Peragenebesi 4

Petrus Yohanes emin ap wene edip ’belo’gogumu ebano ene’bek wogonoboluk legesa wene

1Is Petrus Yohanes emin en wene asogo aphwami ebano owan mo’gulontogwi oruakma erianoat, is ap Allah eiye a’ge emin, Allah owi werik ’gwelakharok welegesa a’ge onue ’gain a’ge emin, ap Saduki a’ge emin, ene’bek wegesa. 2Wegesarik e, is Petrus Yohanes emin en wene aphwami mo’gulontogulat e,

“Yesus waragarik elaluk aga ai, aphwami waragai a’ge enelalugabonobuayat o,” oluk mo’gulontogu legesa ai en, is ap ebano onolot het aga. 3Onolot het agarik e, ene’gik herle waronobugumu, o arat hik egeimu re, loruk o’gwe enemdema wouwogoluk, o aphwami herle wusogo onobugumu eba ’gwelabenebigisarik e, tenentarok nogogisa. 4Asogo a’geat de, is Petrus Yohanes emin asogo owan ’gwelabonobu erlakma en oruakhwe, wene aphwami mo’gulentigisema, is wene enesa’go hweligisa a’ge ebano enebe esan en,

“Wene ai demat o,” oluk wegesema re, is naduk a’ge enemin, pobuk a’ge enemin, la’buksogo, ap nak e, enebe a’bigat ene’gik wenakho 5.000 ’gela’ge aga ai o.

5-6Asogo tigisarik, loruk o’gwe is ap ’gaindek ebano emin, is ap enarluedek ebano emin, Allah iak pelal wogo eiye a’ge ebano emin, odoksogo re, is Allah eiye a’ge onue ’gain Hanas o, Kayafas o, Yohanes o, Aleksander o, Allah eiye onue ’gain a’ge eiyagai logon enemin, o Yerusalem odoktigisa. 7Odoktigisarik e, Petrus Yohanes emin eriano ene’bek wogonoboluk wegesarik enebe ’burl edigenebegesarik e, enemdema wegesa. Enemdema wogulat e,

“His en ap oyuk soborak a’ge tigep ai re, no anni pam obaptigep. Ye, sa onuk ’balogo tigep,” oluk ogu legesema re, 8at Petrus Allah Arogun ogola ’betesogo welaga a’ge ano en wene disogo mo’gulentesi,

“Nuelak ’gaindek emin, naiklak emin, wa. 9Yogodak his en e,

Ap oyuk soborak a’ge ai no’gwe anni pam obaptigep no, oluk nenemdema wogu legep ai o. 10A’ge re, wene ai paget, his ’berlegat emin, aphwami ena’gul onuk Israel a’ge ’berlegat emin, henaluk emagoluk wene edip pobisogo mo’gulhentaik. At Yesus Kristus owi o Nazaret a’ge his en e pam edikpoluk werigepma Allah en elalugap pesi a’ge ano onuk pam ap yu op agarik henilem edik obat oruak yu i o. 11#Mzm. 118:22Nadugat Allah iak pam pelal disogo oluk wokho pegesa,

His o helep a’ge worogulat,

Helep yu wiak o, oluk ukpegep a’geat de,

wa’gi dalaga yu i o,

oluk Yesus pagerat, pelal wokho pegesa ai. 12At Allah en, nis aphwami ’gwiangma yema a’ge ap mu a’ge onuk pam delnonobuagoluk onuk mo’gulnonto erlak ai en e, ap we a’ge en delnonobu re, mia o. We, at Yesus en delnonobuagoluk, at ematek onuk mo’gulnentesi aiat o,” oluk mo’gulentesi.

13Is Petrus Yohanes e’birek onogorlok erlaksogo welat, wene ’baksogo asogo mo’gulontogwiam e, is ap ebano en erligonobugulat e,

“Ap yu se’gola mo’golu erlak. We, eneperlak olema a’geat de, Yesus emin denaga legesa a’ge ano en hegi,” oluk pobi tigisa. 14Pobi tigisarik, ap oyuk obaptigisa a’ge ano, is Petrus Yohanes enemin edik oruakma, enil entigisarik e, is ap ebano en wene no’gosogo mo’gulonto ’gela’geat agama re, mo’gulonto erlakma en mo egesa. 15-16Mo egesarik e, Petrus Yohanes ap ano emin, owene edip ’belo’gogumu eba en lebigenebegesarik, is-is nak wene ogulat e,

“Ap enebe ’biren eria paget no’gosogo tagonobul epegep. Is en elalin tu puk a’ge ai tigisema re, aphwami o Yerusalem welagai a’ge ’berlegat enaluk egesa ai paget e, nis en e,

Asogo tu erlak, neneperlak o, oluk elabe tu re, mia aga ai o. 17Asogo a’geat de, wene ai saga uarik aphwami ’berlegat enesa’go holuano oluk e,

Yesus onuk ’balogo wene pobuk modok mo’gulentagup o, oluk enesa’go wusogo wene yagontul o,” oluk egesa. 18Asogo egesarik en, e’biregat worlentigisema, togolik ’gwigisema re, disogo mo’gulentigisa,

“His en e, Yesus onuk ’balogo aphwami enemin wene’gak ogulat, wene mo’gulontogulat, modok togup o,” oluk enesa’go wusogo wene yagentigisa. 19-20Asogo mo’gulentigisema re, is Petrus Yohanes emin en e,

“Allah ilem hegitsogo tu re, ’ge epegep. His en,

Disogo tu, oluk egep a’ge ai hologo tu a? At e, Allah en,

Disogo tu, oluk oso a’ge on ai hologo tu a. Henede eberit da. Nis e, nenil hogulat, nenesa’go holugulat, tige a’ge ai, aphwami logon mo’gulonto erlakma en mo u re, mia ai en e, mo’gulontogu lomulat o,” oluk mo’gulentigisa. 21Asogo mo’gulentigisema, ap ano elalinat tigisa a’ge ai paget, aphwami ’berlek Allah erliktogu legesa ai en, wene no’gosogo enebam po ’gela’geat agama re, pobuk enesa’go nak wusogo lebigenebegesa. 22Ap oyuk soborak a’ge elalin tigisa ai re, ebe dagaga hwerli en umur 40 tahun welagama en, obaptigisa ai o.

At Allah eiyagai en se’ban egesa wene

23Is Petrus Yohanes emin ano, ap ’gaindek ebano en ene’gik herle hebilogo lebigenebegesema re, enarilak onorokhwi Allah eiyagai a’ge logon ebano oruakma ene’bek legesa. Legesarik e, disogo mo’gulentigisa,

“Is ap Allah eiye a’ge onuelak ’gaindek ebano emin, ap enarluedek ebano emin, is en wene disogo mo’gulnentigisa o,” oluk ’beli’gogo mo’gulentigisa. 24#Kel. 20:11; Neh. 9:6; Mzm. 146:6Asogo mo’gulentigisema enesa’go hweligisarik e, enemin la’bulogo enede mesigat welat, Allah yo’go pegesa. Yo’go pogulat e,

“Nenaik. Nis hat heragam welege a’ge yu. ’Bogorl walhasulat, ’gwiang walhasulat, ik laut lok ye’gelak a’ge ogo walhasulat, di a’ge yu a’ge ’bogorl pam a’ge emin, ’gwiangma a’ge emin, ik olomu welago a’ge logon emin ’berlegat walhasulat, tigen ai hat en nak o. 25#Mzm. 2:1-2Nis nene’ba Daud ano hat en, at yo’go pegenma re, Harogun ogola welat, wene hat en e’gen a’ge at en disogo egei,

Di aphwami yu aphwami o’borl o’gwe a’ge onolot het agalat e,

eniak uarek-’buareksogo wene ’baligisa ai nopaget.

Ye, is aphwami ena’gul onuk da ’ge ya ’ge wene ’burlat ’baligisa ai nopaget,

26Is ap ononuk logo ’gwiangma a’ge yema inotluk,

’gaindek logon enemin la’bulogo odoktak poluk,

Nenaik ’gain Onuk Logo a’ge Allah, is en e,

Ebe nenebit o.

Omlogo Kristus yo’go poluk perakpou waga a’ge ai ogo, nenebirat o.

Nenemin weim obuok, oluk ai pagerat heberlogo oruak,

oluk egenma ebe Daud en egei ai o. 27#Mat. 27:1-2; Mrk. 15:1; Luk. 23:1,7-11; Yoh. 18:28-29Asogo e’gen ’gela’geat, at Herodes emin, Pontius Pilatus emin, aphwami o’borl o’gwe a’ge emin, aphwami Israel a’ge emin, hat hu’gwarek heragam a’ge Yesus nis aphwami delnonobuagoluk edikpegen a’ge ano, woruogoluk demat o yema odoktu egesa ai paget e’gen ai o. 28A’ge re, wene ai, hat he’gik anni oruak a’ge hogola en e,

Asogo tuak, oluk epegen hegitsogoat, asogo tigisa ai o. 29A’ge re, nenaik. Nis watnonobuogoluk ogwi ai hil yerentemen o. Nis hosi yema wene hat en e’gen a’ge ai, nonogorlok erlaksogo mo’gulontogu lemagoluk hanni woknentemen o. 30Hat hanni woknentasuam e, hu’gwarek heragam a’ge Yesus onuk pam hat he’gik pamat aphwami ou obabenebiselat, wene pobi tuagoluk elalin tu puk a’ge tagenebasulat, togun ai, ebe nis en tagonobogu lemagoluk hanni woknentemen o,” oluk Allah yo’go pegesa.

31Asogo Allah yo’go pogu legesema re, o is odoksogo welegesema ano o’borlogouk egei. Oborlogouk eselat e, Allah Arogun enebe ’berlegat onogola ’betesogo ’gwegeimu, wene Allah en egei a’ge aphwami onogorlok erlaksogoat mo’gulontogu legesa.

Allah eiyagai en ena’ge-a’ge enebe ’berlegat so’busogo horlogu legesa wene

32 # Per. 2:44-45 Is wene demat oluk wegesa a’ge ai, enebe esan ebano re, enede mesigat nagat welegesa. Welat e, ena’ge di a’ge yu a’ge ’berlegat,

“Yu an na’ge o,” oluk u erlakma en e,

“Nenebe ’berlegat nena’ge-a’ge o,” oluk, ogu legesa. 33Asogo ogulat e, is ap Yesus en enebe yo’go onoboluk peragenebesi a’ge ebano en,

“Nonue ’gain Onuk Logo a’ge Yesus elaluk agama nenil arat hege o,” oluk eniak modok annisogoat mo’gulontogu legesa. Mo’gulontogukhwe re, Allah ebabut op ano en loksogoat lerentasu laga. 34-35Asogo lerentasukhwe re, is ono’gwiang eiye welegesa a’ge emin, onowi werik eiye welegesa a’ge emin, aphwami mu a’ge enebam o’go uang wogu legesa. Wogulat e, uang ai is en woluk ap Yesus en enebe yo’go onoboluk peragenebesi a’ge ebano ene’gikmu pou waga legesa. Pou wagaiam e, is pema ena’ge erlak a’ge enebe lo’bok elitsogoat so’busogo horlogu legesa. Asogo togu legesa ai en, is ado enerlagaik agai erlagat welegesa.

36Asogo tugulat e, ap mesik onuk Yusuf. A’gul onuk Lewi a’ge. Owi o onuk Siprus a’ge, is ap Yesus en enebe yo’go onoboluk peragenebesi a’ge ebano en, nis neniak pam onuk Enedesebeliso oluk u ’gela’ge, is eniak pam onuk Barnabas tualigisa. 37Ap ai o’gwiang oruakma re, is mu a’ge enebam o’go uang wesirik e, uang ai woluk, is ap Yesus en enebe yo’go onoboluk peragenebesi a’ge ebano ene’gikmu pou waga.

Currently Selected:

Peragenebesi 4: Wul

Highlight

Copy