Peragenebesi 2

Allah Arogun ’bogorl pam en enebam ’belakpou waga wene

1 # Ima. 23:15-21; Ula. 16:9-11 Aphwami Yahudi a’ge seni Paskah no’gu legesarik agauwa 50 welegesarik e, hari Pentakosta welat, is aphwami enede Yesus ebam he’berik welegesa a’ge enebe ’berlegat mesikmu odoktak oruakma, 2erianoat, yasobu anni wiak punhau wagalat iak oso ai ’gela’ge, Allah ’bogorl pam en ’belakpou wagama re, is aphwami o pam hweriogo welegesa a’ge ebano ’berlegat iak enesa’go hweligisa. 3Enesa’go hweligisarik enil ’gwelakhegesa ’gal e, odouk magale abuk ’belak a’ge en pema melanghai lasulat, pema melanghau wagalat, tago ai ’gela’ge, enebe lo’bok enebam dadain lasukhwe enil hegesa. 4Enil asogo hogukhwe, Allah Arogun is ’berlegat onogola ’betesogo ’gwegei. ’Gwegeitik, Allah Arogun en,

“At ai iak disogo ese lemak o,” oluk epesi hegitsogoat, is aphwami muon eniak pam degenik lek yegenik lek uagoluk mo’gulentasukhwe elalinat il laga legesa o.

5O ai erlige re, aphwami Yahudi a’ge Allah iak hologo togu legesa a’ge, o di owi yu owi ’berlek en o Yerusalem nak odoktu egesarik welegesa. 6Oruakma re, iak egei a’ge ano enesa’go hweligisarik aphwami enebe a’bigat odoktu egesa. Odoktu egesarik oruakma, is Yesus osi ebano en is aphwami o di owi yu owi en wegesa a’ge ebano eniak lo’bok ogukhwe, enesa’go hweligisarik yuk egesa.

7Yuk egesarik erliktugulat e,

“Is wene mo’gulnontogwi a’ge yema enebe ’berlegat e, onowi o Galilea erlak no? O Galilea a’geat o. 8A’geat de, no’got agama en nis aphwami nonowi dagege a’ge neniak lo’bok ogwiam nenesa’go hologu lege epegep. 9Nis nenebe re, nonowi o Partia a’ge emin, Media a’ge emin, Elam a’ge emin, Mesopotamia a’ge emin, Yudea a’ge emin, Kapadokia a’ge emin, Pontus a’ge emin, Asia a’ge emin, 10Frigia a’ge emin, Pamfilia a’ge emin, Mesir a’ge emin, o Libia Kirene hegit etleba a’ge emin, o Roma etleba legerik nenebe o poluk ’gela’geat welegerik wege a’ge emin, nenemin welege ai o. 11Nis pema akhit demat Yahudi a’ge, ye, is pema we a’ge en nis Yahudi a’ge nene’bek ’gu otluk Allah iak wegesarik welegeat o. Ye, aphwami o Kreta a’ge emin, Arab a’ge emin nenemin oruakma, is yu en Allah anni pam elalin tiso a’ge mo’gulnentasuam, nonu’gwarek neniak lo’bok nenesa’go hologu lege yu i o,” oluk, 12enede nalagama is-is nak en erliktugulat e,

“Ai aga ai re, ebe no’gosogo hwe,” oluk egesa. 13A’geat de, is nin pema en e,

“Erlak o. Is yema anggur e’gen a’bosu ne’gesarik en enede ’balegesarik ogwi o,” oluk eneida togu legesa.

Allah iak at Petrus en mo’gulentesi wene

14Eniak asogo ogukhwe re, at Petrus ano Yesus osi enebe 11 ebano enemin welat, peiyalogo inaga. Inagarik e, iak loksogoat disogo mo’gulentesi,

“His Yahudi a’ge emin, his logon yogodak ya o Yerusalem welegep a’ge ’berlegat emin, narilak norokhwi. An wene ik a’ge yu henaluk orogup en e, henesa’go hwelip o. 15Yogodak hubet jam 9 agama welege ya i o. A’ge re, jam eria ’gela’ge pam anggur e’gen a’bosu noluk enede ’balagai erlakma no oluk e, his en,

Is yema re, anggur e’gen a’bosu noluk enede ’balegesarik ogwi, oluk opogu legep ai re, erlakmayat o. 16We, at Yoel Allah iak mo’gulentasu laga a’ge Allah en mo’gulesimu egei ’gela’geat aga o. 17#Yoe. 2:28-32At en e, disogo egei,

At Allah en eselat e,

O ologun pam an Narogun ai, loksogo aphwami ’berlegat enebam ’belakpou weik o.

’Belakpou wagoam e, henemalik logomalik et, hwelani et, is en an niak aphwami mo’gulontogulat,

honosi souwe a’ge en enabi ’gela’ge hogulat,

henaiklak sebal a’ge en enabi hogulat, togu lema o.

18Ai erlige re, an neragam a’ge, ap et, hwami et, an Narogun loksogo enebam ’belakpou weik o.

’Belakpou wagoam e, is en an niak mo’gulontogu lema o.

19Ye, aphwami en erliktogu lemagoluk,

elalin a’ge logon ’bogorl pam erabu en tagalat,

wene pobi tuagoluk ’gwiangma yema tagalat, tagalat e,

di a’ge yu a’ge pam, mep emin, odouk magale emin, ageromtom odouk hobu ’gela’ge emin, tua.

20An henaik ’gain Nonuk Logo a’ge en loksogo tagoam aphwami en erliknobugukhwe weik ai erlige owan wom erlak oruakhwe re,

o mo orogole muat hik eselat,

dugwi orogole mep agalat, ai naduk tua o.

21Asogo agokhwe re, his aphwami en

an henaik ’gain Nonuk Logo a’ge nonuk ’balogo yo’go nebagup a’ge enebe lo’bok delenebik o,

oluk Yoel en egei ai.

22A’ge re, his Israel a’ge narilak norokhwi. An niak ik a’ge yu hwelit o. Yesus owi Nazaret a’ge ano Allah en yo’go pesimu, nenemin welat, wene pobi tuagoluk elalin tu puk a’ge Allah en e’gik annisogo taga laga ai re, ebe Yesus enat taga laga o. Holuk e, Yesus Allah en perakpou wagama, oluk enagat aga ai re, henaluk o. 23#Mat. 27:35; Mrk. 15:24; Luk. 23:33; Yoh. 19:18A’ge re, at Allah aluk welat, ogola en e,

Asogo tuak o, oluk epesi ano pamat, Yesus ebe hene’gik pam pesimu, his en ap enebabut wiak a’ge ene’gik wokho, at ebe e pam edikpoluk werigep ai o. 24#Mat. 28:5,6; Mrk. 16:6; Luk. 24:5Werigepma, at ebe nonouk tagalat waraga a’geat de, aphwami ene’gik herle wusogo onobugumu welagai ai ’gela’ge, at asogo modok werak wolom puk ai en, ene’gik herle hebilogo lebigonobogwi ai ’gela’ge, Allah en elalugap pesi ai o. 25#Mzm. 16:8-11At Yesus paget Daud en disogo egei,

An di a’ge yu a’ge en no’borlogouk niouwano oluk

naik ’gain Onuk Logo a’ge ebe neragam oruakma,

nin hwedik nan hwedik nil hasu modok welago yo.

26Ye, ai en, nogola nagai hasulat, niak pam erliktagalat, oso yo.

An watnobumu nebe werak pobuk op eik ani,

oluk nogola en mennei ’garoksogo weleik o.

27Asogo weleik ai re, an nebe aphwami warotluk lagaimu eba modok welemagoluk, hat en uknebasulat,

An hat homlogo hede hwedik a’ge nebe yu muk emagoluk ’bullak nebasulat, togun erlak ai enat o.

28Hat en ebela nenelaluk wolomul ai a’ge mo’gulneselat,

hat hebe nemin modok welege ai en onogola enagai opogwi a’ge nogola ’betesogo wokneselat, tise legen o,

oluk Daud en Yesus ebaget egei ai.

29A’ge re, narilak norokhwi. At nene’ba Daud obok ’baksogo mo’gulhentaik. At ebe waragama, nis welegema yemayat ’gwiang delogo sebeligisa a’ge, ebale naduk welagarik yogodak ogo oruak ai. 30#Mzm. 132:11; 2Sam. 7:12-13At Daud ebe Allah iak mo’gulentasu laga a’ge ano en e, Allah en ho’buk ’balogo wene disogo oluk obok mo’gulesi a’ge alugat welaga,

Hat ’gain welegen ai ’gela’ge welemagoluk,

ap hat en dogo’gwe a’ge mesik hebalema edikpaik o,

oluk obok mo’gulesi. 31Asogo obok mo’gulesi a’ge ano ebe owan edikpo erlak oruakhwe, at Daud Allah en tua a’ge aluk welat e,

Kristus waromma, Allah en elalugap pouwa o, oluk wene at en disogo egei,

Allah en at ebe aphwami warotluk lagaimu eba modok welemagoluk ukpouwa erlak o.

Ye, at ebe muk emarik, erlak emagoluk ukpouwa erlagat o,

oluk egei. 32Asogo egei hegitsogoat, at Yesus Allah enat elalugaptegeimu, nis ya ’berlegat nenil hegerik nenalugat welege ai o. 33At ebe Allah en elalugaptegeitik, eragam ’gain welemagoluk edikpesimu oruak o. Welat e, Allah en,

Narogun wokhentaik, oluk obok woknentesi ’gela’geat Yesus wogesimu, at en loksogoat nis nenebam ’belakpou wagama re, nis tugukhwe henil nontogulat, henesa’go holugulat, togu legep ai o. 34-35#Mzm. 110:1A’ge re, at Daud ebe ’bogorl pam ligom erlak. A’geat de, at en disogo egei,

Nenaik ’gain Onuk Logo a’ge en e, an nue ’gain Onuk Logo a’ge mo’guleselat e,

Aphwami hat heselei a’ge ebano,

hoyuk en al ’besilogo enebagun en, an en owan he’bek onobuom erlak oruakhwe,

hat an neragam ne’gik ’bekhit akhit hebe ’gain hweriogo welerinok, oluk at Allah en mo’gulesi,

oluk, at Daud u’gwarek en egei ai o. 36At Yesus ebe re, his en e pam edikpoluk werigepma, at Allah en,

Honue ’gain Onuk Logo a’ge Kristus ebe yuat o, oluk edikpesi o. Holuk e, his aphwami Israel a’ge ’berlek en e,

Wene ai demat, oluk henaluksogo wolomup o,” oluk mo’gulentesi.

37Asogo mo’gulentesimu, enesa’go hweligisarik, wene ai pam enede perik welat e, is en Petrus emin, is logon Yesus en yo’go onoboluk peragenebesi a’ge emin, mo’gulontogulat e,

“Narilak o. Nis nenebabut no’gosogo tul,” oluk mo’gulentigisa. 38Asogo mo’gulentigisema, at Petrus en e,

“His wiak togu legep a’ge ai ukpoluk henebabut heberlemis o. Asogo heberlomma re, wiak togu legep a’ge ai, Allah en erlagapsogo ukpou wagoluk henebe lo’bok Yesus Kristus onuk ’balogo ik olomu ’belaphonobuak o. Asogo tumu re, Allah Arogun ai wokhontouwa o. 39At Allah en,

Narogun wokhentaik, oluk wene wusogo obok mo’gulnentesi ai re, his henebe emin, heneiyagai emin, is logon onowi walek a’ge eba emin, henebe Nenaik ’gain Onuk Logo a’ge Allah en,

Manis o, oluk worlhentasu a’ge ’berlek enebaget wene hisat wene wusogo obok mo’gulhentesi o,” oluk mo’gulentesi. 40Wene ebe asogo yat wiak eselat e,

“Aphwami enebabut dagantil lagai a’ge yema, Allah en wene enebam pouwa a’ge ai, ukpoluk honu’gwarek en delhorlomup o,” oluk enesa’go weregei.

41Asogo enesa’go weregeimu re, is wene wegesa a’ge ik olomu ’belabenebigisa. Ai erlige enebe 3.000 ’gela’ge ik olomu ’bigisarik e, pobuk enemin la’bulogo welegesa. 42Enemin la’bulogo obat welat e, is ap Yesus en yo’go onoboluk peragenebesi a’ge ebano en wene mo’gulontogwiam hwedik-hwadigat enesa’go holugulat, so’boru enemin ’gusogo no’gulat, se’ban enemin ogulat, togu legesa.

At Allah eiyagai enede Yesus ebam he’berik poluk togu legesa wene

43Aphwami en wene pobi tuagoluk, is ap Yesus en enebe yo’go onoboluk peragenebesi a’ge ebano en elalin tu puk a’ge a’bigat tugukhwe re, aphwami enebe lo’bok onogorlok aga laga. 44#Per. 4:32-35Is aphwami logon wene demat oluk wegesa a’ge emin enebe mesik a’ge ’gela’ge opsogo welat, ena’ge di a’ge yu a’ge paget,

“Nis nenemin mesigarat nena’ge o,” oluk la’buksogo tenak welegesa. 45Asogo welat e, is pema en, ono’gwiang emin, ena’ge emin, o’go uang wik-wok e, uang ai is Allah eiyagai a’ge ebano enebe lo’bok so’burontogulat, is nin ena’ge erlak a’ge elirat so’burontogu legesa. 46Asogo tugulat e, agauwa mesik pam mo u erlakma en hwedik-hwadigat Allah owi werikmu odoktugulat, onogola enagai hogulat, enede sebelogoat onowi lo’gwe so’boru enemin ’gusogo no’gulat, togu legesa. 47Asogo tugulat, is en Allah erliktogwi oruakma, is aphwami ’berlek en,

“Is op o,” oluk erligonobogu legesa. Erligonobogukhwe oruakma re, nonue ’gain Onuk Logo a’ge en e, agauwa mesik mo u erlakma en, aphwami logon delogo Allah eiyagai enemin mesigat la’bulogo enebasu laga.

Currently Selected:

Peragenebesi 2: Wul

Highlight

Copy