Johane 19

1Khu vbale, Pilato a di ningedza Jesu gasi vaya mu kwamula. 2Masotshwa ma di luga gihugu nya miba ma mu ambagisa hungoni, ma mu fenengedza giwunguwungu. 3Va di hidzimela vbafuvbi gwaye, khavo: “Sewe, Pfhumu ya Vajudha!” Va gu mu veta khu dzipama.

4Pilato a di duga gambe vbavbandze, ata, khuye: “Nyi ngu mi reselani avba, gasi mu fela gu dziti gukhenu gimwalo gihoso nyi gi manago gwaye.” 5Khu kharato, Jesu a di duga vbavbandze, na ambagisidwe gihugu nya miba ni giwunguwungu. Pilato a di khuye: “Kha mu mu woni muthu wanu yoyo!”

6Me ni gu mu wona, vathangeli nya vaphasi nya mhamba ni dzindruna va di gulumela, khavo: “A na khokhothedwe! A na khokhothedwe!” Pilato a di engedza gambe, khuye: “Mu dzegeni muya mu khokhothela enu vamune, kholu eni kha nyi mani gihoso gwaye.”

7Vajudha va di mu hakha, khavo: “Ethu hi na ni nayo. Khu guruma nya nayo yoyu, a ngu yela gufa, kholu a dzi giride Mwamana wa Nungungulu!” 8Pilato, na pwide magana yaya, a di khala hwanga. 9A di bela gambe nyumbani nya gulamulele umo mahungu, a wudzisa Jesu, khuye: “Gasi wa guta khu hayi?” Aholu Jesu kha nga mu hakha. 10Khu vbale Pilato a di khuye: “Khu nyi hakhi? Khu dziti gukhuwe nyi ngu dzi kodza gu gu tshula ni gu gu khokhothela, gani?”

11Jesu a di khuye: “U diri mwalo tshivba yoyo nari pwani khwa ningwa khu Babe wangu. Khu kharato, uye a nga nyi ningela mandzani gwago khuye a gu ni nandru nya wukhongolo.” 12Gukhugela avbovbo, Pilato a di vbweta gu mu tshula; aholu, Vajudha va di gulumela, khavo: “Wa gu mu tshula, khuri pari ya Sezari; kholu muthu watshavbo a dzi girago pfhumu a gu yeyisa Sezari.”

13Na pwide magana yaya, Pilato a di dusa Jesu vbavbandze; gasi uye a di tshala nyumbani, a gu khala vbawulangatunu wu ranwago khu Gihebheru pwani “Gabata,” gutshamusago pwani giwindri. 14Khu litshigu nya gupidwe Phasika, umo nya midiya, Pilato a di embela Vajudha, khuye: “Kha mu mu woni oyu Mufumeli wanu!”

15Aholu, avo va di gulumela, khavo: “A nafe, a nafe! Mu khokhothele!” Pilato a di khuye: “Nyi khokhothela Mufumeli wanu?” Vakhongolo nya vaphasi nya mhamba va di mu hakha, khavo: “Hi mwalo mumbe mufumeli vbavbandze ga Sezari!”

16Khu kharato, a di mu ningela gasi aya khokhothedwa. Khavbo avbo, va di dzega Jesu, va gu hongola naye.

Gukhokhothedwa ga Jesu

(Matewu 27:32-44; Marko 15:21-32; Luka 23:26-43)

17A di duga na va mu rwegide gihambano magatani, a hongola vbawulangatunu wu ranwago khu Gihebheru, pwani: “Goligota,” gutshamusago, pwani “Girwarwatunu.” 18Avbo va ngaya mu khokhothela vbakari nya vama vavili: Mumbe khu nyamudye, mumbe khu nyambade. 19Pilato a di lova gitiviso, a gi namega vbatshani nya gihambano. A di lovide, khuye: “JESU WA NAZARETA MUFUMELI WA VAJUDHA.” 20Vajudha nya vangi va di hevbula milowo yile, kholu avbo a nga khokhothedwago avbo Jesu gu diri vbafuvbi ni dhoropani. Gitiviso gile gi di lovidwe khu Gihebheru, Gigereki ni Gilati. 21Khavbo avbo, vakhongolo nya vaphasi nya mhamba va diya ga Pilato, vaya, khavo: “U nga lovi, khuwe: ‘Mufumeli wa Vajudha’; aholu, lova, khuwe: A di khuye nyi Mufumeli wa Vajudha.” 22Pilato a di va hakha, khuye: “Iso nyi lovidego si lovidwe.”

23Masotshwa, na ma khokhothede Jesu, ma di dzega guambala gwaye, ma gu kabanisa khu sipandre sina, gasi gu kabana khu wu na wawe. Va di dzega gambe ngandzu yaye, nya gulugwe gukhugela vbatshani kala vbavbatshi. 24#Wona gambe: Dzind 22:18. Va di pwanana khu gyawe, khavo: “Hi nga yi pferuli, aholu, hongoleni hi gire nyatumbatumbane, gasi gu wona yi na khala ya mani.” Yi tadzisega kharati Milowo, yi nga, khiyo: “Va kabanede guambala gwangu, va gira nyatumbatumbane khu ngandzu yangu.” Khidzo kharato ma nga gira masotshwa.

25Vbafuvbi ni gihambano gya Jesu a di romo mayi waye ni ngadza Keleyofasi, Mariya, ndruye wa mayi waye, ni Mariya Madhalene. 26Na wonide mayi waye a nga bani a ninganide ni mupizane wule a nga bani a mu gola, Jesu a di embela mayi waye, khuye: “Nyamayi, khu mu woni mwanago uyoyo.” 27A di embela nuye mupizane, khuye: “Khu mu woni mayi wago uyoyo.” Gukhugela vbale mupizane a di mu hakha ndrangani gwaye.

Gufa ga Jesu

(Matewu 27:45-56; Marko 15:33-41; Luka 23:44-49)

28Na wonide nya gukhuye satshavbo si vbede, ni guvbweta gukhuye yi tadzisege Milowo, Jesu a di khuye: “Nyi ngupwa lidora.” 29#Wona gambe: Dzind 69:21. Gi diromo vbale gikanvwana nya gutale khu ginageri. Va di tshomega wuluva vbatshavatunu, va wu nega umo nya ginageri, va mu lisa. 30Jesu, na munyide ginageri, a di khuye: “Satshavbo si tadzisegide.” Khavbo avbo, a di nogisa thamo, a gufa.

Musotshwa a ngu paya limbambo la Jesu

31Kha nga ulo a nga bani ari litshigu nya gudongisele Phasika, Vajudha va diya lomba ga Pilato guya va fanya mawundru, gasi gu va tshisa, gufela gu sirumbi si si khali vbagihambanotunu litshigu nya Sabhadho, kholu a diri litshigu likhongolo Sabhadho yile. 32Masotshwa ma diya fanya mawundru ya vale va vavili va nga bani va khokhothedwe gumogo ni Jesu. 33Na va vbohide ga Jesu, va mu wona khavo fude, kha va mu fanya mawundru, aholu, 34moyo nya musotshwa a di mu paya limbambo khu litshari, gu duga novba ni mati. 35Oyu a fakazago esi khuye a si wonidego; ni wufakazi waye khwa lisine; gambe a ngu dziti nya gukhuye iso a ganelago lisine, gasi gu enu nenu mu khodwe. 36#Wona gambe: Eks 12:46; Mit 9:12; Dzind 34:20. Esi si giregide gasi gu tadzisega Milowo, yi gu, khiyo: “Ni gimwegyo girambo gyangu kha gi na fanywa.” 37#Wona gambe: Zak 12:10; Gutu 1:7. Ni yimbe Milowo yi gu, khiyo: Va na mu khedzisa wule va nga mu payago.

Jesu a ngu dzingwa

(Matewu 27:57-61; Marko 15:42-47; Luka 23:50-56)

38Khavbo avbo, Josefe wa Arimateya, a nga bani ari mupizane wa Jesu, nya gisihaledza, khu guthava vakhongolo nya Vajudha, a di lomba ga Pilato guya dzega girumbi gya Jesu. Na dzumedwe khu Pilato, Josefe a diya dusa girumbi. 39#Wona gambe: Joh 3:1. A diya nuye Nikodhemo, wule a nga hongola aya bhula ni Jesu ni vbakari nya wutshigu, ni gipimo nya magumararu dzikilu nya mafura nya mira ni alowe. 40Va di dzega girumbi gya Jesu va gi fumbela khu myendra nya guage ni gu gi thela mafura, kha nga madzingelo nya Vajudha. 41Vbafuvbi navbo a nga khokhothedwa avbo, li diromo lithembwe nya senge li nga bani liri ni lithowo nya liphya, umo gu nga bani gusi gu dzingwi muthu. 42Kha nga lithowo lolo li nga bani li romo vbafuvbi, va di dzingela umo Jesu, khu kotani a nga bani ari litshigu nya gudongisele Phasika.

Currently Selected:

Johane 19: BGE2014

Highlight

Copy