Johane 18

Gumodwa ga Jesu

(Matewu 26:47-56; Marko 14:43-50; Luka 22:47-53)

1Na giride nombelo yoyu, Jesu a di duga ni vapizane a gu hongola khisikheyi nya gitsongwana gya Kedhroni, avbo li nga bani li romo lithembwe nya senge, umo a nga belago ni vapizane vaye. 2Judha, wule a nga mu ningela, a di gu wuti wulanga wule, kholu Jesu a di gu tshangana vbale ni vapizane vaye dzinyondro nya dzingi. 3Judha a di vbelegedza tsawa nya masotshwa ni dzindruna dzi nga rumedwago khu vaphasi nya vakhongolo ni Vafarisi, vari ni myenge ni matshari. 4Jesu, khu gu siti satshavbo si nga vbweta gu mu dugelela, a di va khinga, aya va wudzisa, khuye: “Mwa guvbweta mani?”

5Avo va di mu hakha, khavo: “Jesu wa Nazareta.” Jesu a di phindrula, khuye: “Kheni kamwe.” Judha wule a nga mu ningela, a diri navo. 6Gikhati Jesu a nga khuye: “Kheni kamwe,” va di bwelela nya gihwane, va gu thega vbavbatshi. 7A di va wudzisa nyaluphye, khuye: “Mwa guvbwetani mani, gwadi?” Va di mu hakha, khavo: “Jesu wa Nazareta.”

8Jesu a di khuye: “Nyi mi embedeni gukheni, kheni. A gu bani ari eni mu nyi vbwetago, digani ava va hongole.” 9Esi si giregide gasi gutadzisega magana a nga ganela, khuye: “Vale u nyi ningidego kha nya dzimedza ni moyo.”

10Khavbo avbo, Simoni Pedro, a nga bani ari ni litshari, a di pila khilo ndzeve ya nyamudye ya Maliko, githumi gya khongolo nya vaphasi nya mhamba. 11#Wona gambe: Mat 26:39; Mark 14:36; Luk 22:42. Aholu, Jesu a di embela Pedro, khuye: “Vega litshari wulangani gwaye. Wa guvbweta khuwe nyi si seli gikombe nya gutshaniseke nyi nga ningwago khu Babe wangu, gani?”

Pedro a ngu danga Jesu

(Matewu 26:69-70; Marko 14:66-68; Luka 22:55-57)

12Khavbo avbo, masotshwa ni vathangeli vawe, gumogo ni dzindruna nya Vajudha, va di mola Jesu, va mu hunga. 13Guhegula va di mu yisa ga Anasi, kholu a nga bani ari sade wa Khayifasi, khongolo nya vaphasi nya mhamba mwagani momo. 14#Wona gambe: Joh 11:49-50. Khuye Khayifasi yoyu a nga ningago Vajudha wusingalagadzi, nya gukhuye: “Tshukwana gufa muthu moyo afela vathu vatshavbo.”

15Gikhati gyogyo, Simoni Pedro ni moyo nya vapizane va di landrisela Jesu. Mupizane yoyo a di gu tivana ni khongolo nya vaphasi nya mhamba, khu kharato a di bela ni Jesu nyumbani ga khongolo nya vaphasi, umo nya gulamuledwe mahungu, 16a gu tshiya Pedro vbavbandze, vbamwanyatunu. Na dugide mupizane yoyu, a di lomba ga nyamayi a nga bani a gu ghadha vbamwanya gu bela ni Pedro. 17Khavbo avbo, nyamayi wule a di wudzisa Pedro, khuye: “Khandruwe nuwe mupizane wa mwama wule, gani?” Uye a di hakha, khuye: “Khandreni.” 18Vbale, si diromo sithumi ni dzindruna, va nga bani va khuthide nilo va wora, kholu gu di gu dzidzila. Uye nuye Pedro a di romo vbale a wora nilo.

Jesu a ngu lamudwa khu khongolo nya vaphasi nya mhamba

(Matewu 26:59-66; Marko 14:55-64; Luka 22:66-71)

19Khu vbale, khongolo nya vaphasi nya mhamba a di wudzisa ga Jesu khu mahungu nya vapizane vaye ni gihevbudzo gyaye. 20Jesu a di mu hakha, khuye: “Nyi ganede tigoni nyamba siha gilo; nyi hevbudzide gikhati gyatshavbo ndrani nya Nyumba nya nombelo ni Nyumbani ya Nungungulu, umo va tshanganelago umo Vajudha vatshavbo, gimwalo nyi nga ganelago khu gisihaledza. 21Khu ginani u nyi wudzisago? Wudzisa avo va ngapwa iso nyi nga va hevbudzago; va ngu siti gwadi iso nyi va embedego.”

22Na ganede esi, moyo nya ndruna a nga bani a romo vbale, a di mu veta khu pama, khuye: “Khidzo kharati u hakhago khidzo khongolo nya vaphasi nya mhamba, gani?”

23Jesu a di mu hakha, khuye: “Nya gubani nyi hosiside, nyi yeyedze gihoso gyakone; aholu, nya gubani nyi ganede gwadi, khu ginani u nyi vetago?”

24Khu vbale, Anasi a di mu rumela, na hungidwe, ga Khayifasi, khongolo nya vaphasi nya mhamba.

Pedro a ngu danga Jesu nya wuvili

(Matewu 26:71-75; Marko 14:69-72; Luka 22:58-62)

25Gikhati gyogyo, Simoni Pedro, a di khade vbagikhotunu a wora nilo va mu wudzisa, khavo: “Khandruwe nuwe moyo nya vapizane vaye, gani?” A di danga, khuye: “Khandreni.”

26Moyo nya sithumi sa khongolo nya vaphasi nya mhamba nya nongo wa wule a nga pidwa ndzeve khu Pedro, a di khuye: “Ina khandruwe nyi nga gu wona naye thembweni nya senge, gani?”

27Pedro a di danga nyaluphye. Gikhati gyogyo wu di emba khonge.

Jesu mahoni ga Pilato

(Matewu 27:1-2,11-14; Marko 15:1-5; Luka 23:1-5)

28Khavbo avbo, va di dzega Jesu khu ndrangani ga Khayifasi va gu hongola naye ga mufumeli. Gu di ngari dzimindru dzikhongolo. Avo kha va nga bela nyumbani nya gulamuledwe mahungu, gasi va si dzi loledzisi, vafela gu hodza Phasika. 29Khu kharato, Pilato a di duga vbavbandze, a gu wudzisa, khuye: “Ketso muni mu gu nayo ni muthu yoyu?” 30Va di mu hakha, khavo: “Nari pwani khandri gighohi na ha sa mu resa avbo gwago.”

31Pilato a di va phindrula, khuye: “Mu dzegeni, mu mu lamula kha nga idzo wu lombago khidzo nayo wanu.” Vajudha va di khayo: “Ethu hi mwalo fanelo nya gusonge muthu.” 32#Wona gambe: Joh 3:14; 12:32. Esi si giregide, gasi gutadzisega magana a nga ganelago Jesu, na gu thula mafelo yaye.

33Pilato a di bela nyaluphye nyumbani, a gu rana Jesu, a mu wudzisa, khuye: “Ina kamwe uwe u Mufumeli wa Vajudha, gani?” 34Jesu a di mu hakha, khuye: “Isoso u ganelago wa gu si khugela mwendro womo a nga gu embelago?” 35Pilato a di hakha, khuye: “Gasi eni nyi Mujudha, gani? Va na gyanu ni vakhongolo nya vaphasi nya mhamba khavo va gu ningedego mandzani gwangu. Gasi ginani u ghohidego?”

36Jesu a di khuye: “Mufumo wangu khandri wa mafuni momu. Nari pwani mufumo wangu khwa mafuni momu, sithumi sangu na si dwanide, gasi nyi si ningedwi ga Vajudha; aholu, mufumo wangu khandri wa omu.” 37Pilato a di khuye: “Gasi kamwe u Mufumeli?” Jesu, khuye: “Nya nga ulo u ganelago! Eni nyi Mufumeli! Nyi velegedwe isoso; khiso nyi si tedego mafuni, gasi guta ninga wufakazi nya lisine. Uye a gu wa lisine a ngupwa lito langu.” 38Pilato a di mu wudzisa, khuye: “Ginani lisine?” Na ganede esi, a di duga gambe vbavbandze, aya embela Vajudha, khuye: “Kha nyi mani nandru gwaye. 39Mu na ni giolovedzo nya gukhenu nyi tshule muthu khu Phasika. Mu ngu dzinani nyi tshule Mufumeli wa Vajudha, gani?”

40Khavbo avbo, va di hakha, na va gulumela, khavo: “Uyoyo ne, tshula Bharabhasi.” Aholu Bharabhasi yoyu a diri gighevenga.

Currently Selected:

Johane 18: BGE2014

Highlight

Copy