PANDARIADDI 34
34
Paṛṛaṛampassa si Dina
1Su allo sambau, i Dina ana'i Yakub wuṛṛu i Lea, wawine, nattembo manga pira wawinen Kanaan. 2Napawe i Sikhem, ana'i Hemor taumatan i Hewi apan naola'a ratu su wageangnge udde naasilo si Dina, maṛṛuala udde tinal᷊angnge, ana see nilal᷊eon tou. 3Arawe i tou tumanite ninumemman i Dina, na'oman sara piate naungnga si Dina wuṛṛu maddea'a tadea'u maṛṛuala udde lai pia naungnga si tou. 4Unni Sikhem su iamangnge, “I ya'u madorongnga Iamangnga mattinsahadda tadea'u maasomba maṛṛuala udde maola'a wageangku. I ya'u mapulu atonna mawingngi tou.”
5I Yakub naaringikka manungku anangnge buatte nilal᷊eo awawantuge, arawe ana waugu manga anangnge tantal᷊anna uariaga manga winatangnga su wadda'a, i tou tawe napa'ola'a apa-apa tantal᷊anna i mangitou taambe napul᷊e.
6I Hemor, iamangngi Sikhem, nirumanta ringanni Yakub inai ma'a'atokki tou. 7Naṛṛindo'a su tempo udde manga ana'i Yakub napul᷊e wuassu wadda'a. Naaringikka watti'a udde, i mangitou niṛṛumindu'a wuṛṛu lembon massa'u. Ana waugu ringannu nandal᷊eo ana'i Yakub udde, i Sikhem buatte nalobbossa anambon taumatan Israel. 8Unni Hemor si Yakub, “Ana'u i Sikhem, pia apulu su ana'u Tuṛṛangnga; i ya'u sumal᷊ande tadea'u Tuṛṛangnga mamalan ana'u ma'awingngi tou. 9Wette i ite mabbaidda manungku balahannu Tuṛṛangnga wuṛṛu balahannu i yami wotongngete ma'awingnga. 10Ne manga Tuṛṛangnga wotongngete matana'a suadio'a ringanni yami su wanua indi; suapawe ipa'apulun Tuṛṛangnga. Manga tuṛṛangnga wotongnge mabbal᷊u'a ringannu tawe sal᷊awangnge wuṛṛu manahuanna darotongnga.”
11Wua'udde i Sikhem nabbisara iamangngi Dina wuṛṛu manga iaangnge, “Suungete darorongku indi, ne i ya'u sarun mangonggolu apa apan ipaapulun kamiu. 12Wal᷊oa'e lal᷊antakke apa apan ipaapulun kamiu, wuṛṛu tantuna'e wul᷊awannu awingnge. I ya'u sarun mangonggola al᷊awo'u apan doronganni yamiu, addonganne i yamiu mamala'u maawingngu maṛṛuala udde.”
13Ana waugu i Sikhem buatte nandal᷊eo awawantugu tuari mangitou i Dina, manga ana'i Yakub nangawusu si Sikhem wuṛṛu si Hemor iamangnge. 14Unni mangitou su taumata darua udde, “I yami massili mamalan tuarin kami ma'awingnga ringannu taumata apan tawe nisunatta. 15I yami tumba'u ma'apulun darorongngi yamiu udde ringannu sambau riandi, eteudde: I yamiu ṛinone mabbal᷊i ere i yami, atappasanne anambon esakka su wallati yamiu ṛinone sunatanna. 16Wua'udde i yami sarun manuungngu darorongngu su ola'u pa'a'awingnga lo'a udde. I yami sarun mamanua su wallati yamiu wuṛṛu mabbal᷊i walahanna sambau ringanni yamiu. 17Arawe amungkangu i yamiu madiri manengkamma manga rianding kami, wuṛṛu madiri sunatanna, i yami sarun mangul᷊e apia maṛṛuala udde wuṛṛu iapidda mapul᷊e.”
18I Hemor wuṛṛu i Sikhem mammendamma manga riandi udde su ṛinone, 19wuṛṛu i Sikhem mal᷊uassa manuungngu riandi udde ana waugu i tou maapulun i Dina. Su wallatu anambon ṛuanganne, ete i Sikhem apan pia saṛṛaungnge.
20Wua'udde i Hemor wuṛṛu i Sikhem inaite watukku tampa paammul᷊anna su ngara pasallangannu soa, wuṛṛu nabbisara su tumana'u soa mangitou arendi, 21“Manga taumatan Israel udde haweng kite. Nariaddi wala'e i mangitou matana'a su wanua indi suadio'a ringanni ite wuṛṛu walate i mangitou inai su al᷊awo'u tampa apan ipapulu mangitou. Wanua indi mal᷊al᷊angnga atonna si mangitou. I ite wotongnge ma'awingngu manga maṛṛualan mangitou, wuṛṛu i mangitou lai wotongnge maawingngu manga maṛṛualan kite. 22Arawe manga taumata udde tumba'u mappulu matana'a susambau ringanni ite wuṛṛu mabbal᷊i walahanna sambau ringanni ite ringannu sambau riandi, eteudde: anambon esakka su wallati ite ṛinone sunatanna ere lai i mangitou. 23Ne anambon ammul᷊annu winatangngi mangitou wuṛṛu al᷊awo'u darotongngi mangitou mabbal᷊i pussa'ang kite. Nariaddi wette i ite umirete darorongngi mangitou tadea'u i mangitou matana'a su sampunna ringanni ite.” 24Anambon tumana'u soa apan uaammulla udde niumiren darorongngi Hemor wuṛṛu i Sikhem, ana see anambon esakka saṛṛen tumuwo su soa udde nisunatta.
25Tallu allo wua'udde, napawe manga taumata esakka udde ta'e uapendamma atataddu'a ana waugu nisunatta, ruan katou ana'i Yakub, eteudde iaangngi Dina aranne i Simeon wuṛṛu i Lewi, nanganu hal᷊elen tarua, ana see ringannu mal᷊anna-l᷊annaba sinumutta sulal᷊ummu soa. Wua'udde itarua namate anambon taumata esakka isudde, 26nasutta lai i Hemor wuṛṛu i Sikhem. Ana see itarua nangal᷊appa si Dina wuassu wal᷊en i Sikhem niapidda napul᷊e. 27Napawe pamamate udde nal᷊iudda, manga ana'i Yakub waine nangaṛṛo soa udde maola'a wawal᷊issa ana waugu tuari mangitou buatte nilal᷊eo awawantuge. 28I mangitou nanganu ammul᷊annu ambinga domba, sapi, keledai, wuṛṛu al᷊awo'a sulal᷊ummu soa wuṛṛu su wadda'a. 29I mangitou nanganu anambon darotongnga apan maarega, nanametta anambon bawine wuṛṛu al᷊aṛṛana'a wuṛṛu al᷊awo'u lal᷊oṛṛon manga wal᷊en su soa udde.
30I Yakub nabbisara si Simeon wuṛṛu si Lewi, “Iradua napaasusa'u. Orassa indi taumatan Kanaan wuṛṛu taumatan Feris wuṛṛu anambon tumana'u wanua indi sarun mandantingku. Manga taumatan kite matul᷊u; amungkangu manga tumana'u wanua udde maammula mandoappa wuṛṛu mamangalo si ya'u, anambon amonanni ite pateanna.”
31Arawe i mangitou sinumimbakka, “I yami tawe mapaawalan tuaring kami niola'a naal᷊ihidda wawine masandaga.”
Currently Selected:
PANDARIADDI 34: LAITLD
Highlight
Share
Copy
Want to have your highlights saved across all your devices? Sign up or sign in
