Keluaran 23

Wene demat a’ge nak hwalogo mo’gulontogulom wene

1 # Kel. 20:16; Ima. 19:11,12; Ula. 5:20 Mo’gulesirik, Israel mo’gulontouwagoluk Musa pobuk mesik mo’guleselat, wene eniak esei wene eniak esei a’ge paget, wigalil lagalom mia o. Ap mesik demat wiak tago a’ge oruakhwe, tu erlak o, oluk, eli wo mia o. 2Is aphwami a’bigat wiak tu a’ge enede ebetil lagai holuk e, is enemin ebetil lagalom mia o. Aphwami onuak lolonobogwimu ebano, is mesik en laga lemarik, wiak demat tagoamat de, is aphwami en, wiak tu erlak o, ogwi holuk, wiak o’go pouwa erlakma re, at iak emin lo’bok tu mia o. 3#Ima. 19:15A’geat de, ap e’gikmu erlak a’ge mesik en wiak tago holuk e, onuak lolonobogumu ebano en ebe nede oluk eli wo mia o.

4 # Ula. 22:1-4 Ap mesik is enemin il ’belak a’ge uam sapi a, keledai a, nalagoam enil hogu lemarik, ukpo mia o. At e ukpo erlakma en perlenesogoat togolik woluk uam eiye a’ge ano wogesi louwak o. 5At emin il ’belak a’ge uam keledai ano e’gin a’ge woluk lasulat, e’gin en wathorlouwa a’ge enil hogu lemarik holuk ogo re, ukpo mia o. A’geat de, hemin il ’belak a’ge uam ano e’gin selangsogo louwagoluk o’bo’gorl pam wasu a’ge ano logon wokho yo.

6 # Ima. 19:15; Ula. 16:19 Ap e’gik erlak a’ge uak loligoluk wago holuk e, ap yu mia atma re oluk, owene yogun-yogun ’balu mia o. 7Ap mesik en tu erlakhweat de, tegei at o, oluk ogwi holuk e, eniak mesik emin ebam lo’bok tu mia o. Aphwami wiak togwi holuk e, an en ukpaik erlakma re, ap mesik wiak tu erlakhwe wusogo pogulat, ye, an demat wiak ai tu erlak o, osokhweat de, tigenat o, oluk wusogo pogulat, tu mia o. 8Wiak togwi a’ge o’go disogoat pogulom o, oluk, wene werak oruakhweat de, pagup erlak oluk, mo’gulemagoluk uang hisakho wogogwi ano re, ap onowene demat opsogo ’balu a’ge oruakhweat de, enil hepnik a’ge en togwi ’gela’ge takpogulat, ye, nonowene op at ’balul, oluk, lagai ano re lal ’bal tagonobogulat, wiak tu erlakhweat de, egepma o, oluk, is ap op a’ge ebano ene’gerli werak onobogulat togumu re, asogo tuagoluk, uang wogontogwi holuk e, wo mia o.

9 # Kel. 22:21; Ima. 19:33,34; Ula. 24:17,18; 27:19 Is o pageat o Mesir en ap ’bok a’ge ’gela’ge oruakhwe e’gin-pe’ginsogo tagonobogu legesa a’ge ebano enalukmu re, is aphwami ’bok a’ge ene’gerlakma oruak holuk e, e’gin enebam pogulom mia o, oluk mo’gulontouwak oluk mo’gulesi.

Tahun 7 emin, agauwa 7 emin togulom wene

10 # Ima. 25:1-7 Mo’gulesirik, mo’gulontouwak oluk, pobuk mesik emin mo’guleselat e,

“Is en owi yorogulat, e’gen ’balogo odoktugulat, togukhwe tahun 6 tugu lemarik, 11tahun mesik lau wagoam nak e, so’boru yorogu legep a’ge ebano arat warlik ago holuk e, is aphwami ene’gikmu erlak a’ge en dakhorlogu lemarik ado pema pogwi a’ge ebano wam maro en nasu holuk e, e e’gela lebemak oluk, yabuk wo erlakma en ukpouwak o. A’geat de, e anggur owi yogo a’ge emin, e zaitun emin, hegit-sogo asogo nagat togulemak o.

12 # Kel. 20:9-11; 31:15; 34:21; 35:2; Ima. 23:3; Ula. 5:13,14 Agauwa 6 a’ge pam yabuk tu obat a’geat de, loruk o’gwe en nak e, his yabuk tugulom erlakma en weat wolomup o, onuam lembu, sapi ebano set hwalhorlogulat, ye, is eneminat, eneragam a’ge enemalik eneminat, ap ’bok ene’bek wegesa a’ge ebano eneminat, onogola enagaisogo set hwalhorlogulat, tuagoluk yabuk tu erlakma en set hwalogo weat welemak o.

13An en di wene yu wene mo’gulentasu legi a’ge ano ukpo erlakma en modok opsogoat wogo poluk tugu lemak o. Ye, ap mu a’ge enasua pam ’gonu ogulat, henemdema en ononuk ’balogulat, tu mia o,” oluk, mo’gulontouwak oluk, mo’gulesi.

Tahun mesik ogola agauwa henaganam seni sorogulom wene

14Mo’gulesirik, pobuk mesik emin, mo’gulontouwagoluk, mo’guleselat, Tahun mesik tak a’ge ogola is en erliknobogulat agauwa henagan onogola enagai en seni lok a’ge sorogu lemak o. 15#Kel. 12:14-20; Ima. 23:6-8; Bil. 28:17-25Dugwi naduk Abib pelelak a’ge pam an o Mesir en wogonoboluk liplau wagalat, seni onuk roti periso erlak a’ge sorogu lorogup ani o, oluk, agauwa pulogo pegi a’ge ano onogola enagaisogo sorogulat, an en mo’gulentegis a’ge ano hegitsogoat, agauwa naduk a’ge pam en ’bekhit agauwa 7 a’ge pam roti peruagoluk ragi pogwi a’ge po erlakma en roti werakho no’gulemak o. Is an erlik nobuok oluk wagalat, an nebaget po a’ge ene’gikmu erlak a’ge ene’gik ’golo wom mia o.

16 # Ima. 23:15-21,39-43; Bil. 28:26-31 Di a’ge yu a’ge owi yogo poluk e’gen naduk-naduk hurle ago a’ge ano ’balogulat, onogola enagaisogoat seni onuk e’gen naduk ’balo’gwi a’ge ano paget sorogulat, pobuk nin di a’ge yu a’ge e’gen arat hurle ago a’ge holuk ’balogo odoksogo pou wagaihwe, tahun ologun pam lai lasu holuk e, onogola enagaisogo seni onuk e’gen ’belak odoktogwi a’ge ano sorogulat, togu lemak o.

17Tahun mesik a’ge pam agauwa henaganam seni sorogulom paget, is ap nak ’berlegat an notok modok welago a’ge henaik ’gain nonuk Logo a’ge an neragam waga lemak, o.

18An ne’bek wagalat nebaget wusogo woknogulat, emep ano emin, di a’ge yu a’ge ragi poluk worogo a’ge emin, woknosuom mia o. Ye, an erlik nobuok oluk seni sorogulat, nebaget wusogo woknogwi a’ge esei ebano owan soru erlakhwe, o dakha u mia o.

19 # Kel. 34:26; Ula. 14:21; 26:2 Di a’ge yu a’ge e’gen naduk egeik a’ge modok arat hurle op a’ge holuk nak wokho an enaik Allah nowi werikmu pou waga lemak o, ye, kambing domba emalik wusogo soru holuk e, enia agamu a’bosu pam soru mia o, oluk mo’gulontouwak oluk mo’gulesi ai o.

Malaikat naduk perakpou wom wene

20Mo’gulesirik, Musa pobuk mesik emin mo’guleselat, “At malaikat en naduk otluk, ’gebela lis hoboluk lasulat, ago-ago naduk wokhoboluk o an en lik louksogo pegimu ebano hebei louwak oluk, an ne’bek malaikat mesik yogo perakpou wagoma niagun ani o. 21Perakpou weik ano re, an niagat woluk mo’gulhentau wemma re, at ogola re an nonuk at oruak o, at yu re nenebit o, oluk, iak sagalogo pogwi holuk, at en his ogwi a’ge ai erlagapsogo paik erlakma re, at iak mo’gulhentasu a’ge ano modok pobirak poluk henesa’go hologu lomup o.

22At en mo’gulhentasu a’ge ano opsogo hologulat, ye, an en mo’gulhentasu a’ge ano emin opsogoat tugulat, togwi holuk e, his henemin weim tua ano re, an nemin weimat agalat, ye, henselei a’ge en his henemin ogorlitak ano re, An en ogo re nemin ogorli at agalat, taga leik o.

23Ye, an en peragenebasu a’ge malaikat ano en naduk otluk his ’gebela lishonoboluk aphwami Amori a’ge emin, Het a’ge emin, Feris a’ge emin, Kanaan a’ge emin, Hewi a’ge emin, Yebus a’ge emin. Ono’gwiang pam enebei lasu holuk e an en is ap ai ’berlegat wollo’gen dagalogo warenebik o.

24His en an erliknobogu legep a’ge, ebalema hondogorlu pam hurotluk enasua erliktugulat, enasua onuk logo pogu lomok oluk, onowi worogulat, is asua tugulat togwi a’ge ano ’gela’geat hegitsogo togulat, tu ai re, mia o. A’geat de, enasua ogut heli’gik a’ge ano ’goluk ’gelaksogo pogulat, enasua moluk-melaksogo ’bo pogulat, togu lomup o.

25Henaik Allah an nak erliknobogu lomup o. An nomu nak erliknobogwi holuk e, nede aganhan henebam pasulat, honso’boru emin, henegeik emin wokhentasulat, di obotut yu obotut edip ano ’berlegat hene’gerlakma en lisogo hwikhasulat, tagokhwe,

26hwami abeli welagai a’ge, enemalik ’berelogo pogulat, welagai ’gela’ge his honowi pam eba asogo tua erlak o. Ye, his modok sebal mip otluk waraga lorogup en e, heneli wogo henebasu leik o.

27Di aphwami yu aphwami ena’gul onuk lo’bok An en onogorlogap paikmu his lagai a’ge ebano enesa’go hol-holuk, wagai yema yet o, oluk, onogorlok hogulat, enede erlik eselat, takpoluk, his onogorlok en hweiye ’bogoluak oluk,

28an en gin iak orluk ai ’gela’ge orlouk a’ge perakpou weikmu is en naduk iak ’balenebi lagalat, is aphwami o Kanaan a’ge emin, Hewi a’ge emin, Het a’ge emin, mukho lebik onobouwa o,

29lebik onobo a’ge egi ai, tahun mesik pam lebik enebasu holuk ’gwiang selak ema ano pam di a’ge yu a’ge il hweiye e’gelema a’ge en onowi wusogo ’bete uano oluk,

30an en mesik-mesik ’geralhegeik mukho lebik enebasulat nak tagoma en, his heneiyagai weiyelak a’ge en ono’gwiang eba eiyetak pagathorlogu lema o.

31His wolomma hono’gwiang ebano re, orogobu ik lok yegelak Laut Merah hwerli en ’bekhit, erabu ik lok Filistin hwerli emin, ye, o lei hwerli en ’bekhit, ik Efrat hwerli emin, hwerli ’balogo paikmu re, eiyetak pagathwerlil lagalat, mukho lebik enebagup ene aphwami eba oruak a’ge ebano wokho hene’gikmu paik o.

32Is aphwami ai, enebe emin, onodogwi asua emin, henemin la’bulogo wolom a’ge paget, wene ’balogup no yo.

33Henemin welat, ’baik herle pam ’gotnok oso ’gela’ge, dogwi asua togwi a’ge mo’gologu legep ano pam ’gotnoktak honobogwiam e, an uknoboluk wiak tu ’gela’ge, his hono’gwiang pam is enemin la’bolik wolorogup ai en e, ugenebagup no yo,” oluk, Allah en Musa mo’gulesi a’ge aiat o.

Currently Selected:

Keluaran 23: Wul

Highlight

Copy