Peragenebesi 3

Petrus Yohanes emin en ap oyuk soborak a’ge obaptigisa wene

1Agauwa mesik erlige re, jam 3 pam, mo hweya lai laigoluk tisokhwe, Petrus Yohanes emin, aphwami Allah owi werikmu en se’ban ogu legesa ’gela’geat uogoluk tugumu, ene’bek ligegesa. 2Ligegesa ’gal e, ap mesik ia ogola en oyuk modok soborak a’geat dagagarik welaga a’ge, ’goduk emde ’belakma onuk ’Bogunwiak oluk ogu legesema ebano pou wegesarik oruakma hegesa. Aphwami en ap ai agauwa mesik mo u erlakma en nin hwedik nan hwedik aphwami logon Allah owi werikmu ’gogukhwe re, di a’ge yu a’ge ’gonu tise lemagoluk, ’goduk emde ’belakma eba e yesogo pou waga legesa. 3O ai erlige pegesema hweriogo oruakma re, Petrus Yohanes e’birek Allah owi werikmu ’guogoluk tugumu, il yerontoluk e, is en di a’ge yu a’ge logon wogemagoluk ’gonu mo’gulentesi. 4’Gonu mo’gulentesimu re, is e’birek en enil putsogo yethogulat e, at Petrus en e,

“Hil yetnentemen o,” oluk mo’gulesi. 5Mo’gulesimu re, at ap ano ogola en e,

“Is en di a’ge yu a’ge logon woknema hegi,” oluk il enebam welaga. 6Il enebam oruakma re, at Petrus en e, disogo mo’gulesi,

“Uang emas emin, perak emin, an ne’gikmu modok erlak ai o. We, an oruak a’ge mesik wokheik o. Ai re, hebe inotluk ebela noso lorogun en, Yesus Kristus owi Nazaret a’ge onuk ’balogo mo’gulhegis o,” oluk mo’gulesi. 7Asogo mo’gulesirik e, e’gik ’bekhit akhit tenakho edikpesi. Edikpesimu re, ap ano oyuk soborakma re, oyuk emin, oyuk il emin, erianoat anni aga. 8Anni agarik e, siaksogo inotluk ebela nese lagarik e, Petrus Yohanes emin Allah owi werikmu ’gwigisa. ’Gugulat e, ap ano Allah erliktagalat, da hogut ya hogut, til ’gwegei. 9Asogo ’gwisokhwe re, aphwami ’berlek en enil hegesa. 10Enil hegesarik e, at ebe enak a’ge pobi tigisarik,

“Allah owi werikmu ’goduk onuk ’Bogunwiak emde ’belakma odipmu de ebela pam eriano hweriogo welat e, di a’ge yu a’ge wogogu lemagoluk ’gonu ese laga a’ge ano ebe yu. Eige! No’gosogo op aga. Nonogorlok e,” oluk erliktigisa.

At Petrus en enesa’go weregei wene

11Ap ano Petrus Yohanes emin ene’berlik modok nese lagarik Allah owi werikmu en liplau wegesarik e, o sorlo’bon onuk Salomo osorlo’bonma oluk ogu legesema ano liplau wagokhwe re, aphwami ’berlek en erliktil pungtak modok ene’bek odoktigisa. 12Odoktigisema re, at Petrus il entesirik e, disogo mo’gulentesi,

“His aphwami Israel a’ge yu logwe! Ap yu ebela noso yu re, nis nonu’gwarek nenanni pam tugulat, nenebabut op en Allah iak hologo togu lege pam, tugulat, tige oluk, his erliktugulat, henil putsogo yetnontugulat, togu legep yema nopaget. 13#Kel. 3:15Nenaik Allah ai, Abraham emin, Ishak emin, Yakub emin, nene’balak logon emin, enaik Allah ai enat, omlogo Yesus logo pesi ai o. A’ge re, his en e, is pema en woruagoluk ene’gikmu pegepma re, at Pilatus en e’gik herle hebilogo lebikpaigoluk tisoma, his en e,

Ap ai nenebit o, oluk egep ani o. 14#Mat. 27:15-23; Mrk. 15:6-14; Luk. 23:13-23; Yoh. 19:12-15At e, Allah en perakpou wagama ebabut hegitsogo nak taga laga a’geat de, his en Pilatus mo’gulogulat e,

Ap ai ebe nenebit o. Ap mesik apware a’ge, aiat e’gik herle hebilogo woknentemen o, oluk ’gonu mo’guligep ebano re. 15Nenelalugapnenebiso a’ge edip ebe at a’geat de, his en werigepma Allah en e, ebe elalugaptegeimu, nis nenil demat hegerik en mo’gulhontogu lege o. 16Ap oyuk soborak welaga a’ge yu en e,

Yesus ai demat, oluk onuk ’balogo, edeat ebam he’berik pesi ai pam, ap yu henil hogu legepma re, ebe henaluk a’ge anoat anni aga yu i o. Ede asogo Yesus ebam he’berik pesi ai pam, his henil pamat modok obaptegeimu yu i o. 17A’ge re, narilak norokhwi. His honuelak ’gaindek enemin Yesus paget tigep ai, heneperlak welat tigep ai, an naluk o. 18Pageat Allah en e,

An en delhenebik a’ge Kristus hene’bek perakpou weik ai, ebe di obotut yu obotut ebam poluk woruayat ani o, oluk obok mo’gulnentesi a’ge ai, ebe is ap at iak mo’gulontogu legesa a’ge ebano enebe ’berlek en ogu legesa ai hegitsogo emagoluk aga ai o. 19-20Ai en e, his wiak togu legep a’ge ai, Nenaik ’gain Onuk Logo a’ge Allah en erlagapsogo ukpoluk, henede paget henil e’gatsogo takhonobou wagalat, at en e,

Kristus henebe delhenebiso a’ge hene’bek perakpou weik, oluk obok mo’gulentesi ano ebe Yesus aiat pobuk hene’bek perakpou wagalat, tuagoluk e, henebabut heberlotluk honolukhwe Allah wogemis o. 21Yogodak ya re, Yesus ebe ’bogorl pam wolom ’gela’geat welema o. Welemarik en, hwerli Allah en di a’ge yu a’ge ’berlegat ’get a’ge agauwak hele’gua ai hwerli en de, ’buma o, oluk pageat is ap enebe Allah paget welat at iak mo’gulontogu legesa a’ge ebano en egesa hegitsogoat ema o. 22#Ula. 18:15,18-19Ye, at Musa en e, disogo mo’gulentesi,

Nenaik ’gain Onuk Logo a’ge Allah iak mo’gulhentasu lemagoluk, ap his a’ge mesik an ediknebesi ai ’gela’ge,

pobuk edikpaik ani o.

Edikpaikmu re, at en di wene yu wene mo’gulhontouwa a’ge aiat

henesa’go modok opsogo holugulom o.

23 # Ula. 18:19 Ap sa en wene at en mo’gulhontouwa a’ge ai,

esa’go hweliso erlak holuk e,

at Allah en, at eiyagai ene’gerlakma en degelogo lebigonoboluk wiagap pouwa o,

oluk mo’gulentesi. 24Is ap naduk Allah iak mo’gulontogu legesa a’ge ebano, hwerli at Samuel ai hwerli en e, is pobuk Allah iak mo’gulontogu legesa a’ge eneminat, enebe ’berlek en e, wene nis o yogodak ya welat togu lege a’ge paget ogu legesa. 25#Kej. 22:18Allah en wene wusogo obok mo’gulnentesi a’ge is ap nadugat at iak mo’gulontogu legesa a’ge ebano en mo’gulontogu legesa ai, his henebagerat o. Ye, Allah en nis nene’balak wene wusogo wogenebegei ai, his henebagerat o. At Allah en Abraham mo’guleselat e,

Hat en dogo’gwe a’ge ai pam aphwami ’gwiangma a’ge yema di aphwami yu aphwami ena’gul onuk lo’bok obabenebik o,

oluk wene wusogo obok mo’gulentesi. 26Allah en e, wene ai wusogo obok mo’gulentesi ’gela’ge, his wiak togu legep a’ge henebe lo’bok hono’borl akhit ukpou wagoluk at u’gwarek eragam a’ge ebe obaphonobua a’ge his naduk hene’bek ’belakpou waga ai o,” oluk enesa’go weregei.

Currently Selected:

Peragenebesi 3: Wul

Highlight

Copy