Mitiro 15
15
A hlengeletano le Jerusalema yi xuxa hi tifanelo ta varnatiko xungetano ni Nayo wa Mosi.
1A vanhu vo kari va lo relela vata hi le Judia, va ta gonzisa a vamakabye, vaku: Loku mu nga engheni wukwera kota nayo wa Mosi, a mu na ku hanyiswa. Gen. 17:10; Gal. 2:12; Joh. 7:22
2Laha Paule na Barnabasi va nga hambana navo, va kanetisana navo, a vamakabye va lo yimisa Paule na Barnabasi, ni vanwani vabye, a ku kanziha vaya Jerusalema, ku ya wutisa hi mhaka leyi ka vapostoli ni masingalakati.
3Vona na va heleketilwe hi handla, va lo tsemakanya Fenikia ni Samaria, na va hlawutela hi kuhunzuluka ka vamatiko, va tsakisa nguvu a vamakabye. Xip. 14:27; Rom. 15:24; 1 Kor. 16:6
4Laha va nga wa chikele le Jerusalema, va lo amukelwa hi handla ni vapostoli ni masingalakati, va hlawutela zontlhe lezi Nungungulu a nga wa zi mahile ha vona.
5Kanilezi a vanwani va ntlawa wa vaFarisi, lava va kholilweko, va lo suka, vaku: Za laveka lezaku a vamatiko va engheniswa wukwera, va layiwa a kuva va hlayisa a nayo wa Mosi.
6A vapostoli ni masingalakati va lo tsombana a ku ta hlola a mhaka leyo.
7Anzhako ka kuva na va xuxile nguvu, Pedro i lo suka, aku ngalo kabye: Vamakabye, nwina ma zi tiva lezaku kale Nungungulu na a nzi hlawulile xikari ka nwina, lezaku a vamatiko vazwa a mhaka ya ivangeli hi nomu wa mina, va kholwa.
8Nungungulu loyi a tivako timbilu, i lo va mahela wukustumunyu hi ku va nyika a Moya wa ku Basa, kota lezi a nga nyika ka hina. 1 Kro. 28:9; Jer. 11:20; Xip. 10:44
9A nga hambanyisangi nchumu xikari ka hina na vona, laha a nga basise timbilu tabye hi kukholwa. Rom. 10:11; 1 Kor. 1:2
10Makunu-ke, hikuyini mu ringako Nungungulu, hi ku rwexa a pingu tinhanwini ta vapizani, lowu hina ni vakoko va hina hi nga zi kotangiko ku wu rwala? Mat. 23:4; Gal. 5:1
11Kasi ha kholwa lezaku hi ta hanyiswa hi tipswalo ta Hosi Jesu, khwatsi hi vona. Rom. 3:24; Efe. 2:8
12A hlengeletano yontlhe yi lo miyela; yi ingisela Barnabasi na Paule na va hlawutela a ziwoniso ni zirewukiso lezi Nungungulu a zi mahileko ha vona xikari ka vamatiko.
13Laha na va miyele, Jakobe i lo hlamula, aku: Vamakabye, nzi ingiseni:
14Simoni i hlawutele lezi Nungungulu a nga ranga a enzela a vamatiko, a ku ti tekela xikari ka vona a vanhu va ta nga vitanwa hi vito gakwe.
15Ni timhaka ta vaprofeti ta vumelana ni lezo, kota lezi ku tsalilweko ku ngalo:
16Anzhako ka lezo nzi ta wuya,
Nzi ta vuxeta a tabernakele ga Davida legi gi wileko;
Nzi ta vuxeta a marumbi ya gona,
Nzi gi yimisa. Isa. 54:1-5; Am. 9:11
17Kasi a vanhu va seleko va fela ku lava Hosi,
Ni vamatiko vontlhe lava va vitwako hi vito ga mina,
18Ku wula Hosi, leyi yi tivekisako lezi zilo hi kale ka matiko.
19Hikwalaho a kualakanya ka mina hi loku, lezaku hi nga va karati a vamatiko lava va huhulukelako ka Nungungulu;
20kanilezi va tsaleliwa lezaku va tsika a manyala ya zifananiso, ni kubhaya, ni lezi zi fileko hi ku tlimbiwa, ni nkhata. Gen. 35:2; Ekso. 20:3; 1 Kor. 6:9; Levi 3:17; 1 Ped. 4:3
21Hakuva kusukela xikhatini xa kaleloko, Mosi i navo le mitini yontlhe, lava va mu xumayelako, na a gonziwa masinagogeni masabado wontihe.
22Zonake a vapostoli ni masingalakati, zinwe ni handla gontlhe, vaku, zi sasekile loku ku hlawuliwa a vavanuna xikari kabye, va va rumela Antiokia zinwe na Paule na Barnabasi; ku hlawuliwa Judasi a vitwako Barsaba, na Silasi, va nga varangeli xikari ka vamakabye.
23Va lo tsala papilo, va famba nago, gaku: Hina vapostoli ni masingalakati ni vamakabye, ha losetela a ka vamakabye lava va nga vamatiko va le Antiokia, ni le Siria, ni le Kilikia, hiku:
24Kota lezi hi zi zwileko lezaku a vokari va humileko ka hina va mu karatile hi kuwulawula kabye, va kanakanisa a mihefemulo ya nwina, na va nga leletelwangi hi hina; Gal. 2:4; 5:12
25hi vumelene hi mbilu yinwe a ku hlawula a madota, hi ma rumela ka nwina zinwe ni varanziwa va hina Barnabasi na Paule,
26va nga vavanuna va tsikeletileko a wutomi gabye hi kota ya vito ga Hosi ya hina Jesu Kristu. Xip. 13:50; 14:19; 1 Kor. 15:30
27Hikwalaho hi rumile Judasi na Silasi, lava vona wutsumbu va ta nga mu tivisa timhaka twaleti hi milomu yabye.
28Hakuva zi lo woneka ka Moya wa ku Basa ni ka hina, lezaku zi sasekile loku hi nga mu rwexi a nzhwalo wa hombe wo hunza zilo lezi zi lavekako;
29zi nga lezaku mu tsika lezi zi phahlelweko ka zifananiso, ni nkhata, ni lezi zi fileko hi ku tlimbiwa, ni kubhaya. Loku mu ti wonela ka lezo, mu tava mu mahile khwatsi. Salani khwatsi! Levi 17:14; Xip. 21:25; Kuv. 2:14
30Hikwalaho vona na va fambisilwe, va lo relela vaya Antiokia; na va tsombanyisile a hlengeletano va lo nyikela a papilo.
31Laha va nga wa gi gonzile va lo tsaka hi kukhongotela ka gona.
32Judasi na Silasi, lezi va nga hi vaprofeti, va lo luleka vamakabye hi magezu yo tala, va va tiyisa. Xip. 14:22; 18:23
33Anzhako ka kuva va tshamile kona a xikhati xo kari, va lo salisana ni vamakabye, va suka hi kurula va tlhelela ka lava va nga va rumile.
34Kanilezi Silasi i lo ranza ku sala leyo.
35Paule na Barnabasi va lo sala le Antiokia, va gonzisa ni ku kanela a mhaka ya Hosi, zinwe ni vanwani vo tala. Xip. 13:1
Paule a suka lwenzweni lakwe la wumbiri.
36Anzhako ka masiku yo kari, Paule aku ngalo ka Barnabasi: Ngha hi tlhela makunu, hi enzela vamakabye le mitini yontlhe leyi hi ngaba kona hungu hi mhaka ya Hosi, hi ya wona lezaku va tshamisa kuyini.
37Barnabasi i wa lava ku teka Johani, loyi a vitwako Marku, a ku famba navo, Xip. 12:12; 13:5; Kol. 4:10
38kanilezi Paule i lo alakanya lezaku a zi faneli ku mu teka va famba naye, loyi a nga va tsika le Pamfilia, a ngayi navo ntirweni.
39Ku lo vuka a kukanetisana ka hombe va kala va hambana. Barnabasi a teka Marku, aya Kupero hi taru;
40kanilezi Paule i lo hlawula Silasi, a suka na a nyikelwe tipswalweni ta Hosi hi vamakabye. Xip. 14:26
41I lo tsemakanya Siria ni Kilikia, na a tiyisa mabandla.
Currently Selected:
Mitiro 15: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
