Matewu 17

Wudhumo wa Jesu Gigomoni

(Marko 9:2-13; Luka 9:28-36)

1Hwane nya livbandre na limwedo matshigu, Jesu a di dzega Pedro, Johane ni ndriyaye Jakobe, a gu hongola navo venga gigomoni nya gulaphe. 2A di vbindrugedza giemo mahoni gwawe. Khovbe yaye yi di ngangamela nga lidambo; dzingandzu dzaye dzi di aga kha nga wenengedzo. 3Avbovbo a di tumbuluga Mosi ni Eliya, na va gu bhula naye. 4Pedro a di khusa lito, khuye: “Pfhumu, gwadi gu hi khale avba; wa gu dzina nyi na gira mitshatsha miraru: Moyo wago, mumbe wa Mosi, mumbe wa Eliya.” 5#Wona gambe: Isa 42:1; Mat 3:17; 12:18; Mark 1:11; Luk 2:22; 2 Ped 1:17-18. Na nga guganela, li dita lipfhi nya gungangamele lita va fenengedza khu mwedzi waye; khu vbakari nya lipfhi gu di pwala lito, na li gu, khilo: “Oyu khu Mwamana wangu nya gu mu haladze ngudzu, a tsakisago monyo wangu; mu yingiseni.” 6Na va pwide mahungu yaya, vapizane va di thega vbavbatshi khu khovbe na va tade khu hwanga. 7Jesu a di va yela aya va phara, khuye: “Khugani mu eme, mu nga thavi.” 8Na va hapfhude, va di wona basi Jesu nyambana mumbe muthu.

Guta ga Eliya

9Na va gu tshiga khu mugigomoni, Jesu a di va laya, khuye: “Mu nga embeli muthu iso mu ngari gu si wonago, kala Mwamana wa Muthu a wuga khu ga vafudego.” 10#Wona gambe: Mal 4:5. Vapizane va di mu wudzisa, khavo: “Khu ginani vahevbudzi nya Nayo va gukhavo Eliya a na phela khuye a wuya?” 11Uye a di va hakha, khuye: “Ina, Eliya a na wuya ata lulamisa satshavbo. 12#Wona gambe: Mat 11:14. Aholu eni nyi ngu mi embelani, kheni: Eliya dzude, aholu kha va mu tugula. Va di mu phara idzo va nga dzinago khidzo. Kharati nugo, va na sanisa Mwamana wa Muthu.” 13Vapizane va di dziti nya gukhavo a gu thula Johane Mubhapatisi.

Gikhwathana nya liphuvbo nya guvivbe

(Marko 9:14-29; Luka 9:37-43)

14Na va dzude avbo gi nga bani gi romo gidzemo, a di duga mwama moyo aya dzi thesa migondroni ga Jesu a mu embela, khuye: 15“Pfhumu, pwela wusiwana mwamana wangu, kholu a na ni gitshira gi mu sanisago ngudzu. Dzinyondro dzingi a thegelago niloni ni matini. 16Nyi di mu reside ga vapizane vago, aholu kha va dzi kodza gu mu hawulugisa.” 17Jesu a di khuye: “Mela nya vathu nyamba khodwa, mu si gitigo nigyo mu girago! Nyi na khala nanu kala lini? Nyi na mi timiselani kala lini? Mu reseni eno gwangu.” 18Khavbo avbo, Jesu, a di kawuka liphuvbo nya guvivbe li gu duga ga gikhwathana; khavbo avbo, gukhugela gikhati gile gikhwathana gile gi di vbanyiswa guralo. 19Vapizane va di ya wudzisa Jesu, khu phuvbo, khavo: “Khu ginani ethu hi nga tandrwa khilo gu li tutumisa?” 20#Wona gambe: Mat 21:21; Mark 11:23; 1 Kor 13:2. Jesu a di va hakha, khuye: “Khu kotani nya gukhodwe gwanu a gu gudugwanana. Khu lisine nyi ngu mi embelani, kheni: Gukhodwa gwanu gwa gu fanana ni mbewu nya ginapi, mu na rumani gigomo gegi, khenu: ‘Siguga khavba uya khala vbale’; gi na mi yingisani. Khu kharato, gimwalo gi na mi tandrago. 21Lifumbu leli nya maphuvbo la gu tutumiswa basi khu tshivba nya nombelo ni guhala.”

Gitiviso nya wuvili nya gusaniseke gwa Jesu

(Marko 9:30-32; Luka 9:43-45)

22Na va tshanganide Galileya, Jesu a di va embela, khuye: “Mwamana wa Muthu a na ni fanelo nya gu ningedwe mandzani nya vathu, 23va na mu songa, aholu khu litshigu nya wuraru a na wuga.” Na va pwide esi, vapizane va di swihala ngudzu.

Khupho nya Nyumba ya Nungungulu

24 # Wona gambe: Eks 30:13; 38:16. Na va vbohide Kafarinawume, vakhuphisi va Nyumbani ga Nungungulu va di ya ga Pedro, vaya mu wudzisa, khavo: “Ina muhevbudzi wanu kha livbi khupho nya Nyumba ya Nungungulu, gani?” 25A di hakha, khuye: “A ngu livba.” Na vbohide gaya, Jesu a di thangulela gu mu wudzisa, khuye: “Nga nyi embela, Simoni: Khu vamani va khuphelago ni gu girela mihengo vafumeli nya mafu? Khu ngamo yawe, mwendro khu valombo?” 26Kha nga ulo a nga phindrulago, khuye: “Khu valombo,” Jesu a di mu embela, khuye: “Khu kharato, ngamo yawe yi mwalo giguruvedzo nya gukhuphe. 27Ambari ulo, gasi hi si tshunganisi muthu, indra phwani uya lova. Ndzandzi u na gu phelago khiyo gu mola, yi tule likana, u na mana dzitsapawu. Dzi dzege uya livba khidzo khupho wago ni wangu.”

Currently Selected:

Matewu 17: BGG2014

Highlight

Copy