Johane 17

Jesu a ngu lombelela vapizane vaye

1Jesu, na ganede magana yaya, a di khusedza maho a khedza Ndzadzini, khuye: “Baba, khigyo egi gikhati, dhumisa Mwanago, gasi a nuye a gu dhumisa, 2kholu u mu ningide tshivba nya gufumele sivangwa satshavbo, gasi a ninge guvbanya nya gupindruge vatshavbo vale u nga mu ningago. 3Guvbanya nya gupindruge khogu: Vati uwe basi kha nga Nungungulu nya lisine, ni guti Jesu Kristo, a gu uye u nga mu rumelago. 4Nyi gu dhumiside mafuni, kholu nyi vbedzidego thumo u nga nyi rumelago. 5Olu, Baba, nyi ninge gambe gidhumo gile nyi nga bani nyiri nagyo khu gale mahoni gwago, na li si gu vangwi litigo.

6“Nyi tiviside lina lago ga vathu nya litigo u nyi ningidego. Va diri vago, aholu u nyi ningide. Avo va vegedzide milayo yago. 7Olu va ngu dziti gukhavo satshavbo u nyi ningidego sa guta khiyo gwago, 8kholu, na nyi va embede mahungu u nyi ningidego, va di ma hakha, va gu khodwa nya gukhavo khu lisine nyi dzude khiyo gwago, ni gukhavo khuwe u nyi rumedego.

9“Nyi ngu va lombelela, kha nyi lombeleli litigo, aholu ava u nyi ningidego, kholu va gu limba uwe. 10Satshavbo si gu sangu, khyago. Niso si gu sago, tshangu; satshavbo si ngu nyi dhumisa. 11Nyi mwalo gambe tigoni, aholu avo vomo tigoni, gasi eni nyi nguta vbafuvbi gwago. Baba nya Guage, va vegedze linani gwago, lina u nyi ningidego, gasi va khale moyo, kha nga ethu. 12#Wona gambe: Dzind 41:9. Na nyi ngari navo mafuni nyi di gu va sayisa khu lina lago. Nyi sayiside vatshavbo u nga nyi ningago, mwalo ni moyo a nga dzimelago, vbavbandze ga wule gu nga vbwetega a dzimele, gasi gu tadzisega Milowo. 13Olu nyi nguta iyo gwago; aholu nyi ngu ganela esi na nyi nga romo mafuni, gasi avo va mane navo gutsaka nya guvbelele nyi gu nago. 14Nyi va hevbudzide mahungu yago, aholu va nya litigo va ngu va zondra kholu avo kha va lumbi litigo, kha nga eni neni nyi si lumbigo litigo. 15Kha nyi lombi gukheni u va dusa tigoni, aholu kheni va vbulugise guvivbani. 16Avo kha va lumbi litigo, kha nga eni neni nyi si lumbigo litigo. 17Va agise va khale vathu va lumbago uwe basi khu ndzila nya lisine. Magana yago khayo ma gu lisine. 18Kha nga uwe u nga nyi rumelago tigoni, eni neni nyi va rumede tigoni. 19Eni nyi ngu dzi ningela iyo gwago khu kotani yawe, gasi avo navo va girwe vathu va agisidwego lisineni.

20“Kha nyi lombeleli basi ava, aholu vale navo va na khodwago gwangu khu kota nya magana yawe, 21gasi vatshavbo va khale moyo basi; kha nga uwe, Baba u gomo gwangu, eni gwago, avo navo va na khale gwathu, gasi litigo li khodwe gukhilo khuwe u nyi rumedego. 22Nyi va ningide gidhumo gile u nga nyi ningago, gasi va khale moyo kha nga ethu hi gu moyo. 23Eni gwawe, uwe gwangu, gasi avo va pwanane nya guvbelele, gasi litigo li dziti gwadi gukhilo khuwe u nyi rumedego, ni gukhilo u va gode kha nga idzo u nyi godego khidzo.

24“Baba, nya guvbweta gukheni vale u nyi ningidego va manege navo avbo nyi na gu manegago eni, gasi vafela gu wona gidhumo gyangu, gidhumo gile u nyi ningidego, kholu uwe u nyi gode na li si gu vangwi litigo. 25Baba nya gululame, litigo kha la guti, aholu eni nyi gu tide, ava navo va dzitide nya gukhavo khuwe u nyi rumedego. 26Nyi va tiviside lina lago; nyi ngu nga gu va tivisa gambe, gasi lihaladzo u nyi golago khilo li khale gwawe, eni neni nyi khale gwawe.”

Currently Selected:

Johane 17: BGE2014

Highlight

Copy