Mitiro 5

Ananiasi na Safira.

1Kanilezi a munhu wo kari loyi a vitwako Ananiasi, ni sati wakwe Safira, i lo xavisa a simu,

2a pambula a xipanze xa mali a khweketa, i wa zi tiva ni sati wakwe; a neha xipanze xo kari a xi veka mikonzweni ya vapostoli. 1 Tim. 6:10

3Kanilezi Pedro aku ngalo: Ananiasi, hikuyini Satani a tatisileko a mbilu ya wena, lezaku u hemba wunwa ka Moya wa ku Basa, ni ku khweketa a xipanze xa mali ya simu ke? Mitse. 30:2; Deut. 23:21; Lu. 22:3; Joh. 8:44

4A simu na gi nga se ku xavisiwa, gi wa nga hi ga wena ke? Anzhako na gi xabyisilwe a mali yi wa nga hi ya wena ke? Hikuyini u alakanyileko ku maha xilo xa kunghahi? A ku hembangi ka vanhu, kanilezi ka Nungungulu.

5Laha Ananiasi na a zwile magezu lawa i lowa hasi afa; vontlhe lava va nga zizwa va lo chava nguvu.

6Ni majaha ma lo suka ma mu petsela, ma mu humesa lahandle a ku ya mu lahla. Joh. 19:40

7Loku ku hunzile tihora tinharu a sati wakwe i lo enghena, na a nga zi tivi lezi zi mahekileko.

8Pedro aku ngalo kakwe: Mu xavisile a simu hi mali leyi ke? Yena aku ngalo: Ina, hi yona leyi.

9Pedro aku ngalo kakwe: Hikuyini mu vumeleneko a ku ringa a Moya wa Hosi ke? Wangabye, a mikonzo ya lava va lahlileko a nuna wa wena yi laha nyangweni, na wena va ta ku rwala lahandle. Deut. 6:16; Mat. 4:7; Lu. 4:12; 1 Kor. 10:9

10Khalakale i lowa mikonzweni yakwe, afa. A majaha ma lo enghena ma ta mu kuma na a file; ma lo mu humesa lahandle, ma ya mu lahla nkele munwe ni nuna wakwe.

11A kuchava ka hombe ku lota hehla ka handla gontlhe, ni hehla ka vontlhe lava va nga zizwa lezi zilo.

A ziwoniso ni zirewukiso zo tala.

12Ku lo mahiwa a ziwoniso ni zirewukiso zinyingi xikari ka vanhu hi mandla ya vapostoli. A makholwa wontihe ma lo tsombana le ligumbagumbeni la Solomoni, na va hi va mbilu yinwe. Mar. 16:15-20; Xip. 14:3; Rom. 15:8; Maheb. 2:4

13Xikari ka vanwani ku wa nga hi kona ni munhu a nga tiya ku ti tlhanganyisa na vona; kanilezi a vanhu va lo va dzunza nguvu. Joh. 9:22; 12:42; 19:38; Xip. 2:47

14Lava va nga kholwa ka Hosi va lo engetelwa nguvu, a wunyingi ga vavanuna ni vavasati;

15laha ka kuva va humesela a vababyako va va yisa maphangweni, va ya va etlelisa masangweni ni zitandeni, lezaku loku Pedro a hunza, a nzhuti wakwe wu fela ku sirela munwani wa vona. Mat. 9:21; 14:36

16Kambe a vaaki va le mitini leyi yi renzelekeleko Jerusalema va lota na va neha a vababyi, ni lava va nga karatwa hi mimoya ya kubiha; va ta hanyiswa vontlhelele. Mar. 16:17

Vapostoli va khomiwa, va tlhatlhiwa hi ngelosi.

17Kanilezi a zilo lezi zi lo vuxa a mupristi wa hombe, ni vontlhe va nga hi zinwe naye, va nga hi vaSadusi, va tatiswa hi mona, Xip. 4:1, 2

18va khoma a vapostoli, va va khotsela paxweni. Lu. 21:12

19Kanilezi a ngelosi ya Hosi yi lo vulula a tivati ta paxo ni wusiku, yi va humesa, yiku: Tis. 34:7; Xip. 12:7; 16:26; Maheli. 1:14

20Fambani, mu ya yima tempeleni, mu byela vanhu a timhaka tontlhe ta Wutomi legi. Joh. 6:68; 17:3; 1 Joh. 10:11

21Laha va nga zi zwile, va lo enghena tempeleni ni mixo, va gonzisa kona. Kanilezi a mupristi wa hombe, ni lava va nga hi naye, va lota va ta tsombanyisa a hubye ni masingalakati wontihe ya vana va ka Israeli, zonake va lo rumela paxweni a ku ya teka vapostoli. Xip. 4:5, 6

22Kanilezi laha a malanza ma nga chikela paxweni, a ma va kumangi; ma lo wuya, ma ta hlawutela,

23maku: A yindlu ya paxo hi yi kumile na yi valilwe khwatsi, a varinzeli na va yimile laha tinyangweni; kanilezi laha hi nga vulula a hi kumangi munhu lomo nzeni.

24Laha a mufumeli wa tempeli ni vapristi va hombe na va ti zwile leti timhaka, va lo kanganyiseka ha tona, lezaku zi ta gumesisa kuyini. Lu. 22:4; Xip. 4:1

25Zonake ku lota munwe a ta va byela, aku: A vavanuna lava mu nga va enghenisa paxweni, va yimile tempeleni va gonzisa vanhu.

26A nduna yi loya zinwe ni malanza a ku ya va neha; kanilezi va wa nga va susumetangi hi ntamu, hakuva va lo chava vanhu, vaku va nga gandliwa hi maribye. Mat. 14:5; 21:26

27Loku va wuyile navo, va lo va yimisa mahlweni ka hubye. A mupristi wa hombe i lo va wutisa,

28aku: Hi lo mu layisisa nguvu lezaku mu nga gonzisi hi vito legi; hambu zi hi tano, mu tatisile Jerusalema hi kugonzisa ka nwina, mu xuva ku neha a nkhata wa loyi munhu hehla ka hina. Mat. 23:35; 27:25; Xip. 4:18; 2:23; 3:15

29Pedro ni vapostoli va lo hlamula vaku ngalo: Hi fanele ku ingisa Nungungulu ku hunza ku ingisa vanhu. Gal. 1:10

30A Nungungulu wa vakoko va hina i vuxile Jesu, loyi nwina mu nga mu daya mu mu hayeka sinyeni. Xip. 10:39; Gal. 3:13; 1 Ped. 2:24

31Kanilezi Nungungulu i lo mu tlakusa hi canja gakwe ga xinene, a kuva Hosi ni Muhanyisi, kasi ku nyika kuhunzuluka ka Israeli, ni kutsetselelwa ka zionho. Xip. 2:33; Fil. 2:9; Isa. 9:6; Ezek. 34:24; Mat. 1:21; Efe. 1:7

32Hina hi vakustumunyu va timhaka leti, zinghaho ni Moya wa ku Basa lowu Nungungulu a wu nyikileko ka vona lava va mu ingisako. Joh. 15:26

33Kanilezi vona laha na va zi zwile, va lo zangara, va kanakanela ku va daya.

34Kanilezi a muFarisi a vitwako Gamalieli, a mugonzisi wa nayo, a nga dzunziwa hi vanhu vontlhe, i lo suka a yima hubyeni, a laya lezaku a vapostoli a va nga humeswa xikhatanyana. Xip. 22:3

35Aku ngalo ka hubye: Nwina madota ya ka Israeli, ti woneleni hi ku kumbuka lava vanhu, lezi mu lavako ku va maha zona.

36Hakuva a kalanyana ku lo huma Teudasi, loyi a ngaku i munhu wa hombe; loye a 400 wa vavanuna va nga namarela kakwe; kanilezi i lo dawa, ni vontlhe va nga kholwa ka yena va lo hangalaka, va nga ha hi nchumu.

37Anzhako ka yena ku lo huma Judasi wa le Galilea a xikhatini xa xitsalela, a kucetela vanhu a kuva va hluwuka; yenawu i lofa, ni vontlhe lava va nga mu ingisa va lo hangalaka. Lu. 2:1; 13:1

38Makunu nzi ngalo ka nwina: Tsikani lava vanhu, mu va tlhatlha; hakuva loku legi khungo ni lowu ntiro wu hi wa vanhu, wu ta hangalaka; Tis. 127:1; Mav. 21:30; Isa. 8:10; Mat. 15:13

39kanilezi loku wu hi wa Nungungulu, mu nga ta zi kota ku va hlula; mu nga dzuka mu kumiwa mu kari muiwa na Nungungulu. Mat. 16:18; 1 Kor. 1:25; Fil. 1:28; Kuv. 17:14; Xip. 9:5

40Vona va lo mu ingisa. Laha na va vitanile a vapostoli, va lo vaba, va va laya lezaku va nga ha kaneti hi vito ga Jesu, va va tsika va famba. Mar. 13:9; Lu. 20:10

41A vapostoli va lo suka hi laha hubyeni, na va tsaka hilezi va hlayelweko lava va faneleko a ku xaniseka hi kota ya vito ga Jesu. Mat. 5:12; Rom. 5:3; 2 Kor. 12:10; Fil. 1:29; Jak. 1:2

42A va tsikangi a ku kanela wontihe masiku lomu tempeleni ni le kaya, va gonzisa hi Jesu lezaku hi Kristu.

Currently Selected:

Mitiro 5: TSC72

Highlight

Copy