Keluaran 25
25
Allah owi sabo woru a’ge paget odoktu wene
1At Allah en Musa mo’guleselat,
2“Is aphwami Israel a’ge is ogo onomu-onomu enede en e, an woknoum a’ge enede tagenebasu holuk e, an nebaget pulogo nobou magoluk, mo’gulentagunmu re, 3pou wagai holuk, hat en odoksogo pasulom ano re, yu o, emas emin, perak emin, tembaga emin, 4domba asu pam herle tuelak sakhorak a’ge emin, ’borlu ’belak a’ge emin, ’borlu ’belak a’ge ’gela’ge pam tuelak a’ge emin, kain ebelak op a’ge emin, kambing asu emin, 5domba ierak a’ge agap, ’borlu ’belak a’ge emin lumba-lumba hiane, laut ogola welago a’ge agap emin, e op a’ge orlobuk emin, 6esaga heberlogwi a’ge a’bosu emin, e’ben op a’ge enebam egelogwi a’ge a’bosu emin, odouk narlogwi holuk e’ben op ago a’ge emin, 7Helep ye e’gen a’ge emin helep il mu-mu a’ge walomu werak a’ge ’gela’ge emik sum pam werak a’ge emin, ano a’ge pam at an nebe eiye a’ge osum yat ebagal hele’gik a’ge efod ano pam walomu werak a’ge ’gela’ge emik pam ’buktak wolom a’ge emin, odoksogo poluk, 8An wolomma nebaget worogwi holuk e, an is eneminat weleik o, 9ye, worogulat o, ebe woru a’ge emin, werikmu di a’ge yu a’ge tugulomma ’berlegat emin, disogoat togu lemak o, oluk walhegeik mo’gulhoso holuk e, ai ’gela’geat togu lemak egei, oluk, mo’gulontomup o, oluk, mo’gulesi.
’Gain Onuk Logo a’ge e peti hele’gu wene
10E kayu penaga a’ge pam peti ano hele’gogulat e, yat akhit e, 110 senti pam heli’gogo pogulat, no’gorlik e, 66 senti pam heli’gogo pogulat. Abel legeik akhit e, 57 senti pam heli’gogo pogulat, tigisa. 11Peti ano e orlobuk a’ge pam hele’gogulat e, emas a’ge pam lo’boksogo e, hele’gigisa. Peti abel akhit emin, legeik emin alo’gwe akhit emin, o’borl akhit emin emas a’ge pam nak o’borl olukhwe ogola akhit emin, o’borl akhit emin hele’gigisa. Ye, peti o’borl akhit e, asogo emas pam o’borl olukhwe takpoluk enat de, peti emde esa’go’gwe re, we emas a’ge pam nak hele’gik pegesa. 12E yerak woluk laga lemagoluk, emas a’ge pam tigene ugan pam ikho hettak abel pema ’biren pema ’biren, ugan pam ikho poluk, ologun-ologun ikho oboktak pegesa. 13E’go’gorak woluk lagalom a’ge ano re, e a’ge orlobuk de emas pam hele’gik a’ge pam woluk laga legesa o. 14Tegine ikho lo’boktakma ebano lisogo pouwak o. 15E, e yerak woluk lagalom a’ge ’gwelebak pegesa ano re, lisogo hwikho erlakma en ’gwelebak nagat welemak o. 16Ye, ne peti hele’gik a’ge ogola ai re, disogo tip, asogo tip, oluk wene werak helep pam pelal wokho wokheik a’ge onoat yagasogo pouwak o.
17 #
Ibr. 9:5
An nemin hwedik so’buagalomma ne peti hele’gogwi a’ge emde lo’boksogo po ano re, emas il op a’ge ai a’ge pam nak ologun wi-waling yat akhit e, 113 senti pam, no’gorlik e, 57 pam, heli’guak lemak o. 18Is malaikat ’gela’ge Kerub ai ene’gik en emas, a’ge pam ’biren heli’gogo re, peti ano ologun pema-pema emde o’borl pam edikpegesa. 19-20Peti wene wusogo wogenebegei a’ge ano emde o’borl pam ologunmu malaikat abel pema-pema ’gela’ge onuk kerub ai ebe ’biren alo’gwe modok-modok ningsogo yogo poluk e, enagapsaburl hebilogo legeik poluk wene wusogo wogenebegei a’ge ano emde sebelogo welat, are agapsaburl en e, are agapsaburl ologun diptak welat, onorogole mesikmu hegirap poluk, enagapsaburl langsogo welat, tuak o. 21Asogo takpogu lemarik, disogo tip, asogo tip wene werak helep pam pelal wokho wokheik a’ge ano niak ’balogo pegimu eba yagarak poluk osolup lasogo pomup o. 22Lasogo pasu holuk e, nepeti hele’gikmu malaikat ’gela’ge kerub ogut ’biren welago a’ge eriano enebam An hwedik so’bu eiktik, is aphwami Israel a’ge en tugu lemagoluk, disogo tip, asogo tip oluk, eba enat mo’gulhosokhwe taga lorogun ani o, oluk, egei ai o, oluk mo’gulontomup o,” oluk mo’gulesi.
So’boru roti werakho ebale pogulomma e meja dalu wene
23Mo’gulesirik, meja op a’ge hele’gigisa ano ebe re, disogo, e orlobuk op a’ge pam e, meja ebe yat akhit e 90 senti, horok akhit emin likho akhit emin e, 45 senti pam heli’gogo pegesa. 24Emas ai a’ge pam nak o’borl olukhwe lo’boksogo pogu lemarik, e dalu a’ge ano eragam o’gwe wali’gogo wali’gogo pouwak o. 25E orlobuk a’ge pam meja delak pegesa a’ge ano o’borl olukhwe re, emas a’ge pam lo’boksogo poluk e, eragalet ma’bu re, ap ene’gik da’ge o’gurl pam en ’bekhit dum pam hwerli a’ge ’gela’ge heli’gogo pogulat, emas a’ge pam nak hele’gik pogulat, eragalet esa’go akhit ogo re, we emas a’ge pam nak wali’gogo hele’gik pouwak o. 26-27Tegine e yesogo woluk lagalom a’ge paget ebe ugan emas a’ge pam ikho meja esa’go ’bi legenak a’ge ologunmu meja oyogut horoksogo ikho pouwak o, asogo poma tigene ai re e yesogo woluk lagalom a’ge paget pulogo welemak o. 28Ye, e dalu a’ge ano e yerak laga lemagoluk e orlobuk a’ge pulogo poluk, emas pam lo’boksogo pogulat, tuak o. 29Asogo tugu lemarik, An Allah nebaget pogwi a’ge dalogo pogulomma piring emin, ik nogwi mangkok piala a’ge emin togoluak a’bosu na’gogwi a’ge emin, ik na’gogo no’gulom a’ge emin, emas ai il op a’ge pam nak ebale heli’gogo pogu lemarik e, 30#Ima. 24:5-8An nebaget meja dalu a’ge ano o’borl pam pou waga lemak o, so’boru roti werakho emas a’ge pam nak wali’gogo ebelogo pouwak o.
Esaga heberlogulom a’ge paget ebale hele’gu wene
31Mo’gulesirik, pobuk nin disogo mo’gulesi,
“Esaga heberlogo pogulomma ebale emas il op a’ge pam hele’gik poluk pulogo pomup o. Ye, oyuk yogo a’ge emin, ebagase o’bo petne emin, he’gik enat heli’gogo pomup o. Esaga ’gwialogo pogulomma ebale emin e awil hele’gik a’ge emin esaga magale ’gwiok uak oluk ’gwani hogwi a’ge onuk tombol ano emin, oyogut mesigat a’ge pam nak yogo welat hwedik welemak o. ’Berlegat ai re, emas a’ge pam nak hele’gik welemagoluk he’gik en heli’gogo pomup o. 32Ede’bi 6 pam at oruagap poluk, pouwak o. Ede’bi 6 ano re, ebe mesik a’ge en ede’bi ’gwe henagan pogulat, edip o’gwe henagan pogulat, tuak o. 33Ago hebarligen oruak a’ge ano pam en e, ago hundomok welat mangkok ebe henagan-henagan hebarlik pam welat, e sin e’gen ai ’gela’ge emin e awil a’ge emin, odouk magale uagoluk ’gwiok takpogwi a’ge onuk tombol ai emin esaga uak hebarligen eriano ebe ’berlegat hegitsogo nak heli’gogo pouwak o. 34Esaga ’gwialogo pogulom a’ge uak’burl a’ge ai pam e, e sin e’gen ’gela’ge ugan pam at heli’gogo pogulat, e awil emin pelita ’gwial uak oluk waling hogwi a’ge tombol emin, eminat heli’gogo pouwak o. 35Esaga uak ano pam en e’gik ’birenak a’ge ’bekhit hware daintak poluk esaga ’gwialogwi a’ge re ’burl mesik nak welemagoluk, asogo nak esaga ebe henaganak a’ge ebe elitsogo asogo nak heli’gogo pouwak o. 36Ye, ologun pam en ’bekhit edip hwedikmu annisogo modok welemagoluk e’gik no’gorlik legenak a’ge ai lekho hopsogo tiang uak ’burl ligegenak a’ge ai pam esaga ’gwialogwi a’ge hele’gik pouwak o. ’Berlegat ai re, emas il modok op a’ge pam nak hele’gik pouwak o. 37Ai, tugu lemarik ologun ’berleksogo esaga ebe 7 heberlogulat tuak oluk heli’gogo poluk, telakma atiarak welemagoluk hweriogo pil louwak o. 38Esaga lampu ai demogo wolom a’ge emin aganhan en ene’gik saplisogo tenhogwi a’ge emin ai re, emas il op a’ge pam nak hele’gik pouwak o, oluk mo’gulesi. 39Ye, esaga ebe emin, demogo emin, demogo pogwi a’ge poluk emas op a’ge e’gin 34 pam walholuk heli’gogo pouwak o. 40#Per. 7:44; Ibr. 8:5Hede opsogo eberin o! An en dom Sinai pam en wene ’berlegat mo’gulhegis a’ge ano emin an en esaga disogo heli’gogo pogu lemagoluk mo’gulhegis a’ge emin opsogoat togu lomup o,” oluk, Musa mo’gulesi.
Currently Selected:
Keluaran 25: Wul
Highlight
Share
Copy
Want to have your highlights saved across all your devices? Sign up or sign in
