk. 14:24; Luk. 22:20; 1Kor. 11:25; Ibr. 9:19-20; 10:29 Asogo mo’gulegisema, at Musa en e, mep loyang ogola na’gogo pesi a’ge ebano wesirik e, is aphwami Israel a’ge enebetne ’gwete hil lasulat e, disogo egei,

“Nenaik ’gain Onuk Logo a’ge en wene nenesa’go wusogo,

Disogo togu lomup, asogo togu lomup, oluk mo’gulnentesi a’ge ai hegitsogoat, Allah en mep yu pam wene wusogo wokhenebegei o,” oluk mo’gulentesi. 9Asogo mo’gulontoluk e, Musa ebe emin, Harun emin, Nadab emin, Abihu emin, aphwami Israel a’ge onuelak enebe 70 a’ge ebano emin, enemin dom pam ligegesa. 10Ligegesarik e, aphwami Israel a’ge enaik Allah ebe o holu helep onuk nilam a’ge ’gela’ge il ’bogorl lalu ’gela’ge modok dakharak a’ge ’gela’ge pam edik oruakma enil hegesa. 11Aphwami Israel a’ge onuelak ai en Allah ebe enil hegesa a’geat de, enebe re, waronobu erlak. Asogo Allah arat enil hegesarik e, so’boru emin, ik emin, ne’gesa.

Musa dom Sinai pam ligagarik tegei wene

12Pobuk at Nenaik ’gain Onuk Logo a’ge en Musa disogo mo’gulesi,

“An ne’bek dom pam erli suk o. Orlu agoam yema en e, eba welat, wene henesa’go weregis a’ge ’berlegat helep ebe ’biren ebak a’ge pam pelal wegi a’ge yu aphwami Israel a’ge mo’gulentagun en wokheik o,” oluk mo’gulesi. 13Asogo mo’gulesimu, Musa ebe emin, lethasu laga a’ge Yosua emin, e’birek en degelogo pegesarik e, at Musa Nenaik ’gain Onuk Logo a’ge ebe welagoma dom pam eba ligaga. 14Owan legeigoluk aphwami Israel a’ge onuelak 70 eriano disogo mo’gulontoluk ligaga,

“His e, o sum owi werikmu yemayat yetnentarok wolomup o. Oruakma, nis togolik hene’bek womul ani o. A’geat de, Harun Hur e’birek henemin yema welema o. Holuk e, his wene henebam mesik ago holuk, is en ’beli’gogo erlagap pogu lemagoluk ene’bek waga lomup o,” oluk asogo mo’gulontoluk ligaga.

15At Musa asogo mo’gulontoluk, dom Sinai pam ligagama, o hena mesigat hiktak a’ge en sebelak pesi. 16-17Sebelak pesimu, at Nenaik ’gain Onuk Logo a’ge ebe emin welegesa a’ge ano amolit yebek-yebek dom pam ’bu agoam e, aphwami Israel a’ge en e, odouk dom ano duk ebe pam en e, magale ’gwielak a’ge ’gela’ge enil likhegesa. Agauwa hebarlil hebarligen o hena dom a’gul ano sebelak modok welagarik, agauwa mesik sabit a’ge ai pam en Nenaik ’gain Onuk Logo a’ge ebe o hena ano e’gerlakma en Musa worlhesi. 18#Ula. 9:9Worlhesimu, Musa ebe o hena sebelak welagama a’gul pam ’gela’ge ligagarik o hena e’gerlakma ’gwi laga. ’Gwi lagarik, hup erlige modok eba agauwa 40 pam welaga.

Currently Selected:

Keluaran 24: Wul

Highlight

Copy