Mitiro 2
2
Pentekosta.
1Laha a siku ga Pentekosta gi nga wa chikele, vona vontlhe va wa tsombene wutshamu ginwe. Levi 23:15; Deut. 16:9
2Hi xitshuketi ku lo zwakala hi le tilweni a kuvumavuma kota a bhubhutsa ga mheho ya ntamu, ku tata a yindlu leyi va nga wa tshamile ka yona. Xip. 4:31
3Ku lo woneka kabye a tirimi to fanana ni nzilo, ti nga avanyeka ku tshama linwe hehla ka munwe ni munwani.
4Vontlhe va lo tatiswa hi Moya wa ku Basa, va sangula ku wulawula hi tinwani tirimi, kota lezi Moya wu nga va nyika ku wulawula zona. Xip. 1:5; Mar. 16:17; 1 Kor. 12:10; 13:1; 14:2
5Ku wa hi ni vaJuda lava va akileko Jerusalema, va matiko wontihe lahasi ka tilo, va nga vanhu va pinyamileko kukhozeleni. Ekso. 23:17
6Laha ku nga zwakala a kuvumavuma loko, a xidlemo xa vanhu xi lo tsombana, va kanganyiseka, hakuva munwe ni munwani i wo vazwa na va kanela hi lirimi la ka kabye.
7Vontlhelele va lo riwuka, va hlamala, vaku: Xana vontlhe lava va wulawulako a hi va le Galilea ke?
8Zi mahisa kuyini lezaku hi vazwa va wulawula hi lirimi leli munwe ni munwani wa hina a pswalelweko ka lona ke?
9Hina vaPartia, ni vaMedi, ni vaElamita, ni lava va akileko le Mesopotamia, ni le Judia, ni le Kapadokia, le Pontu, ni le Asia,
10le Frigia, ni le Pamfilia, le Gipite, ni matlhelo ya Libia kusuhani ka Kirene, ni valuveli va le Roma, a vaJuda ni vaproselita, Ekso. 12:48; Isa. 56:6
11a va le Kreta, ni vaArabia, hina hontlhe ha vazwa na va kari va wulawula hi tirimi ta hina hi mitiro ya ntamu ya Nungungulu.
12Vona vontlhe va lo riwuka, va kanganyiseka, va wutisana vaku: Zi komba yini lezi ke?
13Kanilezi a vanwani va lo tseketsela, vaku: Va vimbelwe hi vinya go tsombela. A kukanela ka Pedro.
14Kanilezi Pedro i lo suka, a yima zinwe ni vakhume ni munwe, a tlakusa gezu, a kanela kabye, aku: Nwina madota ya le Judia, na nwina nwentlhe lava mu akileko Jerusalema, ngha na mu tiva lezi, mu ingisa a timhaka ta mina.
15A vanhu lava a va popiwangi kota lezi nwina mu alakanyako, hakuva ka ha hi 9 horas wa mixo ntsena.
16Kanilezi leyi hi mhaka leyi a nga yi kanela muprofeti Joeli, a ku ngalo:
17Ku ta maheka masikwini ya kugumesa, ku wula Nungungulu,
Nzi ta chulula a Moya wa mina hehla ka nyama yontlhe;
A varisanyana va nwina ni vanhanyana va nwina va ta profeta,
A majaha ya nwina ma ta wona ziwoniso,
Ni zikhosana za nwina zi ta lora miloro. Isa. 44:3; Ezek. 11:19; 36:27; Joeli 2:28; Zak. 12:10; Xip. 10:45; 21:9
18Ina, nzi ta chulula a Moya wa mina masikwini lawo
Hehla ka malanza ya mina ya xinuna ni ya xisati; ma ta profeta. Xip. 21:9; 1 Kor. 12:10; 14:1
19Nzi ta wonisa zihlamaliso le tilweni,
Ni ziwoniso laha hasi misaveni:
A nkhata ni nzilo ni hunguva ya musi. Joeli 2:37
20A gambo gi ta pfhupeliswa,
A hweti yi hunzuka yi maha nkhata,
Na gi nga se nga chikela a siku ga Hosi,
Legi ga hombe ni gi dumileko. Mat. 24:29
21Ku ta maheka lezaku ni wihi a ta nga khongela vitweni ga Hosi i ta hanyiswa. Rom. 10:13
22Nwina madota ya ka Israeli, ingisani leti timhaka: Jesu wa le Nazareta, loyi a nga mahelwa wumboni mahlweni ka nwina hi Nungungulu, hi mitiro ya ntamu, ni zirewukiso ni ziwoniso, lezi Nungungulu a nga zi maha ha yena xikari ka nwina, kota lezi mu zi tivako nwina wutsumbu; Maheb. 2:4
23loyi a nyikelweko ntanwini wa nwina, hi khungo gi tiyileko ga Nungungulu, ni kutiva kakwe ka kale; nwina mu mu belele, mu mu daya hi mandla ya zihunza-milayo. Lu. 24:44; Xip. 4:28
24Kanilezi Nungungulu i lo mu vuxa, a mu tlhatlha kubayisekeni ka kufa; hakuva zi wa nga koteki lezaku a khomiwa ha kona. Xip. 3:15; 4:10; Rom. 4:24; 8:11; 1 Kor. 15:15; Gal. 1:1; Efe. 1:20; Kol. 2:12
25Hakuva Davida i kanele ha yena, aku:
Nzi lo wona a Hosi mahlweni ka mina xontlhe xikhati,
Hakuva yi le reveni ga mina ga xinene, aku kasi nzi nga tsekatsekiswi. Tis. 16:8
26Hikwalaho a mbilu ya mina yi lo tsaka, ni lirimi la mina li nengela,
Ni wona miri wa mina wu ta tshama hi kutsumba.
27Hakuva u nga ta tsika a muhefemulo wa mina le Hayidesi,
Ge hambu ku tsika a Wakubasa wa wena a wona kubola. Lu. 1:35
28Wena u nzi kangetile a tindlela ta wutomi,
U ta nzi xurisa hi kutsaka a mahlweni ka wena.
29Vamakabye, nzi nga mu byela ziku dlunya hi kokwani Davida, lezaku i file a lahliwa, ni xilahla xakwe xa hi kona xikari ka hina kala ni nyamutlha lezi. Xip. 13:36
30Makunu lezi a nga hi muprofeti, na a zi tiva lezaku Nungungulu i wa hlambanyile ka yena hi xifungo, lezaku i ta veka munwe wa lixaka lakwe laha xitshanwini xakwe xa wuhosi; 2 Sam. 7:13; Tis. 132:11; Lu. 1:32; Rom. 1:3
31Yena na a wona lezi hi mahlweni, i lo kanela hi kuvuka ka Kristu, lezaku a nga tsikwangi Hayidesi, hambu a nyama yakwe a yi wonangi kubola. Tis. 16:10; Xip. 13:35
32Jesu loyi, Nungungulu i lo mu vuxa, hina hontlhe hi vakustumunyu va lezo. Xip. 1:8
33Na a tlakusilwe hi canja ga xinene ga Nungungulu, na a amukele ka Dadani a Moya wa ku Basa lowu wu tsumbisilweko, i chelile hehla ka hina lezi mu zi wonako ni lezi mu zi zwako. Fil. 2:9; Maheb. 10:12; Joh. 14:26; 15:26; Xip. 1:4; 10:45
34Hakuva Davida a nga kanzihangi aya matilweni, kanilezi hi yena a nge ngalo:
A Hosi yi te ngalo ka hosi ya mina:
Tshama hi le reveni ga mina ga xinene, Tis. 110:1; Mat. 22:44; 1 Kor. 15:25; Efe. 1:20
35Kala nzi veka a valala va wena a kuva Xikhegetelo xa mikonzo ya wena.
36Hikwalaho ngha yindlu yontlhe ya Israeli yi tiva hi kutiyisilweko, lezaku Nungungulu i mu mahile Hosi ni Kristu, yena Jesu loyi mu nga mu belela. Xip. 5:31
37Laha na va zi zwile, va lo tlhabyiwa timbilwini, vaku ka Pedro ni ka vanwani vapostoli: Vamakabye, hi ta maha yini ke? Zak. 12:10; Lu. 3:10; Xip. 9:6; 16:30
38Pedro aku ngalo kabye: Hunzulukani, mu bapatizwa nwentlhelele vitweni ga Jesu Kristu, kutsetselelweni ka zionho za nwina; zonake mu ta amukela a xinyikiwo xa Moya wa ku Basa. Mat. 3:2, 8; Lu. 24:47; Xip. 3:19; 17:30
39Hakuva xitsumbiso xi ka nwina, ni ka vana va nwina, ni vontlhe lava va nga le kule, ka munwe ni munwani loyi Hosi Nungungulu wa hina a ta nga mu vitana. Rom. 9:8; Joeli 2:28; Efe. 2:13
40I lo va khongotela hi timhaka tinwani to tala, a va luleka, aku: Ti poniseni xizukulwaneni lexi xi gombonyekileko.
41Lava va nga amukela a timhaka takwe va lo bapatizwa; hi lego siku ku lo engetelwa a 3,000 wa vanhu lomu bandleni.
42Vona va lo pinyamela kugonziseni ka vapostoli, ni le kutlhanganeni, ni kukhemeni ka xibaba, ni mikhogelweni. Maheb. 10:25
Vapizani va hlengela ka zontlhe.
43A munwe ni munwani i wa hi ni kuchava mbilwini; a zirewukiso zinyingi ni ziwoniso zi lo mahiwa hi vapostoli, Mar. 16:17
44ni vontlhe lava va nga kholwa va wa hi wutshamu ginwe, va lo hlengela zilo zontlhe. Xip. 4:32
45Va lo xavisa zipetso ni zilo zabye, va zi avela ka vontlhe, kota kuvumala ka munwe ni munwani. Isa. 58:7
46A masiku ni masiku va lo pinyamela hi mbilu yinwe lomu tempeleni, va khema xibaba le kaya, vaga kuga kabye hi kutsaka ni matsenya, Lu. 24:53; Xip. 20:7
47na va bonga Nungungulu, va ranzeka ka vanhu vontlhe; masiku ni masiku a Hosi yi lo engetela ka handla hi lava va nga hanyisilwe. Rom. 14:18; 8:30
Currently Selected:
Mitiro 2: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
