Peragenebesi 1

At Yesus en e, “Allah en Arogun henebam ’belakpouma o,” oluk obok mo’gulentesi wene

1 # Luk. 1:1-4 Teofilus nue. An en naduk wene pelal wokho he’bek perakpou wegi ai re, at Yesus en di ebele yu ebele tagalat, di wene yu wene mo’gulentasulat, taga laga wene edip pam hwerli en, 2at aik en ebe ’bogorl pam woluk ligaga ai hwerli, pelal wokho perakpou wegi ai. At ebe ’bogorl pam owan woluk ligom erlak oruakhwe, at osi enebe pulogo yo’go onoboluk peragenebaigoluk tegei a’ge ebano Allah Arogun anni pam enesa’go weregei. 3Yesus ebe waragarik elaluk otluk, agauwa 40 enemin welat e, at ebe dokhumsogo pobi tuagoluk di a’ge yu a’ge elalin a’ge a’bigat taga laga. Asogo tagalat, at en e,

“An nebe yu. Enil dokhumsogo niouwak o,” oluk pobuk naduk onorogolema inotluk onugentasulat, Allah eragam welagai wene mo’gulentasulat, taga laga. 4-5#Luk. 24:49#Mat. 3:11; Mrk. 1:8; Luk. 3:16; Yoh. 1:33Agauwa mesik erlige at osi enemin mesikmu odoktak welat e, disogo mo’gulentesi,

“Yohanes en ik olomu ’belabenebise laga a’geat de, his agauwa loksogo wolom erlakmayat, Allah en ik olomu ’belaphonobu ’gela’ge, at Arogun henebam ’belakpouma ai re, henebe o Yerusalem yema en ’bogologup o. An naik en e,

Is wogentaik, oluk wene wusogo obok mo’gulhentesi a’ge ai, an en naduk obok mo’gulhentegis aiat o. Holuk e, yetharok wolomup o,” oluk obok mo’gulentesi.

At Yesus ebe Allah en ’bogorl pam woluk ligaga wene

6At Yesus en wene asogo mo’gulentesirik e, at osi enemin odoktak welat e, osi en at ebam hin disogo wegesa,

“Nue o. Pageat di aphwami yu aphwami nis Yahudi a’ge nonue ’gain onuk logo a’ge eragam welegesa ai ’gela’ge, pobuk asogo wolomul a’ge, yogodak ya pamat nenebagun a? Owan a,” oluk mo’gulegisa. 7Mo’gulegisema re, at en disogo mo’gulentesi,

“Wene egep ai re, an naik eiye a’ge en epesi hegitsogoat ema ai his en e,

Hwerli ai hwerli pam welemarik en ema o, oluk his henaluksogo wolom mia o. 8#Mat. 28:19; Mrk. 16:15; Luk. 24:47,48Asogo a’geat de, Allah Arogun henebam ’bu ago holuk, henanni ema o. Henanni emarik e, o kota Yerusalem en, propinsi Yudea en, Samaria en, hwerli o di owi yu owi esa’go esa’go eba ’berlegat lagalat, an di ebele yu ebele til denagokhwe henil niegep a’ge ano, an nebaget mo’gulentil laga lomup o,” oluk mo’gulentesi.

9 # Mrk. 16:19; Luk. 24:50,51 Wene asogo arat mo’gulentesimu, Allah en at ebe ’bogorl pam woluk ligagoam, enil oruakhwe o hena en sebelhesimu re, enil pobuk ho erlak. 10Ho erlak welat, at Yesus ebe woluk ligagokhwe enil ’bogorl akhit likharok oruakhwe erianoat, ap enebe ’biren onosum ’gut ’buktak a’ge eneragam inla ’bu egesa. 11Inla ’bu egesarik e, disogo mo’gulentigisa,

“His aphwami o Galilea do’go a’ge yu logwe. Henil ’bogorl pam likharok welegep ai nopaget. At Yesus his yema honoboluk e, Allah en ’bogorl pam woluk ligagokhwe henil hegep ai ’gela’ge, pobuk asogoat ’buma o,” oluk mo’gulenta ’bu egesa.

Ap mesik Yudas ebalema edikpegesa wene

12Asogo mo’gulentigisema, dom Zaitun pam eba en ’bu egesarik e, o kota Yerusalem walegat e, puk. We, horok 1 kilometer ’gela’ge ’gu egesa. 13#Mat. 10:2-4; Mrk. 3:16-19; Luk. 6:14-16’Gu egesarik, o pam eba ’gwigisarik e, o holi’bo welegesema ebanoat ligegesarik welegesa. Is ai enebe re, Petrus o, Yohanes o, Yakobus o, Andreas o, Filipus Tomas e’birek o, Bartolomeus Matius e’birek o, Alfeus omlogo Yakobus ai o, Simon,

“O yema nonowirak a’ge nak wolomul o,” oluk ese laga a’ge ai o, Yakobus omlogo Yudas ai o, enemin welegesa. 14Is enebe eria emin, Yesus ia Maria emin, hwami logon emin, Yesus osi e’berlik a’ge eneminat, enebe ’berlegat enede mesigat welat e, se’ban ogwi modok welegesa.

15Ai erlige, Allah eiyagai logon enemin enebe 120 ’gela’ge odoktak welat, at Petrus ene’gerlakma en inagarik e, wene disogo mo’gulentesi,

16-17“Narilak norokhwi o. At Yudas ano re, nis nenemin yabuk opsogo tise lemagoluk Yesus en yo’go poluk edikpesimu, nis nenemin op welegerigat de, pageat wene Allah Arogun en at Yudas paget egeimu, at Daud en pelal wokho pesi a’ge oruakma, at Yudas en is ap Yesus ebe tenak pou wagoluk wogonoboluk waga ai, tu hegirat aga o,” oluk mo’gulentesi.

18 # Mat. 27:3-8 (At Yudas e, wiak tegei ai paget, o’go wogegisema re, ’gwiang o’go ’bali laga. ’Bali lagarik eba loluk orogole sogup wathwerlasulat, ogum supsogo re, olot ’bulogo waraga. 19Asogo waragama, aphwami o Yerusalem welegesa a’ge enebe ’berlegat enesa’go hweligisarik e, enaluk agarik, ’gwiang ai paget, nis neniak pam emep ’begeimu u ’gela’ge, is eniak pam onuk Akeldama tualigisa.)

20 # Mzm. 69:25; 109:8 Asogoat, at Petrus en disogo mo’gulentesi,

“Weni pelal wogo a’ge buku Mazmur ano pam disogo egesa,

O at oruakma owi poluk emak.

Aphwami logon at owi pam eba enebe erlagat welemak o,

oluk pelal wegesa. Ye, mesik e, disogoat egesa,

At ebe ebalema ap mu a’ge edikpouwak,

oluk egesa. 21-22#Mat. 3:16; Mrk. 1:9; 16:19; Luk. 3:21; 24:51Holuk e, nis nenemin nese lemagoluk, ap mesik edikpouwok. Ap edikpul ai re, hwerli at Yohanes ik olomu ’belabenebise laga ai hwerli en e, nonue ’gain Onuk Logo a’ge Yesus emin nin hwedik nan hwedik at e’berlik no’gu legerik, hwerli Yesus aik en nis nene’gerlakma en ’gegilogo ’bogorl pam woluk ligaga ai hwerli, nenemin no’gu lege a’ge holuk,

Yesus elaluk aga ai demat. Nenil hegerik, oluk nenemin mo’gulentil denaga lemagoluk, edikpouwok o,” oluk mo’gulentesi. 23Mo’gulentesimu re, is en e,

“Ap yu edikpouwok a? Ap yu edikpouwok a,” oluk enebe ’biren ononuk egesa. Ap mesik onuk henagan, Yusuf ogulat, Barsabas ogulat, Yustus tualogo ogulat, ogu legesa a’ge. Ye, ap mesik Matias ai. 24-25Ononuk egesarik, Allah yo’go pogulat e,

“Nenaik o. Ap Yudas hat hiak mo’gulentil denaga lemagoluk yo’go pegen a’geat de, at en ukpoluk warom hegitsogoat waragama, ebalema ap enebe ’biren yu, hat en ap ’ge ’gela’ge yo’go pegen. Hat aphwami enebe ’berlegat enede haluk ai o. Holuk e,

Ap ebe yu yo’go pegi o, oluk, hat en mo’gulnentemen o,” oluk mo’gulegisa. 26Asogo egesarik e,

“Ap yu edikpul a? Yu edikpul a,” oluk helebe’gen sa pam hegit ema oluk ononuk ’balholuk walhegesa ’gal e, ap Matias ebam hegit aga. Hegit agama, is ap Yesus en enebe yo’go onoboluk peragenebesi a’ge ebano enebe 12 a’ge de, 11 agama re, 12 emagoluk Matias enemin welemagoluk edikpegesa ai o.

Currently Selected:

Peragenebesi 1: Wul

Highlight

Copy