Mitiro 4
4
Pedro na Johani va kecariwa mahlweni ka hubye.
1Kota lezi va nga wa ha kanela ka vanhu, a vapristi ni nduna ya tempeli ni vaSadusi va lota kabye,
2na va zangarile hilezi va nga gonzisa vanhu, vaba hungu hi kuvuka ka vafileko ha Jesu. Neh. 2:10; Mat. 22:23; Xip. 23:8
3Va lo va khoma, va va khotsela paxweni kala manziko, hakuva gi wa pelile.
4Kanilezi a vanyingi va lava va ngazwa a mhaka va lo kholwa; ni tsengo wa vavanuna wu wa hi kusuhani ka 5,000.
5Ku te hi manziko wa kona, a vafumeli vabye, ni masingalakati, ni vatsali va lo tsombana ta Jerusalema;
6na Anasi a mupristi wa hombe i wa hi kona, na Kayafasi, na Johani, na Alekzandre, ni vontlhe lava va nga hi maxaka ya mupristi wa hombe. Lu. 3:2; Joh. 11:49; 18:13
7Laha na va yimisile a vapostoli xikari kabye, va lo va wutisa, vaku: Mu mahile lezi hi ntamu muni, kutani hi gihi vito ke? Ekso. 2:14; Mat. 21:23
8Zonake Pedro, na a tele hi Moya wa ku Basa, aku ngalo kabye: Nwina vafumeli va vanhu, na nwina masingalakati, Lu. 12:11
9lezi hi hloliwako nyamutlha hi kota ya ntiro wo saseka lowu wu mahelweko munhu a nga hi xilema, niku munhu loyi i hanyisisilwe kuyini;
10ngha zi tiveka ka nwina nwentlhe, ni ka vanhu vontlhe va ka Israeli, lezaku loyi munhu a yimileko mahlweni ka nwina, i hanyisilwe hi vito ga Jesu Kristu wa le Nazareta, loyi nwina mu nga mu belela, loyi Nungungulu a nga mu vuxa hi ka vafileko. Xip. 3:6
11Hi yena a nga ribye gi nga aliwa hi nwina vaaki, legi gi nga mahiwa a hloko ya magumo. Tis. 118:22; Isa. 28:16; Mat. 21:42; Rom. 9:33
12A ku kona kuhanyiswa hi ka munwani; hakuva a ku na vito ginwani lahasi ka tilo, legi gi nyikilweko xikari ka vanhu, legi hi nga hanyiswako ha gona. Mat. 1:21; Xip. 10:43; Rom. 3:24; 1 Tim. 2:5
13Laha na va wonile a kutiya ka Pedro na Johani, na va tiva lezaku mbanhu va nga gonzangiko, va nga vanhu ntsena, va lo hlamala; zonake va lo va tiva, lezaku va wa hi zinwe na Jesu. Mat. 11:25; 1 Kor. 1:27
14Ni loku va wona a munhu loyi a hanyisilweko na a yimile zinwe navo, va wa nga hi na nchumu xa ku kaneta,
15va va laya ku huma handle ka hubye. Va lo wutisana xikari kabye,
16vaku: Hi ta maha yini hi vanhu lava ke? Hakuva za su dlunya ka vontlhe lava va akileko le Jerusalema, lezaku xihlamaliso xa hombe xi mahilweko hi vona; hina a hi na ku xi kaneta. Joh. 11:47; Xip. 3:9
17Kanilezi lezaku a mhaka leyi yi nga nonohisi yi hangalaka xikari ka vanhu, a hi va tsimbeteni, lezaku va nga ha wulawuli ka munhu ni munwe hi vito legi.
18Va lo va vitana, va va layisisa a ku kala va nga ha wulawuli hambu ku gonzisa hi vito ga Jesu.
19Kanilezi Pedro na Johani, va lo va hlamula, vaku: Kutani zi sasekile mahlweni ka Nungungulu a ku ingisa nwina ku hunza ku ingisa Nungungulu, lamulani ha nwece; Xip. 5:29; Gal. 1:10
20hakuva a hi zi koti ku miyela ni lezi hi zi wonileko, ni lezi hi zi zwileko. Xip. 1:8; 2:32; 22:15; 1 Joh. 1:1
21Zonake loku va va honokele, va lo va tsika; a va kumangi nchumu xa ku va tsayisa ha xona, hi kota ya vanhu; hakuva vanhu vontlhe va lo dumisa Nungungulu hi lezi zi mahilweko. Mat. 21:26; Lu. 20:6; 22:2; Xip. 3:7, 8
22Hakuva a munhu loyi a nga hanyisilwe hi xirewukiso lexo, i wa hi ni 40 wa malembe ma hlamusa.
A makholwa ma khongela.
23Laha na va va tlhatlhile, va lo tlhelela ka va ka kabye, va ya hlawutela zontlhe lezi a vapristi va hombe ni masingalakati va nga zi wulile kabye. Xip. 12:12
24Vona na va zi zwile, va lo tlakusa magezu yabye ka Nungungulu hi mbilu yinwe, vaku ngalo: Hosi, wena loyi u nga maha a tilo ni misava ni bimbi, ni zontlhe lezi zi nga ka zona; 2 Tih. 19:15; Ekso. 20:11; Jer. 32:17
25wena loyi u nga wula hi Moya wa ku Basa, hi nomu wa nanza ga wena Davida a koko wa hina, uku:
A vamatiko va lo maha pfilupfilu hikuyini,
Ni vanhu va alakanyela a zilo zi nga nyawuliko ke? Tis. 2:1
26A tihosi ta misava ti vukile,
Ni tihosana ti wa tsombene khatiginwe,
Ti vukela Hosi ni ku vukela a Totilweko wakwe.
27Hakuva kunene vaHerodi na Pontiu Pilatu, zinwe ni vamatiko ni vanhu va ka Israeli, va wa tsombene a mutini lowu, kasi ku vukela Jesu, a Nanza ga wena gi basileko, loyi wena u mu totileko, Maheb. 7:26; Isa. 61:1; Joh. 10:36
28kasi va maha lexi u nga xi yimisile hi kale hi canja ga wena ni khungo ga wena, a kuva xi maheka. Xip. 2:23
29Makunu, Hosi, cuwuka a kuhonoka kabye, u nyika malanza ya wena a ku kanela a mhaka ya wena hi kutiya kontlhe, Isa. 58:1; Ezek. 2:6; Xip. 19:8; Efe. 6:19
30na u kari u nawuluta a canja ga wena kasi ku hanyisa; lezaku a ziwoniso ni zirewukiso zi fela ku mahiwa hi vito ga Jesu, a Nanza ga wena gi basileko. Xip. 5:12; 3:6, 16
31Laha na va khongele, a wutshamu legi va nga tlhangene ka gona gi lo tsekatsekiswa, vona vontlhe va tatiswa hi Moya wa ku Basa, va kanela a mhaka ya Nungungulu hi kutiya. Xip. 2:2, 4; 16:26
Vapizani va hlengela zontlhe.
32Hi linyingi la vona lava va kholilweko va wa hi va mbilu yinwe ni muhefemulo munwe; ku wa nga hi kona ni munwe a ngaku ngalo, a zilo a nga nazo za yena yece; kanilezi va lo hlengela zilo zontlhelele. Rom. 15:5; Fil. 1:27; 1 Ped. 3:8; Xip. 2:24
33A vapostoli va lo kustumunya hi ntamu wa hombe hi kuvuka ka Hosi Jesu; ni tipswalo ta hombe ti wa hi hehla ka vona vontlhe. 1 Tes. 1:5; Xip. 1:22; 2:47
34Ku wa nga hi kona a vumalako xikari ka vona; hakuva vontlhe lava va nga hi ni zipetso, kutani tiyindlu, va lo zi xavisa, va neha a mali ya lezi zi xabyisilweko, 1 Joh. 3:17; Xip. 2:45
35va yi veka mikonzweni ya vapostoli; zonake ku lo avelwa ka munwe ni munwani kota zi lavekako ka yena. Xip. 6:1
36Josefa, loyi a nga chuliwa hi vapostoli ku ngalo hi Barnabasi, lezo hi ku ngalo, Mukhongoteli, loyi a nga hi muLevi, a pswalelweko le Kupero,
37na a hi ni simu i lo gi xavisa, a neha a mali, a ta yi veka mikonzweni ya vapostoli. Mav. 3:9; 11:25; Mat. 19:29; Lu. 12:33; 1 Tim. 6:19
Currently Selected:
Mitiro 4: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
