Yohanes 21

Ik Tiberias omugwema at Yesus ebe, is osi

enebe sabiren en enil houwagoluk

onorogolema inaga wene

1At Yesus en asogo tegeitikmu en, ik Tiberias omugwema, at osi iak wogu legesa a’ge ebano pobuk onorogolema inaga. Onorogolema inaga ai, wene ebe re, disogo oluk. 2Agauwa mesik erlige re, at Simon onuk mesik Petrus ano emin, Tomas onuk mesik Holuba’ge ano emin, Natanael owi o Galilea do’go o onuk Kana a’ge emin, Zebedeus eiyagai emin, Yesus osi enebe ’biren logon emin, odoktigisa. 3#Luk. 5:5Asogo odoktigisarik e, at Simon onuk mesik Petrus ano en, is pema disogo mo’gulentesi,

“An yogodak e, hiane wai laiyogoluk o,” oluk egeimu re, is pema akhit ebano en e,

“Nis neneminat louwok o,” oluk egesarik e, emin loluk ik so ogola ’goluk legesarik a’ge re, o hup modok lok a’geat de, hiane ogo mesik wo erlagat. 4Asogo wo erlak oruakma, o dakha osokhwe, at Yesus lagarik, ik esa’goma edik welaga a’geat de, at osi iak wogu legesa a’ge ebano en e,

“Ai Yesus ebeat o,” oluk pobitu erlak. 5Asogo pobitu erlak oruakma re, at Yesus en disogo mo’gulentesi,

“Ap yema logwe. Nosi. Hiane mesik wegep a?” oluk mo’gulentesimu, is en e, “Modok erlagat o,” oluk mo’gulegisema, 6#Luk. 5:6at Yesus en e, disogo mo’gulentesi, “Sum hiane sum ai, ik so abel hene’gik ’bekhit akhit ’belakpemit o. Asogo ’belabogupmu re, hiane wagup ani o,” oluk mo’gulentesimu sum hiane sum ano ik olomu ’belakpegesema hiane modok a’bik yagaragama re, lisogo wa ’gwilo modok mia aga.

7Asogo mia agama welat, at Yesus osi ebano a’ge mesik, at ede hwedik a’ge ano en e, Petrus disogo mo’gulesi,

“Petrus, ap ai nonue ’gain Onuk Logo a’ge anoat o,” oluk mo’gulesi. At Yesus ot ano en e,

“Ap ai nonue ’gain Onuk Logo a’ge anoat o,” oluk Petrus mo’gulosoam esa’go hwelegeitik e, osum o’borl o’gwe a’ge no’gorlogo pesirik no’gorlak welaga a’ge ano perleneat ’buktegeirik e, ik olomu ’bok ’begei. 8Asogo ’bisokhwe, Yesus osi pema ebano is welegesa eriano hwerli en ik esa’go walek e, puk. We horogat, 100 meter ’gela’geatma re, hiane a’bik sum hiane sum emde loroptak a’ge ano lisogo woluk ik so wusogo ik esa’goma liplau wegesa. 9Arat liplau wegesarik so ogola en ’bu egesa ’gal e, hiane emin, so’boru roti a’ge emin, werakho odouk e’gen pam orluktak oruakma enil hegesa. 10Asogo hegesema, at Yesus en e, disogo mo’gulentesi,

“Nosi. Hiane ’gerat wegep a’ge ebano logon woluk manis o,” oluk mo’gulentesimu, 11at Simon onuk mesik Petrus ano ik so ogola ’gwegeitik e, hiane lok a’ge nak ebe 153 sum hiane sum emde loroptak a’ge ano lisogo woluk e, ik esa’goma liplau waga. Hiane modok a’bik a’geat de, sum ano weiyatma no oluk e, derlep u erlak, we, op nak welaga. 12Sum asogo woluk liplau wagama, at Yesus en e, disogo mo’gulentesi,

“Nosi. So’boru nul en manis o,” oluk mo’gulentesi. Asogo mo’gulentesimu, is at osi ebano en e,

“Yu nonue ’gain Onuk Logo a’ge ebeat o,” oluk enak a’ge hegesarikmu no oluk e, at mesik en e,

“Hat hebe sa o,” oluk onogorlok erlaksogo hin mesik wokho erlakma en mo egesa. 13Asogo mo egesarik oruakhwe, at Yesus ano pobuk ene’bek horoksogo hegilhai lagarik e, so’boru roti a’ge ano wesirik, is so’burontoluk e, hiane ano asogoat so’burentesi. 14At Yesus asogo tegei ai re, at ebe warotluk togolik elaluk agarik en, e’gik henaganak a’ge en de, osi onorogolema inaga ai o.

At Yesus en e, “An nuam domba opsogo ’gwelagentarok wolomup o,”

oluk Petrus mo’gulesi wene

15So’boru asogo arat ne’gesema, at Yesus en at Simon onuk mesik Petrus ano emdema wasulat e,

“Simon Yona omlogo not o. Is harilak pema yema re, an enede hwedik e, mia ’gela’ge a’geat de, hat nak e, an hede hwedik ’gela’ge welegen a?” oluk mo’gulesimu, at Petrus en e,

“I o, nue. An en hat hebe nedeat o,” oluk mo’gulesimu, at Yesus en e, disogo mo’gulesi,

“Holuk e, nuam domba ena a’ge opsogo ’gwelagentarok wolomup o,” oluk mo’gulesi. 16Naduk asogo mo’gulesirik, pobuk mesik emin disogo emdema wokhesi,

“Simon Yona omlogo not o. Hat en an hede hwedik welegen a?” oluk mo’gulesimu, at en e,

“I o. Nue. An en hat hebe nede hwedik welegi ai, hat halugat o, nue,” oluk mo’gulesi lagama, at Yesus en e,

“Holuk e, an nuam domba o’goniso lomup o,” oluk mo’gulesi. 17E’gik ’birenam emdema wokhesirik pobuk emdema mesik disogo wokhesiat,

“Simon Yona omlogo not o. Hat en an nebe hede a?” oluk, asogo emdema e’gik ’birenam wokhesirik e, pobuk mesik ogo,

“Hat en an nebe hede welegen a?” oluk mo’gulesi ai en e, ede wiak agama, at en Yesus disogo mo’gulesi,

“Nue. Hat e, di wene yu wene ’berlegat haluk o. Holuk e, an en nue hebe nede welegi ai, hat halugat o,” oluk mo’gulese lagama, at Yesus en e, disogo mo’gulesi,

“Holuk e, an nuam domba opsogo ’gwelagentarogat wolomup o,” oluk mo’gulesi. 18Asogo mo’gulesirik e, wene mesik disogo mo’gulesi,

“Nadugat, hat hebe souwe pam welat e,

An o eba laik, oluk ’bagaluk hu’gwarek en ningsogo wanhorloluk lasu legen a’geat de, pobuk hat hebe sebal oroguntik, he’gik ’belinghasuam e, is nin pema en hat he’gik herle ningsogo wathoboluk e, o hat lo hebitmu wokhoboluk louwa ani o, oluk demat mo’gulhegis o,” 19oluk wene asogo mo’gulesi ai re, at Petrus pobuk disogo takpoluk woruema Allah erliktu a’ge paget mo’gulesi ai o. Arat asogo mo’gulesirik e, mesik disogo mo’gulesi,

“An ne’berlik noso lomup o,” oluk mo’gulesi.

At Yesus en at osi a’ge mesik ede hwedik a’ge paget obok mo’gulentesi wene

20 # Yoh. 13:25 At Yesus en wene asogo mo’gulesimu, at Petrus orogole edenogo il o’borl akhit yethesi ’gal e, Yesus ot mesik ede hwedik a’ge ano ene’berlik wagoma yethesi. At ai ebe re, nadugat so’boru no’gulat Yesus eragam horoksogo hweriogo welat, at en e,

“Yesus nue. Sa en nue ’gain Honuk Logo a’ge wathobuagoluk yo’go louwano,” oluk ebam hin wokhesi a’ge ano. 21At Petrus en ap ano il yetholuk e, Yesus disogo mo’gulesi,

“Nue. At ap ai pobuk no’gosogo tua epegen,” oluk mo’gulese lagama, 22at Yesus en e,

“An nogola en e, ap ai ebe elaluk oruakma, an pobuk weik epaik holuk e, hat en tu a’ge puk. An nomu enat, tik ani o. Asogo a’geat de, hat nak e, an ne’berlik nese lomup o,” oluk wene asogo mo’gulesi a’ge ano, 23is Yesus osi iak wogu legesa a’ge en e,

“Yesus en,

Not ai ebe pobuk warema modok erlak o,” oluk egei ’gela’ge, obok sagarak pegesa. A’geat de, at Yesus en e,

“An not ai pobuk warema modok erlak o,” oluk u erlakma en. We,

“An nogola en, ap ai ebe elalugat oruakma an pobuk weik epaik holuk e, hat en tu a’ge puk. An nomu enat, tik o,” oluk wene ai a’ge paget egei a’ge de, asogo egesa ai o.

24Wene Yesus ot mesik paget egei ai, nebe anat o. An nil hegi a’ge enat ’baksogo mo’gulhonto ’gela’ge, pelal ’balogo pegi yu o. Wene ai an nil hegi a’ge enat ’baksogo mo’gulhentegis ai demat, oluk, nis ’berlegat nenaluk o.

Wene ologun wusogo pelal wesi wene

25At Yesus en di wene yu wene pema akhit taga laga a’ge a’bigat taga laga a’geat de, wene ’berlegat mesik-mesik ’beling-’belangsogo pelal wokho pelema re, o ’gwiangma yema ’betesogo re, ebale ’geba po ’gela’geat elep ani o.

Currently Selected:

Yohanes 21: Wul

Highlight

Copy