KAL᷊AL᷊AHE 5
5
L᷊ul᷊ung u buki dang Ahusu u Domba
1 #
Yes. 29:11; Yeh. 2:9-10 Bou e'e ia nakawua simbau l᷊ul᷊ung u buki sul᷊imang-E ko kakangiang su kararatuang e'e. Buki e'e napene dingang u wohe'e bou simbuka sarang simbuka dang nisegeli dingang u pitu mbau segeli. 2Bou e'e ia nakawua singkatau mal᷊aikati ko wahani kaghaese dingang u tingihe ko mauha, “I sai botonge muhose manga segeli i'i dang mamingkahi buki i'i?” 3Kateho maning su sorga, kere l᷊ai su dunia, arako su wal᷊a ngu dunia#5:3: su wal᷊a ngu dunia: dunia ngu taumata ko nate (putuhung 1:18). takoae sarang singkatau l᷊ai ko botonge mamingkahi buki e'e, dang mutuhung su l᷊al᷊unge. 4Inau ia nusumangi nasusa, watu u takoae sarang singkatau ko botonge mamingkahi buki e'e, dang mutuhung sarang l᷊al᷊unge. 5#Kej. 49:9; Yes. 11:1, 10Bou e'e singkatau su tal᷊oara u manga pangaha e'e nangul᷊i si sia, “Kumbahang sumangi! Tuhunge! Singa bou komol᷊ang u Yehuda, e'e ko hintou ngi Daud ko mawantughi, seng nakauntung. I Sie botonge muhose segeli pitu e'e dingang u makawingkahi buki e'e.”
6 #
Yes. 53:7; Za. 4:10 Bou e'e ia nakawua Ahusu u Domba kararisi su tal᷊oara u kararatuang, nil᷊ikutang i sire pa niriadi e'e dang kaul᷊i u pangaha e'e. Ahusu u Domba e'e tuhungang ko musul᷊ung u seng mbuae nihata. I sie pia sasunge nge pitu dang mata nge pitu: e'e ko pitu Roh bou Mawu Ruata ko seng niroi sarang kaul᷊i u dunia. 7Bou e'e Ahusu u Domba e'e l᷊imempang dang nangal᷊a l᷊ul᷊ung u buki e'e bou l᷊ima kuaneng u taumata ko kakangiang su kararatuang. 8#Mzm. 141:2Tintal᷊a Ahusu u Domba e'e kapukoa e kere'e, i sire pa ko niriadie dingang i sire pangaha duampul᷊o pa e'e nusuba susaruang-E. I sire singkatau-singkatau nuhinggo kecapi dang wohosi wul᷊aeng ko tatahoe kamania, e'e ko kakal᷊iomaneng u umat u Mawu Ruata. 9#Mzm. 33:3, 98:1; Yes. 42:10I sire nuhengke u simbau samperi ko wuhu:
“I kau botonge mangal᷊a buki e'e
dang muhose manga segeli.
Watu u I Kau seng nipate, dang dingang u kapapate-Ngu,
taumata bou patiku komol᷊ang, bahasa, wanua dang bangsa seng nil᷊uangeng i kumu guna-Ngu Mawu Ruata.
10 #
Kel. 19:6; Kl᷊h. 1:6 I kau seng nukoa si sire simbau bangsa ko nitantu makoa manga imam,
tadeau i sire mutangkiang Mawu Ruata ngi kite,
dang mamarenta su wawo u dunia.”
11 #
Dan. 7:10
Bou e'e ia sau nakawua. Ia nakaringihi tingihu mal᷊aikati ko hiwunge dang jutange ul᷊ie. I sire kararisi nul᷊iku kararatuang dang i sirepa ko niriadi dang manga pangaha e'e. 12Dang i sire e'e kasampere dingang u tingihi ko mauha,
“Ahusu u Domba ko seng nihata e'e, hinonge manarima kawasa,
kakakala, kapapilesa l᷊au katatoghasi;
I sie hinonge adateng, wantughang dang idalo!”
13Bou e'e ia nakaringihi kaul᷊ie niriadi su l᷊angi, su dunia, ko su wal᷊a ngu dunia dang su l᷊al᷊ung u l᷊auri – pol᷊onge patiku ko niriadi su kaul᷊i u dunia i'i – kasampere,
“I Sie kakangiang su kararatuang, dingang u Ahusu u Domba e'e,
Ko dalong dang adateng wantughang dang makawasa sarang panginsuenge!”
14Kute u i sire pa ko niriadi e'e nusumimbahi, “Aming!” Dang manga pangaha e'e l᷊ai nusuba l᷊au nanumba.
Currently Selected:
KAL᷊AL᷊AHE 5: LAISXN
Highlight
Share
Copy
Want to have your highlights saved across all your devices? Sign up or sign in
2014 Indonesian Bible Society (Lembaga Alkitab Indonesia)
