Yohanes 20

At Yesus ebe elaluk aga wene

(Matius 28:1-8; Markus 16:1-8; Lukas 24:1-12)

1Werak asogo pegesarikmu re, o hari Minggu pam, at hwe Maria owi o Magdala a’ge ano o hiktak oruakhwe hubet siaksogo werak owik pegesema ano wagarik il ’gwelakhesi ’gal e, ’goduk helep a’ge lerak pegesa a’ge ano, wokhegesema ’goduk hwerik oruakma hesi. 2Asogo hwerik oruak en il holuk e, pungtak modok ap Simon onuk mesik Petrus ano emin, Yesus osi iak wogu legesa a’ge mesik at ede hwedik a’ge ano emin, ene’bek lagarik e, disogo mo’gulentesi,

“Aphwami en nonue ’gain Onuk Logo a’ge werak owikmu en woluk libegesarik ’geba pei legesa ’gela’geatma re, nis wongtak pege o, norokhwi,” oluk mo’gulentesimu, 3at Petrus emin, Yesus ot mesik ano emin, emin werak owik pegesema ano wegesa. 4Asogo emin mesik o’gwe pungtak wegesa ’gal e, at Yesus ot mesik ano en, at Petrus pobugap poluk e, at naduk perlenesogoat werak owik pegesema ano waga. 5Asogo arat wagarik, werak owik pegesema ano a’gul ’gonu oluk il saboksogo ’gwelakhesi ’gal e, sum lenan a’ge nak no’gorlogo ’gwiangma oruakma il hesirik e, ebe owik ogola ’gwilo erlakma en mo egei. 6Asogo ’gu erlakma en oruakma, at Simon onuk mesik Petrus ano pobuk at e’berlik waga lagarik ’bekhirat werak a’ge pegesema ano ’gwegeitik il ’gwelakhesi ’gal e, sum lenan a’ge ano nak no’gorlogo ’gwiangma oruakma il hesi. 7Asogo a’geat de, sum Yesus a’gul hettak a’ge no’gorlak nak e, sum lenan a’ge ano no’gorlak welagama eriano emin mesikmu erlakma en, we, ematekma ’geksogo ’gela’ge e’girlogo oruakma il yethesi. 8Asogo hesirikmu en, at Yesus iak wogu legesa a’ge mesik naduk werak a’ge pegesema waga a’ge ano pobuk ogola ’gwegeitik il ’gwelakhesi ’gal e, asogo oruakma il hesirik e, demat oluk pobi tegei. 9At asogo il ho erlakma re, nadugat is nin pema en e, Allah iak pelal wokho pogulat e,

“At ebe warotluk en pobuk elaluk ema ani o,” oluk egesema pelal wogo oruak a’ge ano is pobirak erlak welegesarik e, ai erlige en de, at il hesirik e, pobi tegei ai o. 10Asogo pobi tegeitik e, is Yesus osi iak wogu legesa a’ge e’birek ano togolik o pam legesa.

At Yesus ebe hwe Maria owi o Magdala a’ge ano il houwagoluk orogolema inaga wene

(Matius 28:9-10; Markus 16:9-11)

11Is asogo legesa a’geat de, at hwe Maria nak e, pobuk wagarik werak pegesema ano eragam edik welat il ’gwelakharok ’gal e, nge taga laga. 12Asogo nge tagalat, il ’gwelakhesi ’gal e, Yesus werak a’ge pegesema ano malaikat enebe ’biren onosum ’gut a’ge ’buksogo, at mesik Yesus werak a’ge pegesema ebano a’gul akhit, ye, at mesik e, a’ge akhit, hweriogo oruakma il entesi. 13Asogo entesimu, is en e, disogo mo’gulegisa,

“Hwe yu nerei o. Hat nopaget nge taga legen o,” oluk egesema, at en e, disogo mo’gulentesi,

“An nue ’gain Onuk Logo a’ge werak aphwami en woluk o ’geba pei legesa hweatma re, an neperlak en nge taga legi o, norokhwi,” oluk mo’gulentesirik, 14il o’borl akhit hebeksogo yethesi ’gal e, at Yesus ebe edik oruakma il hesi a’geat de,

“Ai Yesus demat o,” oluk pobitu erlak. 15Pobirak erlak oruakma re, at Yesus en e, disogo mo’gulesi,

“Hwe yu nerei o. Hat nopaget nge taga legen. Ye, hat e, sa herataga legen,” oluk mo’gulesimu, at ogola en e,

“Ap yu yabuk tiso a’ge hegi,” oluk epesi. Asogo epesirik e, disogo mo’gulesi,

“Nue. At ebe werak a’ge hat wegentik woluk momu pei legen holuk e, ebe o ’geba pei legenma o. An wai laik en e, mo’gulnemin o,” oluk mo’gulesimu, 16at Yesus en mo’guleselat e,

“Hwe Maria,” oluk mo’gulosoam, Maria orogole hebeksogo Yesus wogotluk e, nis neniak pam,

“Guru nue,” oluk u ’gela’ge re, is Ibrani a’ge eniak pam e,

“Rabuni,” oluk hau weregei. 17Asogo hau weregeimu re, at Yesus en e, disogo mo’gulesi,

“An nebe naik e’bek owan ligom erlak welegi ai en e, he’gik ebisogo tenniarok wolorogun o. An nosi wene disogo oluk mo’gulentai lak o,

An emin, his emin, nenaik Allah ebam he’berik welege a’ge ano e’bek legeigoluk taga legi o, egei oluk nosi mo’gulentai lak o,” oluk mo’gulesimu, 18at hwe Maria ano Yesus osi iak wogu legesa a’ge ebano ene’bek lagarik e, disogo mo’gulentesi,

“Logwe! Nonue ’gain Onuk Logo a’ge an arat nil holuk wegi o,” oluk, mo’gulentasulat wene mo’gulesi a’ge ano ’beli’gogo mo’gulentai laga.

At Yesus ebe osi iak wogu legesa a’ge ebano enil houwagoluk onorogolema inaga wene

(Matius 28:16-20; Markus 16:14-18; Lukas 24:36-49)

19Asogo mo’gulentau wagarikmu en, o hari Minggu welegesa ai erlige huba’go at Yesus osi iak wogu legesa a’ge ebano, is ap Yahudi a’ge onogorlok en e, o akhen mesikmu ’goduk ’berlegat ’gorlok ’betesogo ’gwi legesarik welegesa. Asogo oruakma, at Yesus lagarik ene’gerlakma inagarik e, disogo mo’gulentesi,

“Nosi. Henarogun lagup o,” oluk asogo mo’gulentesirik, 20e’gik emin, abel emin, werigisa a’ge ano sogomerli hwiagentesi. Asogo hwiagentesimu enil hegesarik e,

“Nonue demat o,” oluk onogola enagai a’bik hegesa. 21Asogo enagai a’bik hegesema, at Yesus en wene mesik emin pobuk disogo mo’gulentesi,

“Nosi o. Henarogun lagup o. An naik en peraknobou waga ai ’gela’ge, an en his asogoat perakhenebaik o,” oluk mo’gulentesi. 22Asogo mo’gulentesirik e, emde a’ge enebam pusogo pasulat e, disogo mo’gulentesi,

“Allah Arogun hwerlemit o. 23#Mat. 16:19; 18:18Ye, his en aphwami wiak togwi a’ge erlagapsogo ukpogu lorogup holuk e, at Allah en erlagapsogo ukpou wayat o. Ye, is aphwami logon wiak togwi a’ge, his en erlagapsogo ukpogu lorogup erlak holuk e, at Allah en ogo erlagapsogo ukpouwa modok erlagat o,” oluk mo’gulentesi.

At Yesus ebe werigisa a’ge wa’gun sogomerli

ap Tomas hwiagesi wene

24At Yesus ebe osi onorogolema inaga ai erlige re, ap enebe 12 ebano a’ge is pema nak oruakma. Ye, at Tomas onuk mesik Holuba’ge ogwi ano ebe erlakma waga. 25Asogo ebe erlakma oluk e, is Yesus osi pema nak en e, disogo mo’gulegisa,

“Tomas nare o. Nis nonue ’gain Onuk Logo a’ge ano arat nenil hege o,” oluk mo’gulegisa a’geat de, at en e, disogo mo’gulentesi,

“An en at e’gik pam paku werigisa a’ge ele nil pobisogo ho erlak, ye, sogomerli ne’gik tenho erlak, abel o’gwe wa’gun ele ne’gik dum ’gwelabu erlak holuk e, demat oluk epaik modok erlak o,” oluk mo’gulentesi. 26Asogo mo’gulentesirikmu en e, agauwa sabit pam welegesarik agaikhe pam en e, is Yesus osi iak wogu legesa a’ge ebano Tomas eminat, o anoat odoktigisarik, ’goduk ’berlegat ’gorlok ’betesogo lerakpoluk welegesa a’geat de, at Yesus wagarik ene’gerlakma inagarik e, disogo mo’gulentesi,

“Nosi o. Henarogun lagup o,” oluk mo’gulentesirik e, 27pobuk at Tomas disogo mo’gulesi,

“Hat hogola en demat oluk hede nebam he’berik po erlakma en welegen ai ’gela’ge wolorogun o. Demat oluk epagun en e, he’gik pakniasulat, ne’giksogomerli hil niasulat, nabel wa’gun ele he’gik dum ’gwelakpasulat, toguntik e, hede nebam he’berin o,” oluk mo’gulesi. 28Asogo mo’gulesimu, at Tomas en e,

“Eige! Nue, hebe ’gain Honuk Logo a’ge Allah at hiegi o,” oluk mo’gulesimu, 29at Yesus en e, disogo mo’gulesi,

“Hat e, hil arat niegentik demat oluk hede nebam he’berik pegen. Asogo a’geat de, is aphwami logon enil nio erlak a’ge en de, enede nebam he’berik pouwa holuk e, onogola enagai houwa o, oluk demat mo’gulhegis,” oluk mo’gulesi.

Buku yu ebe disogo a’ge paget oluk

pelal wesi wene

30At Yesus en is osi iak wogu legesa a’ge en at ebe pobi tuagoluk enilem elalin taga laga a’ge pema a’bigat tegei a’geat de, buku yu pam pelal wo erlak. 31Asogo a’geat de, pelal wogo oruak a’ge yu ’berlegat his en e,

Yesus ai Allah omlogo, nis aphwami delnonobuagoluk polik poluk perakpou waga ano demat, oluk pobirak poluk henede at ebam he’berik pogulat, at onuk ’balogwiam henelaluk welemagoluk, pelal wokho pegi o.

Currently Selected:

Yohanes 20: Wul

Highlight

Copy