Mitiro 3

A xilema xi hanyiswa.

1Pedro na Johani a va kari va kanziha vaya tempeleni hi xikhati xa kukhongela, xi nga hi 3 horas wa gambo:

2Ku wa rwelwe a munhu wo kari loyi a nga wa hi xilema hi le rumbyini ga nyine wakwe, loyi va nga mu veka a masiku ni masiku laha nyangweni yi vitwako Yo Saseka, kasi a kombela a zinyikiwo ka lava va nga enghena lomo tempeleni. Joh. 9:8

3Laha a nga wona Pedro na Johani na va kari va enghena tempeleni, i lo kombela xinyikiwo ka vona.

4Pedro i lo mu cuwukisisa, zinwe na Johani, aku: Hi cuwuke.

5Yena i lo va cuwuka, na a tsumba ku amukela nchumu ka vona.

6Kanilezi Pedro aku ngalo: A nzi na siliva ni nzalama; kanilezi lezi nzi nga nazo, nza ku nyika zona: Hi vito ga Jesu Kristu wa le Nazareta, suka U famba. 1 Ped. 4:10; Xip. 4:10

7Zonake i lo mu khoma hi canja ga xinene, a mu yimisa; khalekhale a mikonzo yakwe ni mahlakala yakwe zi lo tiyiswa.

8I lo tlula a yima, a sangula ku famba; zonake i lo enghena navo tempeleni, a tlula-tlula, a bonga Nungungulu. Isa. 35:6

9Vanhu vontlhe va lo mu wona na a kari a famba, a bonga Nungungulu. Xip. 4:21

10Laha va nga mu tiva lezaku hi yena a nga tshamela ku hiwa zinyikiwo laha nyangweni Yo Saseka ya tempeli, va lo hlamala ni ku riwuka hi kota ya lezi zi mahekileko kakwe.

11Kota lezi a nga wa ha khomelela ka Pedro na Johani, a vanhu vontlhe va lo tsutsumela kabye a ligumbagumbeni leli li vitwako la Solomoni na va hlamala nguvu. Joh. 10:23; Xip. 5:19

12Laha Pedro a nga zi wona, aku ngalo ka vanhu: Nwina madota ya ka Israeli, hi yini mu hlamalako hi munhu loyi ke? Hi yini mu cuwukisisako hina, ku khwatsi hi mu mahile a famba hi ntamu ni kululama ka hina? 2 Kor. 3:5

13A Nungungulu wa Abrahama, ni wa Isaka, ni wa Jakobe, a Nungungulu wa vakoko va hina, i dumisile a Nanza gakwe Jesu; loyi nwina mu nga mu nyikela ka Pilatu, mu mu kaneta mahlweni kakwe, laha yena a nga lava ku mu tlhatlha. Xip. 5:30; Joh. 7:39; 12:16; 17:1; Fil. 2:9

14Mu lo kaneta loyi wa Kubasa ni wa Kululama, mu kombela lezaku mu tlheliselwa a mudayi, Tis. 16:10; Mar. 1:24; Xip. 7:52

15mu daya a Hosi ya wutomi; kanilezi Nungungulu i mu vuxile hi ka vafileko; hina hi vakustumunyu va lezo.

16Hi kukholwa vitweni gakwe, gona vito gakwe gi mu nyikile ntamu loyi munhu, loyi mu mu wonako, mu mu tiva; ina, a kukholwa ka Jesu ku mu hanyisile mahlweni ka nwina nwentlhe. Mat. 9:22; 1 Ped. 1:21

17Makunu vamakabye, nza zi tiva lezaku mu zi mahile hi kungativi, kota lezi va nga zi maha ni varangeli va nwina. Lu. 23:34; 1 Kor. 2:8

18Kanilezi Nungungulu i zi tatisile lezo, lezi a nga zi tivisile kale hi milomu ya vaprofeti vontlhe, lezaku, Kristu wakwe i ta xaniseka. Tis. 22; Isa. 50:6; 53:5; Dan. 9:26; 1 Ped. 1:10

19Hikwalaho ti soleni, mu hunzuluka, kasi a zionho za nwina zi fela ku vinyetelwa, kasi ku chikela a zikhati za kuhumutwa hi le ka Hosi;

20lezaku yi hi rumela Kristu loyi a yimiselweko nwina, a nga yena Jesu;

21loyi a tilo gi faneleko ku mu amukela ku kala xikhatini xa kutlheliselwa ka zilo zontlhe, lexi Nungungulu a kanetako ha xona hi milomu ya vaprofeti vakwe vo basa, lava va nga hi kona hi kata ka matiko. Xip. 1:11; Maheb. 8:1

22Mosi i te ngalo: Hosi Nungungulu i ta mu vuxela a muprofeti xikari ka vamakabye va nwina, wo kotisa mina; mu ta mu ingisa ka zontlhe lezi a ta nga mu byela zona. Deut. 18:15; Maheb. 3:2-5

23Ni wihi munhu loyi a nga ingisiko a muprofeti loye, i ta lobyiswa aku bhi xikari ka tiko. Maheb. 2:2, 3; 10:29; 12:25

24Ina, ni vaprofeti vontlhe kusukela ka Samueli ni lava va mu tlhatamako, vontlhelele lava va nga wulawula va lo tivisa hi masiku lawa.

25Nwina mu vana va vaprofeti, ni va xivumelwano lexi Nungungulu a nga xi maha ni vakoko va nwina, laha a ngaku ngalo ka Abrahama: Hi ka pswalo wa wena a tixaka tontlhe ta misava ti ta katekiswa. Gen. 12:3; Rom. 9:4, 8; 15:8; Gal. 3:26

26Nungungulu i sangulile hi nwina, a mu humesela a Nanza gakwe Jesu, a mu rumela a ku ta mu katekisa, hi ku mu hunzulukisa nwentlhelele, mu tsika a zionho za nwina.

Currently Selected:

Mitiro 3: TSC72

Highlight

Copy