PANDARIADDI 33
33
I Yakub nassomban i Esau
1I Yakub naasilo si Esau nirumanta ringannu appatu ṛasutta taumatane. Ana waugu udde i tou nattahia manga anangnge su wallati i Lea, i Rahel wuṛṛu ruan katou awingnge su liudde. 2Awingnge su liudde ruan katou suadio'a ringannu anangnge niaddo su saruanne, wua'udde i Lea suadio'a ringannu manga anangnge, ana see i Rahel wuṛṛu i Yusuf su liudde atonna. 3I Yakub u'amatta su saruanni mangitou sarangkanambone, wuṛṛu apiddu mangundanin iaangnge, i tou nassuba na'oman sara paapitu. 4Arawe i Esau tinumal᷊angnga naisasomban i Yakub, ana see naṛṛa'uppa ana see nangari'a. Wuṛṛu ruan katou taumata udde ual᷊al᷊uaite. 5Napawe i Esau naasilo anambon bawine wuṛṛu manga ana'a udde, i tou naiwal᷊o, “ Isai i mangitou apan suadio'a ringannu indi?”
“I mangitou manga ana'u,” sasimbakki Yakub, “Ruata nangonggolu manga ana'a udde si ya'u.” 6Wua'udde manga awingnge su liudde niumamatte ringannu manga ana'i mangitou, ana see nassubba. 7Wua'udde nirumantate i Lea suadio'a ringannu manga anangnge, wuṛṛu panginsueanne i Yusuf wuṛṛu i Rahel nangundani ana see i mangitou sarangkanambone nassubba.
8I Esau naiwal᷊o, “Apa pandumannu ringannu taumata aroddi anambone apan nassomba'u tanginna?”
I Yakub sinumimbakka, “Tadea'u ipalluassa naungngu Iaangnga.”
9Arawe i Esau nabbisara, “Nasuungke darotongku, ariete i'o mangonggolu aonggola si ya'u.”
10Unni Yakub, “Arie! Amungkangu i ya'u buatte nalluassa naungngu Iaangnga, sengkampe sasamba'u indi. Si ya'u, naasilo hatin Iaangnga ere lai naasilo hatin Duata, ana waugu Iaangnga aroddi masaṛṛionto'a si ya'u. 11I ya'u sumal᷊ande, sengkampe sasamba apan buatte niapi'u indi. Ruata buatte nangonggolu naungnga mapia si ya'u wuṛṛu nangonggolu al᷊awo'u sarangkanambone apan ta'u hagausanna.” I Yakub sidutu mammata'a na'oman sara i Esau nanengkamma aonggola udde.
12Ana see i Esau nabbisara, “Wette i ite masasadia inaite, i ya'u sarun umamatta malliu ṛoro si yamiu.”
13I Yakub sinumimbakka, “Iaangnga masingkatta manungku manga ana'u indi ta'e lome, wuṛṛu i ya'u ṛinone maadunna ringannu anambon binatangnga apan tantal᷊anna ta'e mappasusu. Amungkangngu ul᷊uhanna mal᷊iha-l᷊ihakka, salaiwe tumba'u allo massallo, ne anambon ammul᷊annu winatangnga udde sarun mate. 14Amatte palliu ṛorote, i ya'u manantuṛṛutte ringannu mal᷊iwue. I ya'u sarun umamatta masaṛṛawutta ringannu winatangnga wuṛṛu manga ana'u indi ma'oman sara ma'enggenna Iaangnga su Edom.”
15Unni Esau, “Amungkangngu aroddi, mappianne i ya'u manantangngu manga pira taumata'u si'o.”
Arawe i Yakub sinumimbakka, “Ariete mattinsahadda, i ya'u tumbau maapulu malluassa naungngu Iaangnga.” 16Etearoddi i Esau nabelengnga poi watukku Edom. 17Arawe i Yakub inaite watukku Sukot, ana see napararisikku wal᷊en tou wuṛṛu tampan passiringannu manga winatangnge. Ana waugu udde tampa udde nissago Sukot.
18Sulal᷊ummu amatanna wuassu Mesopotamia, i Yakub na'omate ringannu sal᷊amatta su soa i Sikhem su wanua Kanaan, ana see nangattingngu rasanne su sambau wadda'a maranin soa udde. 19Wadda'a tampan paddasananne udde niwallianne wuassu papapulunni Hemor, iamangngi Sikhem, ringannu arega maṛṛasutta roitta sal᷊a'a. 20Wua'udde i tou napararisikku mezbah isudde wuṛṛu nissagon tou “El, Ruatan Israel”.
Currently Selected:
PANDARIADDI 33: LAITLD
Highlight
Share
Copy
Want to have your highlights saved across all your devices? Sign up or sign in
