Mitiro 16
16
Paule na Silasi va kuma Timote.
1Zonake i lo chikela le Derbe ni le Listra. Laho ku wa hi kona a mupizani wo kari, a vitwako Timote, loyi a nyine wakwe a nga hi muJuda a kholilweko, kanilezi a raru wakwe i wa hi muGreki. Xip. 14:6; Rom. 16:21; Fil. 2:19
2Yena i wa khesiwa hi vamakabye lavo va nga wa hi le Listra ni le Ikoniume. Xip. 6:3
3Paule i wa xuva a kuva a famba naye; i lo mu teka a mu enghenisa wukwera, hi kota ya vaJuda lava va nga hi le matlhelweni lawo; hakuva vontlhe va wa zi tiva lezaku a raru wakwe muGreki. 1 Kor. 9:20; Gal. 2:3
4Kota lezi va nga ha famba va tsemakanya miti, va lo nyika vamakabye a zileletelo lezi zi nga wa yimisilwe hi vapostoli ni masingalakati ya le Jerusalema, lezaku va zi gonga. Xip. 15:28, 29
5Zinghaho a mabandla ma lo tiyiswa kukholweni, ni ziro za wona zi engetelana masiku ni masiku.
Vaya Makedonia.
6Va lo famba va tsemakanya Frigia ni le Galatia, hakuva va wa tsimbetelwe hi Moya wa ku Basa a ku kanela mhaka le Asia.
7Laha va nga chikele ku cuwukana ni le Misia, va lo ringa a kuya Bitunia; kanilezi a Moya wa Jesu a wu va vumelangi.
8Na va hunzile Misia, va lo relela vaya Troasi. 2 Kor. 2:12; 2 Tim. 4:13
9Ni wusiku ku lo woneka a muwoniso ka Paule, wa wanuna wa le Makedonia a nga yima a mu khongotela, aku: Tlhatuka, uta leno Makedonia, u ta hi vunetela. Mitse. 12:6; Xip. 10:30
10Laha a nga wonile a muwoniso, khalekhale hi lo hlota ndlela ya kuya le Makedonia, na hi pimile lezaku Nungungulu i hi vitanile ku ya kanela ivangeli kabye. Tis. 119:60; 2 Kor. 2:13
11Na hi suka Troasi hi taru, hi lo lulameta hiya Samotrake, hi manziko wa kona hi chikela Neapoli.
12Ku sukela laho hi loya le Filipi, lowu wu nga muti wa hombe tikweni ga Makedonia, gi nga kolonia ga vaRoma; hi loxwa mutini lowo a masiku yo kari. Fil. 1:1
13Hi siku ga sabado hi lo huma handle ka muti hiya congweni, laha ku nga hi kona a wutshamu ga kukhongela; hi lo tshama hasi, hi kanela ka vavasati lava va nga tsombene laho.
14A wasati a nga hi Lidia a vito gakwe, a muxavisi wa ziwunguwungu, wa le mutini wa Tuatira, loyi a chavako Nungungulu, i lo hizwa; zonake a Hosi yi lo mu vulula mbilu lezaku a ingisa lezi zi nga kanelwa hi Paule. Lu. 24:45
15Laha na a bapatizilwe zinwe ni va yindlu yakwe, i lo hi khongotela, aku: Loku muku nzi tsumbekile ka Hosi, ngonani ndlwini ya mina, mu ta tshama kona. I lo hi kurumeta. Gen. 19:3; Lu. 24:29
16Ku te laha hi nga kari hi famba wutshanwini ga kukhongela, hi lo tlhangana ni nhwana wo kari wa khumbi, loyi a nga hi ni moya wa kuvumba, a nga bhinzulela nguvu a venyi vakwe hi kuvumba. 1 Sam. 28:7; Xip. 19:24
17Yena i lo lanzela Paule na hina, a kanyuluka aku: A vavanuna lava malanza ya Nungungulu a nga Hehlahehla, lava va bako hungu ka nwina hi ndlela ya kuhanyiswa.
18I lo maha lezo masiku manyingi; kanilezi Paule na a karatiwa ha zona, i lo hunzuluka, aku ngalo ka moya lowo: Nza ku laya hi vito ga Jesu Kristu a kuva u huma ka yena! Wu lo huma kakwe hi xwalexo xikhati. Mar. 1:25, 34; 16:17
19Kanilezi laha a venyi vakwe va nga wona lezaku va nga ta ha bhinzula nchumu ha yena va lo khoma Paule na Silasi, va ya rorovisela le hubyeni mahlweni ka vafumeli.
20Laha va nga va yisile tinduneni, vaku ngalo: A vanhu lava, va nga vaJuda, va vuxa woyonga mutini wa hina, 1 Tih. 18:17; Xip. 17:6
21va gonzisa mikhuwo leyi hina vaRoma hi nga faneliko ku yi amukela ni ku yi gonga.
22A xidlemo xontlhe xi lo va vukela; a tinduna ti lo va runzuwulela a tinguwo tabye, ti laya lezaku a va biwe hi tinhonga. 2 Kor. 6:5; 1 Tes. 2:2
23Na va va bile a tirimbiri to tala, va lo va khotsela paxweni, va laya murinzeli wa gona ku va lavelela nguvu.
24Yena na a layisisilwe lezo, i lo va enghenisa paxweni ga lomo xikari, a va boha milenge yabye hi makhotso. Jer. 20:2
25Hi laha xikari ka wusiku, Paule na Silasi va wa kari va khongela, va yimbelela tisimu to dumisa Nungungulu, a tiperesu na ti va ingisela.
26Hi xitshuketi xa lezo ku wa hi kona a kutsekatseka ka hombe ka misava, laha ka kuva ku tsekatsekiswa ni ziseketelo za yindlu ya paxo, ni tinyangwa tontlhe ti vululeka, ni ziboho za tontlhe tiperesu zi tlhatlheka, Xip. 4:31; 5:19; 12:7, 10
27A murinzeli wa paxo na a khindlimukile, i lo wona a tinyangwa ta paxo na ti vululekile, a hlomula supado yakwe a lava ku ti daya, na a alakanya lezaku a tiperesu ti pfovole.
28Kanilezi Paule i lo vitana hi gezu ga hombe, aku: U nga ti lamati, hakuva hina hontlhe hi kona.
29I lo vitanisa tikandiya, a enghena hi kuhatlisa na a rurumela hi kuchava, i lowa lahasi mahlweni ka Paule na Silasi,
30a va humesa, aku: Tihosi, nzi fanele ku maha yini kasi nza hanyiswa ke? Lu. 3:10; Xip. 2:37
31Vona vaku ngalo: Kholwa ka Hosi Jesu, zonake u ta hanyiswa, wena ni ngango wa wena. Isa. 45:22; Joh. 3:16
32Va lo kanela a mhaka ya Hosi ka yena, ni ka vontlhe lava va nga wa hi lomo ndlwini yakwe.
33Zonake i lo va teka hi xikhati lexo xa wusiku, a va hlaza a tirimbiri tabye, zalezo a bapatizwa yena ni va yindlu yakwe yontlhe.
34Zonake i lo va yisa ndlwini yakwe, a ya va phamela zakuga, a tsaka nguvu zinwe ni vontlhe va yindlu yakwe, hilezi a nga kholilwe ka Nungungulu. 1 Sam. 2:1; Lu. 5:29; 19:6
35Loku gi cile, a tinduna ti lo ruma a vanyakasani, tiku: Va tlhatlheni vanhu lavo va famba.
36A murinzeli wa paxo i lo byela Paule leti timhaka, aku: A tinduna ti rumele a kuva mu tlhatlhiwa mu famba; hikwalaho humani makunu, mu famba hi kurula.
37Kanilezi Paule aku ngalo ka vona: Va hi bile kubaseni na hi nga lamuliwangi, hina vanhu hi nga vaRoma, va hi khotsela paxweni; makunu va lava ku hi humesa xihundleni ke? Kokwihi, kanilezi a vate vona wutsumbu, va ta hi humesa. Xip. 22:25
38A vanyakasani va lo ya bikela a tinduna leti timhaka; laha ti ngazwa lezaku mbaRoma ti lo chava;
39ti lota ti ta va khongotela; na ti va humesile, ti lo va kombela a kuva va suka mutini wabye. Mat. 8:34
40Vona va lo huma paxweni, vaya enghena ndlwini ya Lidia; ni laha va nga wonene ni vamakabye, va lo va tangalisa, va ti fambela.
Currently Selected:
Mitiro 16: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
