Matewu 16

Vafarisi va ngu lomba giyeyedzo

(Marko 8:11-13; Luka 12:54-56)

1Khavbo avbo, Vafarisi ni Vasadhusi va di mu yela, gasi gu mu linga, va di mu lomba gu a va girele giwoniso gya Ndzadzini. 2Uye a di va hakha, khuye: “Gupfolani nya lidambo, mu ngu, khenu: ‘Wutshigu wa muhuno wu na bani wuri wadi, kholu damboni gufuvide.’ 3Na gu ngari dzimindru dzikhongolo, mu ngu, khenu: ‘Muhuno gu na bani guri ni phuvbo, kholu idzo gu fuvidego khidzo damboni gwa gu patedzela ni gusivbala.’ Vapfhadzinu, mu ngu kodza gu tshamusela makhalelo ya damboni, aholu kha mu kodzi gu tshamusela siyeyedzo nya dzinango! 4#Wona gambe: Mat 12:38-42; Luk 11:29-32. Mela yoyu nya vathu nya guvivbedwe khu monyo, va si khodwigo, wa gu lomba giyeyedzo! Aholu kha va na ningwa gimbe giyeyedzo vbavbandze nya giyeyedzo gya Jona.” Khavbo avbo, a di va ditsha a khuga a gu hongola.

Mela nya Vafarisi nuwo nya Vasadhusi

(Marko 8:14-21)

5Vapizane, gikhati va nga tshatugago, va di divala gu dzega sibaba. 6Jesu a di va embela, khuye: “Gwadigwadi dzi woneleni ni mela nya Vafarisi nuwo nya Vasadhusi.” 7Va di gu wudzisana khu gyawe, khavo: “Mwendro khulo hi nga diga sibaba.” 8Aholu Jesu, a nga bani a wona mapimo yawe, a di va embela, khuye: “Vathu nya gukhodwe vbadugwana, khu ginani mu emago dzikhana khu gukhenu kha mwa dzega sibaba? 9Mu si gu si pimi iso nyi si thulago? Ina kha mu dundrugi sibaba sile nya livbandre si nga enedzago livbandre magumi mazana vathu, ni tengo nya situndru mu nga tadzago khu sipandre si nga tshalago, gani? 10Kha mu nga gu dundruga gambe sibaba sile nya livbandre na sivili si nga enedzago magumana mazana vathu, ni tengo nya situndru mu nga tadzago khu sipandre si nga tshalago, gani?” 11Khu ginani mu ngamba tugula nya gukhenu khandri nyi di thula gibaba gikhati nyi nga mi embelani, kheni: Gwadigwadi ni mela nya Vafarisi nuwo nya Vasadhusi. 12Khavbo avbo, va di dziti nya gukhavo khandri a di vbweta gukhuye va dzi wonele ga mela nya sibaba; aholu va dzi wonele ga sihevbudzo sa Vafarisi ni Vasadhusi.

Wufakazi wa Pedro

(Marko 8:27-30; Luka 9:18-21)

13Na vbohide tigoni ga Sezareya gwa Filipi, Jesu a di wudzisa vapizane vaye, khuye: “Vathu vari khavo khuye mani Mwamana wa Muthu?” 14#Wona gambe: Mat 14:1-2; Mark 6:14-15; Luk 9:7-8. Va di hakha, khavo: “Vomo va gukhavo khu Johane Mubhapatisi; vambe vari khavo khu Eliya; vambe khavo khu Jeremiya mwendro moyo nya vaprofeti.” 15Jesu a di wudzisa: “Ahati enu, mwari khenu kheni mani?” 16#Wona gambe: Joh 6:68-69. Simoni Pedro a di khusa lito a gu phindrula, khuye: “Uwe khuwe Kristo, Mwamana wa Nungungulu a vbanyago.” 17Jesu a di mu hakha, khuye, “U kategide, Simoni, mwamana wa Jona, kholu isoso khandri u di tiviswa khu muthu; aholu, u di tiviswa khu Babe wangu a guromo Ndzadzini. 18Eni neni nyi ngu gu embela, kheni: Uwe khuwe Pedro; vbatshani nya giwindri gegi nyi na vbaha libandla langu. Ni tshivba nya mufumo nya lufu kha yi na li gira gilo. 19#Wona gambe: Mat 18:18; Joh 20:23. Nyi na gu ninga dzipfhungulo nya Mufumo wa Ndzadzini; igyo u na gi hungago mafuni gi na hungwa niyo Ndzadzini; igyo u na gi tshulago mafuni gi na tshudwa niyo Ndzadzini.” 20Khavbo avbo, a di laya vapizane vaye gu va si embeli muthu khavo uye khuye Kristo.

Gitiviso nya guphele nya sisaniseko saye

(Marko 8:31—9:1; Luka 9:22-27)

21Gukhugela litshigu lile, Jesu a di phela gu yeyedza vapizane vaye khuye na ni fanelo nya guhongole Jerusalema aya saniswa ngudzu khu madhota, ni vakhongolo nya vaphasi ni vahevbudzi nya Nayo, a songwa; aholu a na wuga khu litshigu nya wuraru! 22Pedro a di mu rana khu phuvbo, aya mu kawuka, khuye: “Isoso si nga giregi gwago, Pfhumu! Silo nya nga isoso gima kha si na gu dugelela!” 23Gasi uye, a di thendregedza, a embela Pedro, khuye: “Leya, Sathane! U womo kha nga mutshunganisi wangu, kholu mapimo yago kha mati khu ga Nungungulu; aholu, khu ga vathu!”

24 # Wona gambe: Mat 10:38; Luk 14:27. Jesu a di embela vapizane vaye, khuye: “Uye a vbwetago gu nyi landrela, a na dzi nyenye wurumba waye, a vbagare gihambano gyaye a nyi landrela. 25#Wona gambe: Mat 10:39; Luk 17:33; Joh 12:25. Uye a vbwetago gu vbanyisa womi waye, a na wu luza; gasi uye a luzago womi waye khu kotani yangu, a na wu mana. 26Giphaso muni a gi manago muthu a fumelago litigo rumba, a guhegisa khu gu dzimeledwa khu hefemulo waye? Mwendro saye, ginani muthu a dzi kodzago gu ningela gasi gu dzegisa khigyo hefemulo waye? 27#Wona gambe: Mat 25:31; Dzind 62:12. Kholu Mwamana wa Muthu a nata ni dzingilozi dza Nungungulu, na tade khu gidhumo gya Babe waye, ata ninga moyo ni moyo, tshatshazelo waye gukhedza khu mithumo yaye. 28Khu lisine nyi ngu mi embelani nya gukheni: Vomo hi gu navo avba va na gumba linga lufu, kala va gu wona Mwamana wa Muthu na guta ni mufumo waye.”

Currently Selected:

Matewu 16: BGG2014

Highlight

Copy